ગુજરાતે ફરી એકવાર વૈશ્વિક સ્તરે પોતાની વિકાસ ક્ષમતાનો ડંકો વગાડ્યો છે. ભારત સરકારના આર્થિક સર્વેક્ષણ 2025-26 તથા ઓક્સફોર્ડ ઇકોનોમિક્સના તાજા ડેટા અનુસાર, ગુજરાતના બે મહત્ત્વના શહેરો સુરત અને રાજકોટ વિશ્વના સૌથી ઝડપથી વિકસતા શહેરોની યાદીમાં સામેલ થયા છે. આ સિદ્ધિ માત્ર રાજ્ય માટે નહીં, પરંતુ સમગ્ર દેશ માટે ગૌરવની બાબત બની છે.

ડેટા મુજબ, 2019થી 2035ના ગાળામાં સુરત શહેર 9.17 ટકા વાર્ષિક વૃદ્ધિ દર સાથે સમગ્ર વિશ્વમાં પ્રથમ ક્રમે આવ્યું છે. હીરા ઉદ્યોગ, ટેક્સટાઇલ, MSME સેક્ટર, મજબૂત ઇન્ફ્રાસ્ટ્રક્ચર અને ઝડપી શહેરી વિકાસના કારણે સુરતે વૈશ્વિક શહેરોને પાછળ છોડી દીધા છે. સુરત આજે માત્ર ઔદ્યોગિક શહેર નહીં, પરંતુ સ્માર્ટ અને ભવિષ્યમુખી શહેર તરીકે ઓળખ ઊભી કરી રહ્યું છે.

આ સાથે જ ગુજરાતનું રાજકોટ શહેર પણ 8.33 ટકા વાર્ષિક વૃદ્ધિ દર સાથે વિશ્વના ટોપ-10 ઝડપથી વિકસતા શહેરોમાં સ્થાન મેળવ્યું છે. રંગીલું રાજકોટ ઓટો એન્જિનિયરિંગ, કાસ્ટિંગ, MSME ઉદ્યોગ, વેપાર અને ઉદ્યોગસાહસિકતાનું કેન્દ્ર બનીને ઊભરી આવ્યું છે. સાથે સાથે શિક્ષણ, આરોગ્ય, ઇન્ફ્રાસ્ટ્રક્ચર અને કનેક્ટિવિટીમાં થયેલા વિકાસે રાજકોટને વૈશ્વિક નકશા પર વિશેષ સ્થાન અપાવ્યું છે.

અહેવાલ મુજબ, આવનારા દાયકામાં સુરત અને રાજકોટ વૈશ્વિક રોકાણકારો માટે મુખ્ય “હોટસ્પોટ” (Hotspot) બની રહેશે. ઉદ્યોગ અનુકૂળ નીતિઓ, સરળ વ્યવસાય વાતાવરણ, કુશળ માનવ સંસાધન અને આધુનિક ઇન્ફ્રાસ્ટ્રક્ચર આ શહેરોની સૌથી મોટી તાકાત છે. ખાસ કરીને મેન્યુફેક્ચરિંગ, ટેક્સટાઇલ, ડાયમંડ, IT, લોજિસ્ટિક્સ અને સર્વિસ સેક્ટરમાં મોટા પાયે રોકાણ થવાની શક્યતા વ્યક્ત કરવામાં આવી છે.
 

દેશના સૌથી ઝડપથી વિકસતા ટોપ-10 શહેરોની યાદીમાં પણ ગુજરાતની મજબૂત હાજરી જોવા મળે છે. આ યાદીમાં સુરત પ્રથમ ક્રમે, ત્યારબાદ આગ્રા, બેંગલુરૂ, હૈદરાબાદ, નાગપુર, તિરુપ્પુર, રાજકોટ, તિરુચિરાપલ્લી, ચેન્નાઈ અને વિજયવાડા જેવા શહેરો સામેલ છે. તેમાં સુરત અને રાજકોટનું સ્થાન ગુજરાતની શહેરી વિકાસ નીતિ અને લાંબા ગાળાના આયોજનની સફળતાનું પ્રતિબિંબ છે.

નિષ્ણાતોનું માનવું છે કે રાજ્ય સરકારની ઉદ્યોગમૈત્રી નીતિઓ, ઝડપી નિર્ણય પ્રક્રિયા, ઇઝ ઓફ ડૂઇંગ બિઝનેસ, તેમજ સ્માર્ટ સિટી અને ઇન્ફ્રાસ્ટ્રક્ચર પ્રોજેક્ટ્સના કારણે ગુજરાતના શહેરો વૈશ્વિક સ્તરે સ્પર્ધાત્મક બન્યા છે. આ વિકાસનો સીધો લાભ રોજગારી સર્જન, શહેરી જીવનમાન અને આર્થિક પ્રવૃત્તિઓમાં વધારો રૂપે જોવા મળશે.

કુલ મળીને, સુરત અને રાજકોટની આ વૈશ્વિક સિદ્ધિએ ફરી સાબિત કરી દીધું છે કે ગુજરાત વિકાસ, ઉદ્યોગ અને ભવિષ્યના શહેરોના નિર્માણમાં દેશનું આગવું રાજ્ય છે. આવનારા વર્ષોમાં આ બંને શહેરો માત્ર ભારત નહીં, પરંતુ સમગ્ર વિશ્વ માટે વિકાસના રોલ મોડલ બની રહેશે તે નિશ્ચિત છે.