પાલીતાણામાં યોજાનાર પરંપરાગત છ ગાઉ યાત્રા મેળાને ધ્યાનમાં રાખીને Gujarat Police દ્વારા વ્યાપક અને કડક સુરક્ષા બંદોબસ્ત ગોઠવવામાં આવ્યો છે. યાત્રા દરમિયાન કોઈ અનિચ્છનીય બનાવ ન બને અને યાત્રિકોને સુરક્ષિત વાતાવરણ મળી રહે તે માટે આધુનિક ટેક્નોલોજી અને માનવબળ બંનેનો સમન્વય કરવામાં આવ્યો છે.

પાલીતાણા ટાઉન પોલીસ સ્ટેશન અને જિલ્લા પોલીસ તંત્ર દ્વારા સમગ્ર યાત્રા રૂટ પર સતત મોનીટરીંગ રાખવામાં આવશે. ખાસ કરીને ત્રણ ડ્રોન કેમેરાની મદદથી હવાઈ નિરીક્ષણ કરવામાં આવશે, જેથી ભીડ નિયંત્રણ, શંકાસ્પદ હલચલ અને સુરક્ષા પર નજર રાખી શકાય. યાત્રા રૂટ જંગલ વિસ્તારમાંથી પસાર થતો હોવાથી ત્યાં પણ સઘન પેટ્રોલિંગ રાખવામાં આવશે.

મહિલા યાત્રિકોની સુરક્ષા માટે SHE ટીમ તૈનાત કરવામાં આવી છે, જે સમગ્ર મેળા દરમિયાન સતર્ક રહેશે. ચોરી અને સ્નેચિંગ જેવા ગુનાઓ અટકાવવા સર્વેલન્સ સ્ટાફ સાથે ખાનગી ટીમની પણ નિમણૂક કરવામાં આવી છે. આ ટીમો બોડીવોર્ન કેમેરા સાથે પેટ્રોલિંગ કરશે, જેથી દરેક ઘટનાનો રેકોર્ડ ઉપલબ્ધ રહે અને ગુનેગારો સામે તાત્કાલિક કાર્યવાહી શક્ય બને.

સિદ્ધવડ ખાતે અલગથી પોલીસ કંટ્રોલ રૂમ ઉભો કરવામાં આવ્યો છે, જ્યાં અનુભવી પોલીસ અધિકારીઓ દ્વારા સતત મોનીટરીંગ કરવામાં આવશે. કોઈ યાત્રિકનો કિંમતી સામાન ગુમ થાય, બાળક ખોવાઈ જાય અથવા અન્ય કોઈ તાત્કાલિક મદદની જરૂર પડે તો કંટ્રોલ રૂમનો સંપર્ક કરવાની અપીલ કરવામાં આવી છે. યાત્રા સ્થળે પોલીસ સહાયતા કેન્દ્ર પણ કાર્યરત રહેશે.

સુરક્ષા માટે યાત્રા રૂટ પર રીફલેક્ટર જેકેટ, લાઇટ બેટન અને બોડીવોર્ન કેમેરાનો ઉપયોગ કરવામાં આવશે. ઉપરાંત, CCTV, GPS અને ડ્રોન કેમેરાની મદદથી સમગ્ર રૂટનું સઘન નિરીક્ષણ કરવામાં આવશે. આદપુર વિસ્તારમાં આવેલ પાલોનું BDDS (Bomb Detection and Disposal Squad) દ્વારા ચકાસણી કરવામાં આવશે, જેથી કોઈ શંકાસ્પદ વસ્તુ અંગે તાત્કાલિક પગલાં લઈ શકાય.

વન્યજીવોની સંભાવનાને ધ્યાનમાં રાખીને ફોરેસ્ટ ડિપાર્ટમેન્ટના અધિકારીઓ, કર્મચારીઓ અને ટ્રેકર્સ પણ તૈનાત રહેશે. ઘોડેસવાર પેટ્રોલિંગ ટીમો પણ જંગલ વિસ્તારમાં સતત નજર રાખશે. યાત્રિકોને અફવાઓથી દૂર રહેવાની અને કોઈપણ વન્યજીવ દેખાય તો તંત્રનો સંપર્ક કરવાની સૂચના આપવામાં આવી છે. ગભરાટ ફેલાવવો કે કલ્પિત ભય ઊભો કરવો કાયદેસર ગુનો ગણાશે.
 

પોલીસે ખોટી અફવા અથવા વેરિફાઈ કર્યા વગરના મેસેજ સોશિયલ મીડિયા પર વાયરલ કરનાર સામે કડક કાર્યવાહી કરવાની ચેતવણી આપી છે. યાત્રા દરમિયાન શાંતિ જળવાઈ રહે તે માટે કાયદો અને વ્યવસ્થાની પરિસ્થિતિ પર ખાસ નજર રાખવામાં આવશે.

યાત્રિકોના આરોગ્યને ધ્યાનમાં રાખીને મેડિકલ ફેસિલિટી, ડોક્ટર, ઇમરજન્સી ટ્રેચર અને એમ્બ્યુલન્સની વ્યવસ્થા પણ ઉપલબ્ધ રહેશે. કોઈ તબિયત બગડે તો તાત્કાલિક સારવાર મળી રહે તે માટે પ્રશાસન અને પોલીસ દ્વારા સંકલન કરવામાં આવ્યું છે.

ટ્રાફિક વ્યવસ્થાને સરળ બનાવવા માટે યાત્રા રૂટ પર એક માર્ગીય જાહેરનામું જાહેર કરવામાં આવ્યું છે. પાર્કિંગ માટે નિર્ધારિત સ્થળોએ જ વાહન પાર્ક કરવા યાત્રિકોને અપીલ કરવામાં આવી છે. નિયમોનું પાલન ન કરનાર વાહનચાલકો સામે કાયદેસરની કાર્યવાહી કરવામાં આવશે.

પોલીસે યાત્રિકોને ખોટી વેબસાઇટ પરથી ધર્મશાળાનું બુકિંગ ન કરવાની પણ ચેતવણી આપી છે. ઓનલાઈન બુકિંગ કરતી વખતે સત્તાવાર અને વિશ્વસનીય સ્ત્રોતની ખાતરી કરવાની સલાહ આપવામાં આવી છે. જો કોઈ વ્યક્તિ સાયબર ફ્રોડનો ભોગ બને તો તરત જ હેલ્પલાઇન નંબર 1930 પર સંપર્ક કરી ફરિયાદ નોંધાવવા સૂચના આપવામાં આવી છે.

કોઈપણ શંકાસ્પદ પ્રવૃત્તિ અથવા વસ્તુ નજરે પડે તો નજીકમાં ફરજ પર રહેલ પોલીસકર્મીનો સંપર્ક કરવો અથવા પાલીતાણા ટાઉન પોલીસ સ્ટેશનના નંબર 02848-243301 / 6359629021 પર જાણ કરવાની અપીલ કરવામાં આવી છે. સમગ્ર તૈયારીઓ ડીવાયએસપી મિહિર બારૈયા અને તેમની ટીમ દ્વારા સુનિશ્ચિત કરવામાં આવી છે.

છ ગાઉ યાત્રા મેળા દરમિયાન સુરક્ષા, આરોગ્ય, ટ્રાફિક અને કાયદો-વ્યવસ્થાના તમામ પાસાઓને ધ્યાનમાં રાખીને વ્યાપક આયોજન કરવામાં આવ્યું છે. પોલીસ અને પ્રશાસન દ્વારા કરવામાં આવેલા આ કડક બંદોબસ્તને કારણે યાત્રિકો નિર્ભયતાથી અને શ્રદ્ધાભાવથી યાત્રાનો લાભ લઈ શકશે.