સૌરાષ્ટ્ર અને કચ્છમાં શિયાળાની કડકડતી ઠંડી હવે લગભગ ગાયબ થઈ ગઈ હોય તેવું વાતાવરણ સર્જાયું છે. સતત ત્રીજા દિવસે આજે પણ સમગ્ર વિસ્તારમાં વાદળીયું વાતાવરણ છવાયેલું રહ્યું હતું અને ઠંડીનો પ્રભાવ નગણ્ય રહ્યો હતો. રાજ્યના તમામ સ્થળોએ લઘુતમ તાપમાન સામાન્ય કરતાં 5.6 ડિગ્રીથી વધુ ઉંચકાયું હોવાનું નોંધાયું છે, જેના કારણે જનજીવનને શિયાળાની કડક ઠંડીમાંથી આંશિક રાહત મળી છે.

રાજકોટ શહેરમાં આજે સવારે 66 ટકા ભેજ સાથે લઘુતમ તાપમાન 17 ડિગ્રી સેલ્સિયસ નોંધાયું હતું. વાદળછાયા વાતાવરણ અને ભેજના કારણે વહેલી સવારે ઠંડકનો અહેસાસ રહ્યો નહોતો. દિવસ દરમિયાન પણ વાતાવરણમાં ઉષ્ણતા અનુભવાઈ હતી.

સૌરાષ્ટ્ર–કચ્છના અન્ય વિસ્તારોમાં પણ તાપમાનમાં નોંધપાત્ર વધારો જોવા મળ્યો છે. પોરબંદરમાં લઘુતમ તાપમાન 16.2 ડિગ્રી, વેરાવળમાં 20.5 ડિગ્રી, અમરેલીમાં 18.6 ડિગ્રી અને ભાવનગરમાં 20 ડિગ્રી સુધી પહોંચ્યું હતું. જામનગરમાં તાપમાનમાં સતત વધારો નોંધાતાં શહેરવાસીઓને હાડ ધ્રુજાવતી ઠંડીમાંથી રાહત મળી છે.

રાજ્યના અન્ય શહેરોની વાત કરીએ તો સુરતમાં લઘુતમ તાપમાન 19.6 ડિગ્રી, અમદાવાદમાં 19.5 ડિગ્રી, વડોદરામાં 20.4 ડિગ્રી, ગાંધીનગરમાં 19.2 ડિગ્રી નોંધાયું હતું. કચ્છ વિસ્તારમાં ભુજમાં 15.6 ડિગ્રી, કંડલામાં 18 ડિગ્રી, નલિયામાં 12.5 ડિગ્રી અને ઓખામાં 19.8 ડિગ્રી લઘુતમ તાપમાન નોંધાયું હતું. દરિયાકાંઠાના વિસ્તારોમાં ભેજનું પ્રમાણ વધુ રહેતાં ઠંડીનો અહેસાસ ઘટતો જોવા મળ્યો હતો.

જામનગર શહેરમાં સપ્તાહના પ્રારંભે જ્યાં કડકડતી ઠંડીનો અનુભવ થયો હતો, ત્યાં છેલ્લા ચાર દિવસથી લઘુતમ તાપમાન ક્રમશઃ વધતું ગયું છે. છેલ્લા 48 કલાકમાં જ પારો અંદાજે દોઢ ડિગ્રી વધીને 16 ડિગ્રી પર સ્થિર થયો છે. સાથે સાથે મહત્તમ તાપમાનમાં પણ વધારો નોંધાતા શિયાળાની કડક ઠંડીમાંથી જનજીવનને મોટી રાહત મળી છે.

કલેક્ટર કંટ્રોલ રૂમમાંથી મળતી માહિતી મુજબ જામનગરમાં લઘુતમ તાપમાન 16 ડિગ્રી અને મહત્તમ તાપમાન 28.5 ડિગ્રી નોંધાયું હતું. શહેરમાં વાતાવરણમાં ભેજનું પ્રમાણ 64 ટકા અને પવનની ગતિ પ્રતિકલાક 4 કિ.મી. રહી હતી. બર્ફીલા પવનનું જોર પણ નોંધપાત્ર રીતે ઘટ્યું હોવાનું હવામાન નિષ્ણાતો જણાવી રહ્યા છે.

ભાવનગરમાં પણ ઠંડીનું પ્રમાણ સતત ઘટતું જઈ રહ્યું છે. આજે સવારે લઘુતમ તાપમાન વધીને 20 ડિગ્રી સુધી પહોંચતાં શિયાળાની ઠંડી જાણે વિદાય લઈ રહી હોય તેવું ચિત્ર સર્જાયું છે. વાતાવરણમાં ભેજનું પ્રમાણ 69 ટકા નોંધાયું હતું, જ્યારે પવનની ઝડપ 12 કિ.મી. પ્રતિકલાક રહી હતી.

હવામાન વિભાગના અનુમાન મુજબ હાલ વેસ્ટર્ન ડિસ્ટર્બન્સની અસર ઘટતાં તથા ભેજયુક્ત પવનના કારણે વાદળીયું વાતાવરણ યથાવત રહેવાની શક્યતા છે. આ સ્થિતિને કારણે આગામી દિવસોમાં પણ લઘુતમ તાપમાન સામાન્ય કરતાં વધુ રહેવાની સંભાવના વ્યક્ત કરવામાં આવી છે. જોકે, રાત્રિના સમયે હળવી ઠંડક અનુભવાઈ શકે છે.

શિયાળાની શરૂઆતમાં કડક ઠંડી, ઠંડા પવન અને ધુમ્મસથી જનજીવન પ્રભાવિત થયું હતું, પરંતુ હવે તાપમાનમાં આવેલા વધારાથી સામાન્ય જનતા, ખાસ કરીને વૃદ્ધો અને બાળકોને આરામદાયક હવામાનનો અનુભવ થઈ રહ્યો છે. બીજી તરફ, ખેડૂતો માટે આ બદલાતું હવામાન ચિંતાજનક પણ બની શકે છે, કારણ કે અચાનક તાપમાન વધવાથી પાક પર અસર થવાની શક્યતા રહે છે.

કુલ મળીને સૌરાષ્ટ્ર–કચ્છમાં હાલ શિયાળાનો તીવ્ર પ્રભાવ ઘટ્યો છે અને વાદળીયાં વાતાવરણ સાથે નરમ ઠંડીનો માહોલ પ્રવર્તી રહ્યો છે. આગામી દિવસોમાં હવામાન કેવો વળાંક લેશે તે અંગે સૌ કોઈની નજર હવામાન વિભાગના નવા અનુમાન પર રહેશે.