રાજકોટ મહાનગરપાલિકા કચેરી ખાતે યોજાયેલી સ્ટેન્ડિંગ કમિટીની મહત્વપૂર્ણ બેઠકમાં શહેરના વિકાસ સાથે જોડાયેલા અનેક મોટા નિર્ણયો લેવામાં આવ્યા છે. બેઠકમાં કુલ 67 દરખાસ્તો એજન્ડા પર હતી, જેમાં પ્રદ્યુમ્ન પાર્ક ઝૂની એન્ટ્રી ફીમાં 50 થી 75 ટકા સુધીનો વધારો કરવાની દરખાસ્ત સૌથી વધુ ચર્ચામાં રહી. જોકે શાસક પક્ષે આ પ્રસ્તાવ ફગાવી દીધો અને જૂના દર યથાવત રાખવાનો નિર્ણય કર્યો છે.

સ્ટેન્ડિંગ કમિટીના ચેરમેન જયમીન ઠાકરએ જણાવ્યું હતું કે પ્રદ્યુમ્ન પાર્ક ઝૂ રાજકોટ તેમજ સમગ્ર સૌરાષ્ટ્ર માટે આકર્ષણનું કેન્દ્ર છે. દર વર્ષે વેકેશન અને તહેવારો દરમિયાન લાખો લોકો અહીં મુલાકાત લે છે. હાલની પરિસ્થિતિમાં નાગરિકો પર વધારાનો આર્થિક બોજ ન આવે તે માટે ભાવવધારો ન કરવાનો નિર્ણય લેવાયો છે.
 

ઝૂની આવક અને પ્રસ્તાવિત વધારો

મ્યુનિસિપલ કમિશનર દ્વારા રજૂ કરાયેલી નોંધ મુજબ ઝૂમાં પ્રાણીઓ અને પાંજરાઓની સંખ્યા વધતા જાળવણી ખર્ચમાં વધારો થયો છે. વર્ષ 2024-25 દરમિયાન 5.77 લાખ પ્રવાસીઓએ મુલાકાત લીધી હતી, જેના થકી આશરે ₹1.45 કરોડની આવક થઈ હતી. ચાલુ નાણાકીય વર્ષમાં ડિસેમ્બર 2025 સુધી 5.08 લાખ મુલાકાતીઓથી ₹1.24 કરોડની આવક નોંધાઈ છે. અન્ય શહેરોની સરખામણીએ રાજકોટની ઝૂ ફી ઓછી હોવાનું દર્શાવી વધારો સૂચવાયો હતો.

પ્રસ્તાવ મુજબ બાળકોની ફી ₹10થી વધારી ₹20, 12 વર્ષથી ઉપર માટે ₹20થી ₹50, સિનિયર સિટિઝન માટે ₹10થી ₹20 અને વિદેશી નાગરિકો માટે ₹100થી ₹300 કરવાનો સૂચન હતું. જોકે ચૂંટણી નજીક હોવાના સંદર્ભમાં શાસકોએ આ વધારો રદ કર્યો છે.
 

લાયન સફારી પાર્કની ફી બાદમાં નક્કી થશે

શહેરમાં 30 હેક્ટરમાં વિકસતા લાયન સફારી પાર્ક માટે પણ પ્રાથમિક દરખાસ્ત રજૂ થઈ હતી. તેમાં સામાન્ય પ્રવાસી માટે ₹100, વિદ્યાર્થી પ્રવાસ માટે ₹50, વિદેશી નાગરિકો માટે ₹600 અને ઝૂ-સફારી કોમ્બો ટિકિટ માટે ₹130 (સ્થાનિક) તથા ₹800 (વિદેશી) સૂચવાયા હતા. દિવ્યાંગો માટે નિઃશુલ્ક પ્રવેશની ભલામણ હતી.

પરંતુ સ્ટેન્ડિંગ કમિટીએ નિર્ણય કર્યો કે પાર્ક સંપૂર્ણ તૈયાર થયા બાદ જ ફી નક્કી કરવામાં આવશે. હાલ આ મુદ્દો મુલતવી રાખવામાં આવ્યો છે.
 

પેડક રોડ બનશે ગૌરવપથ

વોર્ડ નં. 5માં આવેલ પેડક રોડને અમદાવાદના સી.જી. રોડ જેવી આધુનિક ઓળખ આપવા માટે ₹37.14 કરોડના એસ્ટીમેટ સાથે દરખાસ્ત મંજૂર થઈ છે. જીએસટી સહિત કુલ ₹43.83 કરોડના ખર્ચે આ પ્રોજેક્ટ અમલમાં મુકવામાં આવશે. બંને બાજુ પહોળા કેરેજ-વે, ફૂટપાથ, પેવર બ્લોક, ગઝેબો, ડેકોરેટિવ બેન્ચીસ, બસ સ્ટોપ અને અન્ડરગ્રાઉન્ડ યુટિલિટી જેવી સુવિધાઓ ઉભી કરવામાં આવશે.

વોર્ડ નં. 18માં રાજકમલ ફાટકથી હાઈવે સુધીના માર્ગને પણ ડિઝાઇન રોડ તરીકે વિકસાવવા ₹1.10 કરોડ મંજૂર થયા છે.
 

₹175 કરોડથી વધુના વિકાસકામો

બેઠકમાં કુલ ₹175.60 કરોડના વિવિધ વિકાસકામોને લીલીઝંડી આપવામાં આવી છે. તેમાં ડીઆઈ અને એમએસ પાઈપલાઈન નાખવાની કામગીરી, કનકનગર શાક માર્કેટ અને મહારાણા પ્રતાપ હોલનું આધુનિકરણ, અવધ રોડ પર નવો ગાર્ડન, બેડીપરા પાસે આજી નદી પર નવું બેઠું નાળું બનાવવા જેવી યોજનાઓનો સમાવેશ થાય છે.
 

પ્રથમવાર AC એમ્બ્યુલન્સ ખરીદી

રાજકોટ મહાનગરપાલિકા દ્વારા પ્રથમવાર ફાયર બ્રિગેડ વિભાગ માટે 5 એસી અને 6 નોન-એસી એમ્બ્યુલન્સ ખરીદવાનો નિર્ણય લેવાયો છે. કુલ ₹1.85 કરોડના ખર્ચે 11 વાહનો ખરીદાશે. અત્યાર સુધી માત્ર નોન-એસી એમ્બ્યુલન્સ ઉપલબ્ધ હતી, તેથી આ નિર્ણયને માનવતાવાદી પગલું ગણાવવામાં આવી રહ્યું છે.
 

પ્લોટ હરાજી મુદ્દો પેન્ડિંગ

તાજેતરમાં અમીન માર્ગ પર 4669 ચો.મી.ના પ્લોટની ₹106.26 કરોડમાં હરાજી થઈ હતી. કાનૂની પ્રશ્નો ઊભા થતાં આ નીતિ વિષયક દરખાસ્ત હાલ પેન્ડિંગ રાખવામાં આવી છે. આગામી બેઠકમાં અંતિમ નિર્ણય લેવાશે.

ઉલ્લેખનીય છે કે મહાનગરપાલિકાની ચૂંટણીઓ નજીક હોવાથી વિકાસકામોને મંજૂરી આપવાની ગતિ તેજ થઈ છે. હવે આ નિર્ણયોનો ચૂંટણીમાં શું અસર પડશે તે સમય જ નક્કી કરશે.