ગુજરાતમાં ફેબ્રુઆરીના અંતિમ સપ્તાહમાં હવામાનનો અનોખો મિજાજ જોવા મળી રહ્યો છે. શિયાળાની વિદાય અને ઉનાળાની શરૂઆત વચ્ચે અચાનક મેઘરાજાની એન્ટ્રી થતા રાજ્યમાં ત્રણ ઋતુનો અનુભવ થઈ રહ્યો છે. 23 ફેબ્રુઆરીએ અમદાવાદ, ભરૂચ અને અમરેલી સહિતના વિસ્તારોમાં કમોસમી વરસાદ વરસ્યા બાદ આજે 24 ફેબ્રુઆરીએ પણ હવામાન વિભાગે રાજ્યના 6 જિલ્લાઓ માટે યલો એલર્ટ જાહેર કર્યું છે.

સુરેન્દ્રનગર જિલ્લાના લખતર તાલુકામાં ગત મોડીરાત્રે વરસાદી ઝાપટાં પડતાં વાતાવરણમાં ઠંડક ફરી વળી હતી. લખતર ઉપરાંત કડુ, ઓળક, માલિકા, તરમણીયા અને કળમ સહિતના ગ્રામ્ય વિસ્તારોમાં પણ સામાન્ય વરસાદ નોંધાયો હતો. અચાનક પડેલા આ માવઠાએ ખેડૂતો અને નાગરિકોમાં ચિંતા વધારી છે.
 

6 જિલ્લામાં યલો એલર્ટ

હવામાન વિભાગે આગામી 24 કલાક દરમિયાન ઉત્તર અને પૂર્વ ગુજરાતના કેટલાક વિસ્તારોમાં હળવા વરસાદ અને તેજ પવનની શક્યતા વ્યક્ત કરી છે. સાવચેતીના ભાગરૂપે સાબરકાંઠા, અરવલ્લી, મહીસાગર, છોટા ઉદેપુર, દાહોદ અને પંચમહાલ જિલ્લામાં યલો એલર્ટ જાહેર કરવામાં આવ્યો છે.

હવામાન નિષ્ણાતોના જણાવ્યા અનુસાર, કેટલાક વિસ્તારોમાં પવનની ઝડપ વધીને વાવાઝોડા જેવી પરિસ્થિતિ સર્જાઈ શકે છે. ઉત્તર ગુજરાતના બનાસકાંઠા, સાબરકાંઠા અને અરવલ્લીમાં માવઠાની શક્યતા છે. દક્ષિણ ગુજરાતમાં ભરૂચ, તાપી, સુરત અને નર્મદા જિલ્લામાં પણ પવન સાથે હળવા ઝાપટાં વરસી શકે છે.

સૌરાષ્ટ્ર-કચ્છ વિસ્તારમાં પણ કમોસમી વરસાદની પૂરી શક્યતા વ્યક્ત કરવામાં આવી છે. ખાસ કરીને અમરેલી સહિતના કેટલાક વિસ્તારોમાં હળવા વરસાદી ઝાપટાં પડી શકે છે.
 

અમદાવાદમાં વાદળછાયું વાતાવરણ

અમદાવાદ શહેરમાં સોમવારે દિવસભર વાદળછાયું વાતાવરણ રહ્યું હતું. દિવસ દરમિયાન સિંધુ ભવન રોડ, એસ.જી. હાઈવે, ગોતા અને ચાંદલોડિયા વિસ્તારમાં ઝાપટાં પડ્યા હતા. રાત્રિના સમયે પ્રહલાદનગર, સરખેજ અને શિવરંજની સહિતના વિસ્તારોમાં વરસાદી માહોલ જામ્યો હતો.

આજે વહેલી સવારથી જ શહેરમાં ઠંડા પવન સાથે ભારે ભેજને કારણે ધુમ્મસભર્યું વાતાવરણ જોવા મળ્યું હતું. વિઝિબિલિટી ઘટતાં વાહનચાલકોને મુશ્કેલી પડી હતી. સવારે ઓફિસ સમય દરમિયાન ટ્રાફિક ધીમો રહ્યો હતો.
 

24 ફેબ્રુઆરી બાદ વાતાવરણમાં ફેરફાર

હવામાન વિભાગના અનુમાન મુજબ 24 ફેબ્રુઆરી પછી રાજ્યમાં વાતાવરણ મુખ્યત્વે શુષ્ક રહેવાની શક્યતા છે. જોકે તાપમાનમાં વધઘટ યથાવત રહેશે. બપોર દરમિયાન મહત્તમ તાપમાન 34 ડિગ્રી સુધી પહોંચી શકે છે, જ્યારે લઘુત્તમ તાપમાન 18થી 20 ડિગ્રી વચ્ચે રહેશે.

આગામી દિવસોમાં લઘુત્તમ તાપમાનમાં 2થી 3 ડિગ્રીનો ઘટાડો થવાની શક્યતા હોવાથી રાત્રિના સમયે ઠંડીનું જોર થોડું વધી શકે છે. આ કારણે ફરી એકવાર શિયાળાનો હળવો અહેસાસ થઈ શકે છે.
 

ખેડૂતોમાં ચિંતા

ફેબ્રુઆરી મહિનામાં એકસાથે ઠંડી, ગરમી અને વરસાદનો અનુભવ થતા ખેડૂતોમાં ચિંતા વ્યાપી છે. હાલ રવિ પાકની કાપણીનો સમય ચાલી રહ્યો છે. આવા સમયે પડેલા માવઠાથી ઘઉં, જીરું અને રાયડો જેવા પાકને નુકસાન થવાની ભીતિ વ્યક્ત કરવામાં આવી રહી છે.

ખાસ કરીને જીરું પાક માટે આ પ્રકારનું ભેજવાળું વાતાવરણ નુકસાનકારક સાબિત થઈ શકે છે. જો આગામી દિવસોમાં ફરી વરસાદ વરસે તો ઉત્પાદન પર અસર થવાની શક્યતા છે. ખેડૂતો હવામાન સુધરે તેવી આશા રાખી રહ્યા છે.
 

જનજીવન પર અસર

અચાનક બદલાતા હવામાનને કારણે સામાન્ય જનજીવન પણ પ્રભાવિત થયું છે. એક તરફ બપોરે ગરમીનો અહેસાસ થાય છે, તો બીજી તરફ સવારે અને રાત્રે ઠંડા પવન સાથે ઠંડી અનુભવાય છે. વરસાદી ઝાપટાંને કારણે રસ્તાઓ ભીના થતા વાહનચાલકોને સાવચેતી રાખવાની જરૂર છે.

હવામાન વિભાગે નાગરિકોને અનાવશ્યક બહાર ન નીકળવા, પવન અને વરસાદ દરમિયાન સુરક્ષા જાળવવા તથા ખેડૂતોને પાક સુરક્ષિત રાખવા જરૂરી પગલાં લેવા સૂચન કર્યું છે.

સમગ્ર રીતે જોવામાં આવે તો ફેબ્રુઆરીના અંતિમ દિવસોમાં કુદરતનો આ બદલાતો મિજાજ રાજ્ય માટે ચિંતાજનક બન્યો છે. આગામી દિવસોમાં હવામાન સ્થિર થાય તેવી સૌ કોઈ અપેક્ષા રાખી રહ્યા છે.