રાજ્યના મુખ્યમંત્રી ભૂપેન્દ્રભાઈ પટેલે જામનગર સહિત રાજ્યના મહાનગરોમાં વિકાસકાર્યોને વધુ વેગ આપવા માટે સ્પષ્ટ અને કડક સૂચનાઓ આપી છે. તાજેતરમાં મુખ્યમંત્રીએ મહાનગરોના મેયર, ચેરમેન અને સંબંધિત અધિકારીઓને રૂબરૂ બોલાવીને તેમના શહેરોમાં ચાલી રહેલા વિકાસ કામો તથા નવા પ્રસ્તાવિત પ્રોજેક્ટ માટે કેટલા નાણાંની જરૂર પડશે તેની વિગતવાર માહિતી માગી હતી. આ બેઠક દરમિયાન મુખ્યમંત્રીએ સ્પષ્ટ સંદેશ આપ્યો કે મંજૂર થયેલા કામોમાં કોઈપણ પ્રકારની ઢીલાશ ચલાવી લેવામાં નહીં આવે અને તમામ પ્રોજેક્ટો સમયસર પૂર્ણ થવા જોઈએ.

મુખ્યમંત્રીએ ખાસ કરીને જામનગરના વિકાસ પર ધ્યાન કેન્દ્રિત કરતા જણાવ્યું કે શહેરમાં ચાલી રહેલા તેમજ આગામી સમયમાં શરૂ થનારા પ્રોજેક્ટો માટે ગતિ વધારવી અનિવાર્ય છે. તેમણે જણાવ્યું હતું કે જામનગરમાં લાલપુર બાયપાસ ચોકડીથી આગળ આવેલા જીઆઈડીસી વિસ્તારમાં રૂા.105 કરોડના ખર્ચે પ્રાદેશિક કન્વેન્શન સેન્ટર બનાવવાની જાહેરાત બજેટમાં કરવામાં આવી છે. આ પ્રોજેક્ટનો ડીપીઆર (DPR) હાલમાં અંતિમ તબક્કામાં છે અને તેને ઝડપથી અમલમાં મૂકવા માટે તમામ તૈયારીઓ હાથ ધરવામાં આવી રહી છે.

પ્રસ્તાવિત કન્વેન્શન સેન્ટર આધુનિક સુવિધાઓથી સજ્જ અને બહુમુખી ઉપયોગ માટે રચાયેલું હશે. આ કેન્દ્રમાં એક સાથે 2,184 લોકો આરામદાયક બેઠક વ્યવસ્થા સાથે વિવિધ કાર્યક્રમોમાં ભાગ લઈ શકશે. સમગ્ર કન્વેન્શન સેન્ટરને ત્રણ સ્તરમાં વિભાજિત કરવામાં આવશે, જેથી મોટા સંમેલન, સાંસ્કૃતિક કાર્યક્રમો, નાટકો, નૃત્ય પ્રદર્શન, વ્યવસાયિક બેઠક અને બિઝનેસ ટોક્સ સરળતાથી આયોજિત કરી શકાય.

મ્યુનિસિપલ કમિશનર ડી.એન. મોદી, સિટી ઈજનેર ભાવેશ જાની તેમજ પ્રોજેક્ટ પ્લાનિંગ સાથે સંકળાયેલા અધિકારીઓ રાજીવ જાની અને મનોજ રાઠોડ દ્વારા આ કન્વેન્શન સેન્ટર ઝડપથી પૂર્ણ થાય તે માટે સઘન આયોજન કરવામાં આવી રહ્યું છે. અધિકારીઓના જણાવ્યા અનુસાર, ગ્રાઉન્ડ ફ્લોર પર બેક સ્ટેજ નજીક 50 વીઆઈપી વાહનો માટે પાર્કિંગની વ્યવસ્થા રહેશે. ભોંયરામાં 305 અને 50 સામાન્ય ફોર-વ્હીલર પાર્કિંગ સ્લોટ ઉપલબ્ધ રહેશે, જ્યારે ગ્રાઉન્ડ ફ્લોર પર 430 ટુ-વ્હીલર માટે વિશાળ પાર્કિંગની સુવિધા પૂરી પાડવામાં આવશે.

વધુ ભીડની સ્થિતિમાં અવરજવર સરળ રહે તે માટે બહુવિધ પ્રવેશ અને બહાર નીકળવાના બિંદુઓ નક્કી કરવામાં આવ્યા છે. પ્રદર્શન હોલ અને બિઝનેસ ટોક એરિયા આશરે 902 ચોરસ મીટરમાં ફેલાયેલો રહેશે. ગ્રાઉન્ડ અને ફર્સ્ટ ફ્લોર પર વિશાળ વેઇટિંગ લાઉન્જની વ્યવસ્થા કરવામાં આવશે, જેથી મહેમાનોને આરામદાયક અનુભવ મળી રહે. દિવ્યાંગ વ્યક્તિઓ માટે ખાસ સુવિધાઓ અને દરેક સ્તરે અલગ-અલગ ટોયલેટ બ્લોકની વ્યવસ્થા પણ યોજનામાં સામેલ છે.

આ ઉપરાંત કન્વેન્શન સેન્ટરમાં સમર્પિત વીઆઈપી લાઉન્જ, પુરુષો અને સ્ત્રીઓ માટે અલગ-અલગ ગ્રીન રૂમ, તેમજ અદ્યતન ઓડિયો-વિડિયો રેકોર્ડિંગ રૂમ બનાવવામાં આવશે. પર્યાવરણને ધ્યાનમાં રાખીને આ પરિસરમાં સૌર છત (સોલાર રૂફટોપ), રેન વોટર હાર્વેસ્ટિંગ સિસ્ટમ જેવી સુવિધાઓનો સમાવેશ કરવામાં આવશે. મહેમાનો માટે અલગ વ્યવસ્થા સાથે વિશાળ ફૂડ કોર્ટ પણ બનાવવાની યોજના છે.

કન્વેન્શન સેન્ટર સુધી પહોંચવા માટે 15 મીટર અને 75 મીટર પહોળા રસ્તાઓ પરથી બેવડા પ્રવેશ અને બહાર નીકળવાના માર્ગો વિકસાવવામાં આવશે. મુખ્ય હોલ અને પ્રદર્શન બિઝનેસ ટોક હોલ માટે એચવીએસી (HVAC) સુવિધાઓ, ઉત્તમ ધ્વનિયુક્ત વ્યવસ્થા અને વ્યાપક અગ્નિશામક પ્રણાલીઓ ઉપલબ્ધ રહેશે. સમગ્ર ડિઝાઇનને બહુમુખી અને અદ્યતન રાખવામાં આવી છે, જેથી જામનગર શહેરને રાજ્ય અને રાષ્ટ્રીય સ્તરે એક નવી ઓળખ મળી શકે.

ધનવંતરી હોલ અને જૂના ટાઉનહોલ પછી જામનગરમાં બનતું આ કન્વેન્શન સેન્ટર કદ અને સુવિધાઓની દ્રષ્ટિએ સૌથી મોટું ટાઉનહોલ બનશે. જોકે, મુખ્યમંત્રીએ સ્પષ્ટ રીતે સૂચના આપી છે કે આ પ્રોજેક્ટમાં વધુ ઝડપ લાવવી પડશે, જેથી વિકાસના આ સપનાને વહેલી તકે સાકાર કરી શકાય અને જામનગરના સર્વાંગી વિકાસને નવી ગતિ મળે.