અમદાવાદ,

આતંકવાદીઓ અને સીરિયલ બ્લાસ્ટના દોષિતો સાથે હાઈ-સિક્યોરિટી સેલમાં રખાયો

સઘન સુરક્ષા વ્યવસ્થાના ભાગરૂપે ગેંગસ્ટર લોરેન્સ બિશ્નોઈને સાબરમતી જેલના અગાઉના નાના હાઈ-સિક્યોરિટી ઝોર્સમાંથી ખસેડીને વધુ કડક અને ચુસ્ત સુરક્ષા ધરાવતા ‘દો સૌ ખોલી’ એટલે કે બ્લોક-૨૦૦માં શિફ્ટ કરવામાં આવ્યો છે. સાબરમતી જેલનો આ વિશેષ બ્લોક-૨૦૦ એ મહત્તમ સુરક્ષાવાળો વિસ્તાર છે, 

જ્યાં વર્ષ ૨૦૦૮ના સિરિયલ બ્લાસ્ટ કેસના દોષિતો અને અન્ય અત્યંત ગંભીર ગુનાઓમાં સંડોવાયેલા ખતરનાક કેદીઓને રાખવામાં આવે છે. આ હાઈ-સિક્યોરિટી ઝોનમાં લોરેન્સ બિશ્નોઈના સેલનું માપ આશરે ૭.૫ ગુણ્યા ૧૧ ફૂટ જેટલું છે. આ ફેરફારનો મુખ્ય હેતુ ગેંગસ્ટરનો બહારની દુનિયા સાથેનો સંપર્ક સંપૂર્ણપણે તોડી નાખવાનો અને જેલની અંદરથી તેના ગુનાહિત નેટવર્ક અથવા ગેરકાયદે સિન્ડિકેટનું સંચાલન અટકાવવાનો છે. હાલમાં બહારની દુનિયા સાથે તેનો સંપર્ક માત્ર વીડિયો કોન્ફરન્સિંગ દ્વારા કોર્ટની સુનાવણી પૂરતો જ મર્યાદિત રાખવામાં આવ્યો છે.