હોળી અને ધૂળેટીના રંગોત્સવને ધ્યાનમાં રાખીને ગુજરાત રાજ્ય માર્ગ પરિવહન નિગમ દ્વારા રાજ્યવ્યાપી વિશેષ પરિવહન વ્યવસ્થા ગોઠવવામાં આવી છે. તહેવારો દરમિયાન પોતાના વતન પરત ફરતા તેમજ ધાર્મિક સ્થળોની મુલાકાત લેતા મુસાફરોની વધતી સંખ્યાને ધ્યાનમાં રાખીને નિગમ દ્વારા 27 ફેબ્રુઆરીથી 5 માર્ચ 2026 સુધી 1300 જેટલી વધારાની બસો દોડાવવાનો અને કુલ 7500 વધારાની ટ્રિપ્સનું આયોજન કરવાનો નિર્ણય લેવાયો છે.

નિગમના જણાવ્યા મુજબ, હોળી-ધૂળેટીના દિવસોમાં રાજ્યના મોટા શહેરોમાંથી ગ્રામ્ય વિસ્તારો તરફ મુસાફરોની સંખ્યા ખૂબ વધે છે. ખાસ કરીને અમદાવાદ, રાજકોટ, અમરેલી, જૂનાગઢ, ભાવનગર અને ભુજ જેવા શહેરોમાંથી દાહોદ, ગોધરા, ઝાલોદ અને છોટા ઉદેપુર તરફ જતી બસોમાં ભારે ભીડ રહેતી હોય છે. આ પરિસ્થિતિમાં મુસાફરોને સરળ અને સમયસર સેવા મળી રહે તે માટે વિશેષ આયોજન હાથ ધરવામાં આવ્યું છે.

આ વર્ષે અંદાજે 1300 વધારાની બસો રાજ્યના વિવિધ રૂટ પર દોડાવવામાં આવશે. સાથે જ કુલ 7500 જેટલી વધારાની ટ્રિપ્સ ગોઠવવામાં આવી છે. નિગમના અધિકારીઓએ જણાવ્યું છે કે મુસાફરોની માંગ અને બુકિંગની સ્થિતિ મુજબ જરૂરી હોય ત્યાં વધુ ટ્રિપ્સ ઉમેરવાની તૈયારી પણ રાખવામાં આવી છે. દરેક મુખ્ય ડેપો પર કંટ્રોલ રૂમ દ્વારા સતત મોનિટરિંગ કરવામાં આવશે, જેથી કોઈ અનિચ્છનીય પરિસ્થિતિ ઊભી થાય તો તાત્કાલિક વ્યવસ્થા કરી શકાય.

ધાર્મિક સ્થળોને ધ્યાનમાં રાખીને પણ વિશેષ વ્યવસ્થા કરવામાં આવી છે. હોળી-ધૂળેટીના અવસરે મોટી સંખ્યામાં શ્રદ્ધાળુઓ ડાકોર મંદિર અને દ્વારકા મંદિર જેવા પવિત્ર ધામોની મુલાકાત લે છે. આ માટે નિગમ દ્વારા આશરે 450 જેટલી બસો મારફતે લગભગ 3500 ટ્રિપ્સનું આયોજન કરવામાં આવ્યું છે. આ સેવાઓથી શ્રદ્ધાળુઓને સરળતાથી દર્શન માટે પહોંચી શકાય તેમજ તહેવારો દરમિયાન ખાનગી વાહનોના ભારને કારણે સર્જાતી ટ્રાફિક સમસ્યામાં પણ રાહત મળશે.
 

હોળી અને ધૂળેટીના દિવસોમાં ખાસ કરીને દાહોદ, પંચમહાલ, સંતરામપુર અને છોટા ઉદેપુર જેવા વિસ્તારોમાં પોતાના ગામડે જવા માટે મોટી સંખ્યામાં લોકો મુસાફરી કરે છે. રાજ્યના વિવિધ જિલ્લાઓમાં નોકરી કે વ્યવસાય કરતા લોકો તહેવારો ઉજવવા પોતાના વતન પરત ફરતા હોવાથી પરિવહન પર ભારે દબાણ સર્જાય છે. આ સ્થિતિને પહોંચી વળવા માટે GSRTC દ્વારા આગોતરા આયોજન કરીને મુસાફરોને આરામદાયક અને સલામત સેવા આપવા પ્રયત્ન કરવામાં આવ્યો છે.

નિગમના PRO શ્રદ્ધાબેનએ જણાવ્યું હતું કે રાજ્ય સરકારના માર્ગદર્શન હેઠળ મુસાફરોને સુવ્યવસ્થિત અને વિશ્વસનીય સેવા પૂરી પાડવી નિગમની પ્રથમ પ્રાથમિકતા છે. તહેવારો દરમિયાન બસ સ્ટેશન પર વધતી ભીડને સંભાળવા માટે વધારાનો સ્ટાફ પણ મુકવામાં આવશે. ડ્રાઈવર અને કંડક્ટર માટે વિશેષ સૂચનાઓ આપવામાં આવી છે, જેથી સમયપાબંદી અને સુરક્ષા બંનેનું પાલન થઈ શકે.

મુસાફરોની સુવિધા માટે ઓનલાઇન બુકિંગ વ્યવસ્થા પણ સક્રિય રાખવામાં આવી છે. યાત્રીઓ GSRTCની સત્તાવાર વેબસાઇટ www.gsrtc.in અથવા મોબાઈલ એપ્લિકેશન દ્વારા એડવાન્સ તેમજ કરંટ બુકિંગ કરી શકે છે. સાથે જ સ્થાનિક ડેપો પરથી પણ ટિકિટ બુકિંગની સુવિધા ઉપલબ્ધ રહેશે. નિગમ દ્વારા મુસાફરોને આગોતરા બુકિંગ કરવાની અપીલ કરવામાં આવી છે, જેથી છેલ્લી ઘડીએ ભીડ અને અવ્યવસ્થા ટાળી શકાય.

આ સમગ્ર વિશેષ સેવા 27 ફેબ્રુઆરીથી 5 માર્ચ સુધી અમલમાં રહેશે. નિગમના જણાવ્યા અનુસાર, જો મુસાફરોની સંખ્યા અપેક્ષા કરતાં વધુ રહેશે તો વધારાની બસો અને ટ્રિપ્સ ઉમેરવામાં આવશે.

આ રીતે GSRTC દ્વારા ગોઠવાયેલી વિશેષ પરિવહન વ્યવસ્થા હજારો મુસાફરો માટે રાહતરૂપ સાબિત થશે. હોળી-ધૂળેટીના રંગોત્સવ દરમિયાન રાજ્યના નાગરિકો પોતાના પરિવાર સાથે આનંદથી તહેવાર ઉજવી શકે અને સુરક્ષિત રીતે પ્રવાસ કરી શકે તે માટે નિગમ સજ્જ હોવાનું સ્પષ્ટ થાય છે.