રાજકોટ શહેરના જંગલેશ્વર વિસ્તારમાં ગેરકાયદે દબાણ અને ગુનેગારોની મિલ્કતો સામે પોલીસ અને પ્રશાસન દ્વારા મોટી કાર્યવાહી હાથ ધરવામાં આવી છે. ક્રાઈમ બ્રાન્ચ અને સ્થાનિક તંત્રની સંયુક્ત કામગીરી દરમિયાન 11 હિસ્ટ્રીશીટરોના કુલ 8 પાક્કા મકાન, 97 ઓરડીઓ, 2 દુકાનો તેમજ એક પ્લોટ પર કરાયેલ ગેરકાયદે બાંધકામોને જમીનદોસ્ત કરવામાં આવ્યા છે.

આ કાર્યવાહી અંગે માહિતી આપતા રાજકોટ ક્રાઈમના ડીસીપી જગદીશ બાંગરવાએ જણાવ્યું હતું કે, જંગલેશ્વર વિસ્તારમાં લાંબા સમયથી ગુનેગારો દ્વારા ગેરકાયદે બાંધકામો ઉભા કરીને ભાડે આપવાની પ્રવૃત્તિ ચાલી રહી હતી. અનેક હિસ્ટ્રીશીટરો તેમના બાંધેલા ઓરડાઓ ભાડુઆતોને આપી દર મહિને ભાડું વસુલતા હતા. કાયદેસરની મંજૂરી વિના ઉભા કરાયેલા આ બાંધકામો સામે તંત્રએ કડક પગલાં લીધા છે.

ડિમોલેશન દરમિયાન સમીર ઉર્ફે મુરઘો યાસીનભાઈ પઠાણના ત્રણ ઓરડીઓ તોડી પાડવામાં આવી. આ આરોપી સામે ગુજસીટોક સહિત 14 જેટલા ગુનાઓ નોંધાયેલા છે. આશીફ ઉર્ફે ગંધારો સુલેમાન સમા, જેના વિરુદ્ધ 17 જુદા જુદા ગુનાઓ દાખલ છે, તેના એક મકાનને પણ ધરાશાયી કરવામાં આવ્યું.

દિનેશ જીવાભાઈ વાળા નામના હિસ્ટ્રીશીટરની એક ઓરડી તોડી પાડવામાં આવી, જ્યારે રહેમત ઉર્ફે રમા જાવીદ જુણેજા, જે ગાંજા પેડલર તરીકે ઓળખાય છે અને જેના વિરુદ્ધ 12 ગુનાઓ નોંધાયેલા છે, તેના ત્રણ મકાન, 48 ઓરડીઓ અને અંદાજે 3000 સ્ક્વેર ફૂટનો વંડો તોડી પાડવામાં આવ્યો.

સમીર ઉર્ફે સંજલો ઉર્ફે સંજય જુણેજા, જેના વિરુદ્ધ ગુજસીટોક સહિત 12 ગુનાઓ નોંધાયેલા છે, તેની 16 ઓરડીઓ જમીનદોસ્ત કરવામાં આવી. જાવેદ જુસબ જુણેજા, જે ગાંજાના કારોબાર સાથે સંકળાયેલ હોવાનું પોલીસ રેકોર્ડ દર્શાવે છે, તેની 8 ઓરડીઓ પર પણ બુલડોઝર ફેરવાયો.

તોસીફ ઉર્ફે બાઘો અસીમ ઉમરેટીયા, જે પ્રોહિબિશન સહિત 14 ગુનાઓમાં સંડોવાયેલ છે અને બે વખત પાસા હેઠળ કાર્યવાહી થઈ ચૂકી છે, તેના એક મકાન અને 8 ઓરડીઓ તોડી પાડવામાં આવી. અસીમ હાજીભાઈ ઉમરેટીયા, જે બુટલેગર તરીકે ઓળખાય છે, તેના એક મકાન અને 12 ઓરડીઓ પર પણ કાર્યવાહી થઈ.

ઇમરાન ઉર્ફે ટીકડો અસીમ ઉમરેટીયા, જેના વિરુદ્ધ 27 ગુનાઓ નોંધાયેલા છે અને જે બે વખત હદપાર કરવામાં આવ્યો છે, તેના એક મકાન અને એક દુકાનને તોડી પાડવામાં આવ્યા. તનવીર ઉર્ફે તનીયો રફિક શિશાંગિયા, જે પ્રોહિબિશનના 12 ગુનાઓમાં સંડોવાયેલ છે અને એક વખત પાસા હેઠળ કાર્યવાહી થઈ છે, તેના એક મકાન અને એક દુકાનને પણ જમીનદોસ્ત કરવામાં આવ્યા.

 

વિનુ કમાભાઈ સિંઘવ, જે દેશી દારૂના બુટલેગર તરીકે ઓળખાય છે અને જેના વિરુદ્ધ 12 ગુનાઓ નોંધાયેલા છે, તેની એક ઓરડી અને એક દુકાન તોડી પાડવામાં આવી છે.

ડીસીપી બાંગરવાએ જણાવ્યું કે, ગુનાહિત પ્રવૃત્તિઓમાં સંડોવાયેલા તત્વો ગેરકાયદે સંપત્તિ ઉભી કરીને સમાજમાં પોતાનો પ્રભાવ જમાવવાનો પ્રયાસ કરતા હતા. આવી પ્રવૃત્તિઓને કડક સંદેશ આપવા માટે આ કાર્યવાહી હાથ ધરવામાં આવી છે.

ડિમોલેશન દરમિયાન મોટા પ્રમાણમાં પોલીસ બંદોબસ્ત ગોઠવવામાં આવ્યો હતો જેથી કોઈ અનિચ્છનીય બનાવ ન બને. સ્થળ પર સ્થાનિક લોકોની ભીડ પણ એકત્ર થઈ હતી. ઘણા લોકો દ્વારા તંત્રની આ કાર્યવાહીનું સ્વાગત કરવામાં આવ્યું છે, કારણ કે વિસ્તારમાં લાંબા સમયથી ગુનાહિત તત્વોની દહેશત હોવાનું કહેવાય છે.

હાલ તંત્ર દ્વારા અન્ય ગેરકાયદે બાંધકામોની પણ તપાસ ચાલી રહી છે. આગામી દિવસોમાં આવી જ કામગીરી અન્ય વિસ્તારોમાં પણ હાથ ધરવામાં આવી શકે છે. પોલીસનું કહેવું છે કે ગુનાહિત પ્રવૃત્તિઓ અને ગેરકાયદે મિલ્કતો સામે ઝીરો ટોલરન્સની નીતિ અપનાવવામાં આવશે.

જંગલેશ્વરમાં હાથ ધરાયેલી આ મોટી કાર્યવાહી શહેરમાં ચર્ચાનો વિષય બની છે અને ગુનાખોરી સામે કડક વલણનો સંકેત આપે છે.