સુપર 8માં નિર્ણાયક ટકરાવ

ટી-20 વર્લ્ડ કપના સુપર 8 રાઉન્ડમાં આજે ભારત અને ઝિમ્બાબ્વે વચ્ચે અત્યંત મહત્વપૂર્ણ મુકાબલો રમાવાનો છે. ડિફેન્ડિંગ ચેમ્પિયન ભારત માટે આ મેચ ફક્ત એક સામાન્ય લીગ મેચ નથી, પરંતુ ટૂર્નામેન્ટમાં ટકી રહેવાની ‘કરો યા મરો’ જેવી સ્થિતિ બની ગઈ છે. દક્ષિણ આફ્રિકા સામે 76 રનથી થયેલા પરાજય બાદ ભારતનો નેટ રન રેટ ઘટીને -3.80 થયો છે, જે ટીમ માટે ચિંતાજનક બાબત છે. હવે માત્ર જીત પૂરતી નથી, પરંતુ મોટી જીત જરૂરી બની છે.
 

બેટિંગ ક્રમમાં ફેરફાર શક્ય?

ટૂર્નામેન્ટ દરમિયાન ભારતની બેટિંગ લાઈન-અપ અપેક્ષા મુજબ પ્રદર્શન કરી શકી નથી. ખાસ કરીને અભિષેક શર્માનું ફોર્મ ચિંતાનો વિષય બન્યું છે. ચાર મેચમાં માત્ર 15 રન, 3.75ની સરેરાશ અને 75ના સ્ટ્રાઈક રેટ સાથે તે ટીમ માટે ભારરૂપ સાબિત થયો છે. હવે પ્રશ્ન ઊભો થયો છે કે શું તેને પ્લેઇંગ ઈલેવનમાં જાળવી રાખવામાં આવશે કે સંજુ સેમસનને તક આપવામાં આવશે?

ટીમના બેટિંગ કોચ સિતાંશુ કોટકેએ પ્રી-મેચ પ્રેસ કોન્ફરન્સમાં જણાવ્યું હતું કે ટીમ કોમ્બિનેશનમાં ફેરફાર શક્ય છે. ભારત પાસે બે ડાબા હાથના ઓપનર છે અને નંબર 3 પર પણ ડાબા હાથનો બેટ્સમેન છે. વિરોધી ટીમ ઓફ-સ્પિન પર નિર્ભર હોય તો આ બાબતે ચર્ચા થાય છે. એક વિકલ્પ તરીકે સૂર્યકુમાર યાદવને નંબર 3 પર મોકલી બેટિંગ ક્રમમાં વૈવિધ્ય લાવવાનો વિચાર પણ થઈ શકે છે.
 

મધ્યક્રમનું ફોર્મ ચિંતાજનક

તિલક વર્માનું ફોર્મ પણ ખાસ પ્રભાવશાળી રહ્યું નથી. પાવરપ્લે દરમિયાન તેનો સ્ટ્રાઈક રેટ 118 છે, જે આધુનિક T-20 ક્રિકેટ માટે ઓછો ગણાય. બીજી તરફ ઈશાન કિશન 193ના સ્ટ્રાઈક રેટથી ઝડપી રન બનાવી રહ્યો છે, પરંતુ તેને બીજા છેડેથી પૂરતો સાથ મળતો નથી. કેપ્ટન સૂર્યકુમાર યાદવે 180 રન કર્યા છે, છતાં તેનો સ્ટ્રાઈક રેટ 127 રહ્યો છે, જે તેની કારકિર્દીના ધોરણ કરતાં ઓછો છે.

રિંકુ સિંહ અને શિવમ દુબે પાસેથી પણ ટીમને મોટા ફિનિશની અપેક્ષા છે. જો બેટિંગ યુનિટ એકસાથે ક્લિક કરે, તો ભારત માટે મોટા સ્કોરનો માર્ગ ખુલ્લો થઈ શકે છે.
 

ચેપોકની પીચ અને પરિસ્થિતિ

આ મેચ ચેન્નાઈના એમ.એ. ચિદમ્બરમ સ્ટેડિયમ (ચેપોક) ખાતે રમાશે. અત્યાર સુધી ટૂર્નામેન્ટમાં આ મેદાનની પીચ બેટિંગ માટે અનુકૂળ રહી છે. ન્યૂઝીલેન્ડે અહીં 180થી વધુના લક્ષ્યનો સફળ પીછો કર્યો હતો, જે દર્શાવે છે કે યોગ્ય શોટ-સિલેક્શન સાથે મોટા સ્કોર શક્ય છે. જોકે ચેપોકમાં સ્પિનરોને પણ સહાય મળે છે, તેથી મધ્ય ઓવરોમાં રમતમાં મોટો ફેરફાર આવી શકે છે.
 

ઝિમ્બાબ્વેની તાકાત અને પડકાર

ઝિમ્બાબ્વેની ટીમને હલકી રીતે લઈ શકાય નહીં. તેમની ઝડપી બોલિંગ ત્રિપુટી — બ્લેસિંગ મુઝારાબાની, રિચાર્ડ નગારવા અને બ્રેડ ઈવાન્સ — પોતાની ગતિ અને બાઉન્સથી ભારતીય બેટ્સમેનોને મુશ્કેલીમાં મૂકી શકે છે. સ્પિન વિભાગમાં સિકંદર રઝા, ગ્રેમ ક્રેમર અને રાયન બર્લ છે, પરંતુ ભારતીય બેટિંગ સામે તેમનો પ્રભાવ મર્યાદિત રહી શકે છે.
 

ભારતની બોલિંગ—મજબૂત આશા

ભારત માટે સકારાત્મક બાબત તેની બોલિંગ યુનિટ છે. જસપ્રિત બુમરાહ ઉત્તમ ફોર્મમાં છે અને અર્શદીપ સિંહ તથા વરુણ ચક્રવર્તી સાથે મળીને મજબૂત આક્રમણ બનાવે છે. ઉપ-કપ્તાન અક્ષર પટેલ આ મેચમાં પરત ફરે તેવી અપેક્ષા છે, જે ટીમના સંતુલનમાં વધારો કરશે. વોશિંગ્ટન સુંદરને બહાર બેસવું પડી શકે છે.
 

હેડ-ટુ-હેડમાં ભારતનું વર્ચસ્વ

2010થી 2024 દરમિયાન ભારત અને ઝિમ્બાબ્વે વચ્ચે રમાયેલી 13 T20 આંતરરાષ્ટ્રીય મેચોમાં ભારતે 10 જીત નોંધાવી છે અને ફક્ત 3 હાર ભોગવી છે. જીતનો ટકાવારી 76.92 છે, જે ભારતનું સ્પષ્ટ વર્ચસ્વ દર્શાવે છે. ICC મેન્સ T20 વર્લ્ડ કપમાં બંને વચ્ચે એકમાત્ર મુકાબલો 6 નવેમ્બર 2022ના રોજ મેલબોર્નમાં રમાયો હતો, જેમાં ભારતે જીત મેળવી હતી.
 

સંભવિત પ્લેઇંગ ઈલેવન

ભારતની સંભવિત ઈલેવનમાં સંજુ સેમસન, અભિષેક શર્મા, ઈશાન કિશન, સૂર્યકુમાર યાદવ (કેપ્ટન), હાર્દિક પંડ્યા, તિલક વર્મા/રિંકુ સિંહ, શિવમ દુબે, અક્ષર પટેલ, અર્શદીપ સિંહ, જસપ્રિત બુમરાહ અને વરુણ ચક્રવર્તી સામેલ થઈ શકે છે.

આજની સાંજનો મુકાબલો ભારત માટે ટૂર્નામેન્ટનો ટર્નિંગ પોઈન્ટ સાબિત થઈ શકે છે. મોટી જીત સાથે ભારત માત્ર નેટ રન રેટ સુધારી શકશે નહીં, પરંતુ આત્મવિશ્વાસ પણ પાછો મેળવી શકશે. હવે જોવાનું એ છે કે ‘કરો યા મરો’ની આ લડાઈમાં ટીમ ઈન્ડિયા દબાણને કેવી રીતે સંભાળે છે.