દિલ્હી કાર બ્લાસ્ટ કેસમાં મોટી તપાસ, લાલ રંગની ફોર્ડ ઇકોસ્પોર્ટ કારની શોધખોળ શરૂ

દિલ્હીમાં 10 નવેમ્બરે લાલ કિલ્લા મેટ્રો સ્ટેશન-1 પાસે થયેલા ભયાનક કાર બ્લાસ્ટના કેસમાં નવી શોધખોળ શરૂ કરવામાં આવી છે. પોલીસને તપાસમાં ખબર પડી છે કે વિસ્ફોટમાં ઉપયોગમાં આવેલી સફેદ કલરની હ્યુન્ડાઈ I20 કાર સાથે શંકાસ્પદોએ બીજી લાલ રંગની ફોર્ડ ઇકોસ્પોર્ટ કાર પણ ઉપયોગ કરી હતી. આ લાલ કારનું રજિસ્ટ્રેશન નંબર DL10CK0458 છે અને તે ઉમર નામના વ્યક્તિના નામે નોંધાયેલ છે.

દિલ્હી પોલીસે તમામ પોલીસ સ્ટેશનો, પોલીસ પોસ્ટ અને બોર્ડર ચેકપોઈન્ટ્સ પર લાલ કારની તપાસ માટે હાઈએલર્ટ જાહેર કર્યો છે. આ સાથે ઉત્તર પ્રદેશ અને હરિયાણા પોલીસને પણ આ કાર અંગે એલર્ટ મોકલવામાં આવ્યો છે. હજુ સુધી સફેદ કાર સાથે લાલ ઇકોસ્પોર્ટ કાર મળી નથી, છતાં સાવચેતીના ભાગરૂપે તેની તપાસ કરાઈ રહી છે.

દિલ્હી બ્લાસ્ટમાં અત્યાર સુધીમાં 12 લોકોના મોત થયા છે અને અનેક લોકો ઈજાગ્રસ્ત છે. બ્લાસ્ટ એટલો તીવ્ર હતો કે આસપાસની બિલ્ડિંગો, વાહનો અને મંદિરોને પણ નુકસાન થયું હતું. ઘટનામાં એક વ્યક્તિ તો વૃક્ષ પર લટકતો મળ્યો હતો.

બીજી તરફ, આ કેસમાં અલ ફલાહ યુનિવર્સિટીની પણ ચર્ચા થઇ છે. યુનિવર્સિટીના કુલપતિ ભૂપિન્દર કૌર આનંદે સ્પષ્ટતા કરી છે કે પકડાયેલા બે ડોક્ટરો અને અન્ય મુખ્ય શંકાસ્પદો સાથે યુનિવર્સિટીએ કોઈ પ્રકારનો સંબંધ નથી, સિવાય કે તેઓ સત્તાવાર ક્ષમતામાં યુનિવર્સિટીમાં કામ કરતા હતા.

પોલીસની પાંચ ટીમો હવે લાલ કારની શોધખોળ માટે અલગ-અલગ વિસ્તારોમાં તપાસ ચલાવી રહી છે અને જરૂરી પુરાવા એકત્રિત કરવા પ્રયાસ કરી રહી છે. આ તપાસથી આગળની સુરક્ષા વ્યવસ્થા અને આરોપીઓ પર કડક કાર્યવાહી માટે માર્ગદર્શન મળશે.