મોરબી,

પડતર પ્રશ્નો નહીં ઉકેલાય તો 56 લાખ ખેડૂત પરિવારો સાથે મળીને કિસાન મહાપંચાયત યોજાશે

મોરબી નજીક આવેલા જેતપર સત્યાગ્રહ છાવણી ખાતે વીજપોલ અને અન્ય પડતર પ્રશ્નોને લઈને છેલ્લા પાંચ મહિનાથી શાંતિપૂર્ણ રીતે વિરોધ પ્રદર્શન કરી રહેલા ખેડૂતોએ સરકાર સામે હવે લડત વધુ તેજ કરવાનો નિર્ધાર વ્યક્ત કર્યો છે. સરકાર સાથે 24 મુદ્દાઓ પર મહત્વપૂર્ણ બેઠક યોજાયા છતાં મુખ્ય માંગણીઓ અંગે કોઈ સંતોષકારક ઉકેલ ન આવવાથી ખેડૂત અગ્રણીઓએ સ્પષ્ટ ચેતવણી આપી છે કે જો દિવાળી પહેલા તેમની માંગણીઓ નહીં સંતોષાય, તો દિવાળી પછી રાજ્યભરમાં વિશાળ કિસાન મહાપંચાયત બોલાવીને અભૂતપૂર્વ શક્તિપ્રદર્શન કરવામાં આવશે. આ લડતને વધુ વ્યાપક બનાવવા માટે ગુજરાતભરના 56 લાખ ખેડૂત પરિવારોમાંથી પ્રત્યેક પરિવારના એક સભ્યને જોડીને સરકાર સમક્ષ મજબૂત રજૂઆત કરવામાં આવશે અને પોતાની એકતાની તાકાત દર્શાવવામાં આવશે.