અમેરિકાના ઈતિહાસમાં સૌથી લાંબો સરકારી શટડાઉન હવે આખરે સમાપ્ત થયો છે. 43 દિવસ સુધી ફંડના અભાવે અસ્થાયી રીતે ઠપ્પ પડેલી સરકારને હવે રાહત મળી છે, કારણ કે યુ.એસ. હાઉસ ઓફ રિપ્રેઝેન્ટેટિવ્સે સ્પેન્ડિંગ બિલ (ખર્ચ બિલ) પસાર કર્યું છે. આ બિલ 222-209 મતોથી મંજૂર થયું હતું અને હવે અંતિમ મંજૂરી માટે પ્રમુખ ડોનાલ્ડ ટ્રમ્પને મોકલવામાં આવ્યું છે. એકવાર તેમની સહી થયા બાદ ઐતિહાસિક શટડાઉન સત્તાવાર રીતે પૂર્ણ થઈ જશે.

આ બિલ પાસ કરવા માટે રિપબ્લિકન પાર્ટીને વિપક્ષી ડેમોક્રેટ્સનો સાથ લેવાનો પડકાર હતો. અંતે છ ડેમોક્રેટિક સાંસદોએ રિપબ્લિકન પ્રસ્તાવને ટેકો આપતાં તેની તરફેણમાં મતદાન કર્યું. આ સહકારને કારણે ટ્રમ્પ વહીવટીતંત્ર ફરીથી કાર્યરત બની શકે છે.

બંને પક્ષો વચ્ચેની સમજૂતી
ટ્રમ્પ સરકાર અને ડેમોક્રેટ્સ વચ્ચે થયેલી સમજૂતી મુજબ, શટડાઉન દરમિયાન તાત્કાલિક રીતે છૂટા કરાયેલા સરકારી કર્મચારીઓને ફરીથી નોકરી પર રાખવામાં આવશે. ફેડરલ કર્મચારીઓને તેમના બાકી રહેલા પગારની ખાતરી આપવામાં આવી છે. હાલ માટે આ ખર્ચ બિલ જાન્યુઆરી સુધી સરકારને ભંડોળ પૂરું પાડશે.

જો કે, ડેમોક્રેટ્સની એક મુખ્ય માંગણી — આરોગ્ય વીમા સબસિડીમાં વધારો — આ ડીલમાં સામેલ નથી. ડેમોક્રેટિક પાર્ટી આ મુદ્દા પર ડિસેમ્બર મહિનામાં ટેક્સ ક્રેડિટની ચર્ચા દરમિયાન ફરીથી દબાણ લાવશે.

શા માટે થયું શટડાઉન?
અમેરિકામાં શટડાઉન ત્યારે થાય છે જ્યારે કોંગ્રેસ સમયસર સરકારના ખર્ચ માટે જરૂરી ભંડોળ પસાર કરવામાં નિષ્ફળ જાય. આ વખતે પણ પહેલી ઓક્ટોબર સુધી નવું બજેટ પસાર ન થતાં ફેડરલ વિભાગો ફંડ વિના થઈ ગયા હતા. પરિણામે સરકારી કામગીરી બંધ થઈ ગઈ હતી.

હવે કોંગ્રેસે ખર્ચ બિલ પાસ કર્યા બાદ સરકારને અસ્થાયી રાહત મળી છે, પરંતુ જાન્યુઆરીમાં ફરી નવા બજેટ માટે રાજકીય ટકરાવ થવાની શક્યતા છે.

અમેરિકાના નાગરિકો માટે આ રાહતનો શ્વાસ સમાન છે, કારણ કે શટડાઉન દરમિયાન લાખો સરકારી કર્મચારીઓ પર આર્થિક સંકટ આવી પડ્યું હતું. હવે આ બિલ પસાર થતાં સરકારી કામકાજ ફરી ગતિ પકડશે.