Paschim Gujarat Vij Company Limited (PGVCL) દ્વારા આજે 25 ફેબ્રુઆરીના રોજ સૌરાષ્ટ્ર-કચ્છ વિસ્તારમાં વિશાળ સ્તરે ‘ડીસકનેક્શન ડે’ ઉજવવામાં આવી રહ્યો છે. છેલ્લા બે થી છ માસથી વીજ બિલની ભરપાઈ ન કરનાર ગ્રાહકો સામે કંપનીએ કડક કાર્યવાહી શરૂ કરી છે. કુલ 28.68 લાખ જેટલા ગ્રાહકો પાસેથી આશરે રૂ.652.99 કરોડની વસૂલાત બાકી હોવાનું બહાર આવ્યું છે. આ બાકી રકમ વસૂલવા માટે 2,700 જેટલી ટીમોને મેદાનમાં ઉતારવામાં આવી છે.

રાજકોટ સ્થિત PGVCL દ્વારા સૌરાષ્ટ્ર-કચ્છના 12 સર્કલમાં વિશેષ મેગા ડ્રાઈવનું આયોજન કરવામાં આવ્યું છે. માર્ચ માસ નજીક આવતા કંપનીએ રેસીડેન્સીયલ, ઇન્ડસ્ટ્રીયલ અને ખેતીવાડી ક્ષેત્રે વીજ કનેક્શન ધરાવતા પરંતુ બિલ ન ભરનાર ગ્રાહકોની યાદી તૈયાર કરી છે. ખાસ કરીને છેલ્લા બે થી છ માસથી વીજ બિલ બાકી રાખનારાઓ પર ધ્યાન કેન્દ્રિત કરવામાં આવ્યું છે.

કંપનીના અધિકારીઓના જણાવ્યા મુજબ, આ અભિયાનનો હેતુ માત્ર વસૂલાત કરવો જ નથી, પરંતુ ગ્રાહકોમાં સમયસર બિલ ભરવાની સંસ્કૃતિ વિકસાવવી પણ છે. સામાન્ય રીતે PGVCLની ટીમ જ્યારે કનેક્શન કાપવા જાય ત્યારે ગ્રાહકો સમજાવટ બાદ તરત જ બિલની ભરપાઈ કરી દે છે. પરંતુ ઘણી વાર ગ્રાહકોમાં એવી ટેવ પડી ગઈ છે કે કંપની કડક પગલાં લે ત્યારે જ ચુકવણી કરે છે. આ સ્થિતિમાં સુધારો લાવવા માટે આ ‘ડીસકનેક્શન ડે’નું આયોજન કરવામાં આવ્યું છે.

રાજકોટના મોરબી રોડ સબ ડિવિઝનના ડેપ્યુટી એન્જિનિયર ડી.એન. પટેલે જણાવ્યું હતું કે, 25મી ફેબ્રુઆરીએ જે લોકોએ બિલ ભર્યું નથી, તેમના કનેક્શન કાપીને જ આવવાનું રહેશે. આ દિવસે સ્થળ પર ચુકવણી સ્વીકારવામાં આવશે નહીં. એટલે પહેલા કનેક્શન કપાશે અને પછી જ બાકી રકમ ભર્યા બાદ ફરીથી વીજ પુરવઠો શરૂ કરવામાં આવશે.

રાજકોટ શહેર અને જિલ્લામાં સૌથી વધુ વીજ ગ્રાહકોના બિલ બાકી હોવાનું સામે આવ્યું છે. અહીં ટોપ 3,000 બાકીદાર ગ્રાહકોની અલગ યાદી તૈયાર કરવામાં આવી છે. આ ગ્રાહકોના સ્થળે ખાસ દરોડા પાડી કનેક્શન કાપવાની કાર્યવાહી હાથ ધરાઈ છે.
 

સૌરાષ્ટ્ર-કચ્છના કુલ 12 સર્કલમાં લગભગ 650 કરોડ રૂપિયાનું લેણું બાકી છે. કંપનીના ફાઇનાન્સ વિભાગના જનરલ મેનેજર કિંતુ કુમાર મલકાને જણાવ્યું હતું કે, 28.68 લાખ ગ્રાહકોમાંથી મોટા ભાગે બે થી છ માસનું બિલ બાકી છે. પાલિકાઓ અને આવશ્યક સેવાઓમાં આવતી સંસ્થાઓના બાકી બિલો હોવા છતાં આ ડ્રાઈવમાં તેમનો સમાવેશ કરવામાં આવ્યો નથી, કારણ કે તેઓ જરૂરી જાહેર સેવાઓ પૂરી પાડે છે.

PGVCLની 2,700 જેટલી ટીમો અલગ-અલગ વિસ્તારોમાં તહેનાત કરવામાં આવી છે. દરેક ટીમને ચોક્કસ વિસ્તાર અને બાકીદાર ગ્રાહકોની યાદી સોંપવામાં આવી છે. જરૂર જણાય તો પોલીસની મદદ પણ લેવામાં આવશે. હાલ સુધી મોટા ભાગના વિસ્તારોમાં શાંતિપૂર્ણ રીતે કાર્યવાહી ચાલી રહી છે.

રાજકોટના નવાગામ લાલપરિ વિસ્તારમાં રહેતા હબીબભાઈએ જણાવ્યું હતું કે, તેમણે બે માસથી વીજ બિલ ભર્યું નહોતું. આજે PGVCLની ટીમ આવી અને કનેક્શન કાપી ગઈ. ત્યારબાદ તેમણે રૂ.5,300ની બાકી રકમ ભરી દીધી છે અને હવે ફરીથી કનેક્શન શરૂ થવાની રાહ જોઈ રહ્યા છે.

આ સમગ્ર અભિયાનને લઈને ગ્રાહકોમાં ચેતવણીનો માહોલ જોવા મળી રહ્યો છે. ઘણા લોકો તાત્કાલિક બિલની ચુકવણી કરવા માટે વીજ કચેરીઓ અને ઑનલાઇન પોર્ટલ તરફ વળી રહ્યા છે.

PGVCLનું માનવું છે કે સમયસર વસૂલાત થશે તો વીજ પુરવઠાની ગુણવત્તા સુધારવા અને ઇન્ફ્રાસ્ટ્રક્ચર વિકાસ માટે જરૂરી નાણાં ઉપલબ્ધ થશે. સાથે જ ગ્રાહકોમાં નિયમિત ચુકવણીની ટેવ વિકસશે.

આ રીતે સૌરાષ્ટ્ર-કચ્છ વિસ્તારમાં આજે PGVCL દ્વારા વિશાળ સ્તરે ‘ડીસકનેક્શન ડે’ની કાર્યવાહી હાથ ધરાઈ છે, જેમાં લાખો બાકીદારોના કનેક્શન કાપી 650 કરોડની વસૂલાત કરવાનો પ્રયાસ કરવામાં આવી રહ્યો છે.