રાજકોટ,

વહેલી સવારે બસ એક તરફ નમી ગયેલી હાલતમાં જોવા મળતા વાહનચાલકોમાં ફફડાટ, સુરક્ષા વ્યવસ્થા પર સવાલો ઉઠ્યા

રાજકોટ શહેરના વ્યસ્ત ગણાતા ભક્તિનગર સર્કલ પાસે આજે વહેલી સવારે એસ.ટી. નિગમની એક ઇલેક્ટ્રિક બસમાં અચાનક ગંભીર ટેકનિકલ ખામી સર્જાતા તે રસ્તાની વચ્ચે જ થંભી ગઈ હતી. આ બનાવને પગલે ટ્રાફિકની સમસ્યા સર્જાઈ હતી અને વાહનચાલકો ભારે મુશ્કેલીમાં મુકાયા હતા.
*ઝાડની ડાળી બની 'સુરક્ષા કવચ'*

બસમાં ટેકનિકલ ખામી સર્જાતા તેને તાત્કાલિક સ્થળ પરથી ખસેડવી અશક્ય બની હતી. આ પરિસ્થિતિમાં કોઈ ગંભીર અકસ્માત ન સર્જાય તે માટે ડ્રાઈવર કે સ્ટાફ દ્વારા બસની પાછળના ભાગે ચેતવણીરૂપ સંકેત તરીકે ઝાડની ડાળીઓ ટીંગાડવામાં આવી હતી. આધુનિક ઇલેક્ટ્રિક બસમાં આવી રીતે દેશી જુગાડ કરીને ચેતવણી આપવી પડતા આ દ્રશ્ય લોકોમાં ભારે ચર્ચાનો વિષય બન્યું હતું.

આગળની નંબર પ્લેટ ગાયબ હોવાની ચર્ચા, તંત્રની કામગીરી સામે રોષ

સ્થાનિક લોકોના જણાવ્યા અનુસાર, બસ એક બાજુએ નમી ગયેલી (ઝુકેલી) હાલતમાં જોવા મળી હતી, જે તેની ગંભીર ટેકનિકલ ખામી દર્શાવે છે. આ ઉપરાંત, બસના આગળના ભાગે નંબર પ્લેટ પણ ગાયબ હોવાનું સામે આવતા એસ.ટી. નિગમની સુરક્ષા અને વાહનોના રખરખાવ સામે અનેક વેધક સવાલો ઉઠ્યા છે. ઇલેક્ટ્રિક બસ સેવા પર્યાવરણ માટે સારી છે, પરંતુ તેના નિયમિત મેન્ટેનન્સ અને સુરક્ષામાં થઈ રહેલી લાપરવાહીને કારણે મુસાફરોની સુરક્ષા જોખમાઈ રહી હોવાની લાગણી જનતામાં જોવા મળી હતી.

ઘટનાની જાણ થતાં જ એસ.ટી. તંત્રના સંબંધિત કર્મચારીઓ તાત્કાલિક સ્થળ પર પહોંચ્યા હતા અને બસને રિપેર કરવાની કામગીરી શરૂ કરી હતી. સદનસીબે, આ બનાવમાં કોઈ જાનહાનિ કે મોટો અકસ્માત નોંધાયો નથી, પરંતુ આ ઘટનાએ તંત્રની કામગીરી પર મોટો પ્રશ્નાર્થચિહ્ન મૂક્યો છે.