બોલિવૂડ અને મનોરંજન જગતમાંથી એક દુઃખદ સમાચાર સામે આવ્યા છે. અભિનેત્રી દિવ્યા વિનકરનું આશરે 40 વર્ષની વયે અચાનક નિધન થયું છે. તેમના અવસાનના સમાચારથી મિત્રો, સાથી કલાકારો અને ચાહકોમાં શોકની લાગણી ફેલાઈ છે. દિવ્યાએ આલિયા ભટ્ટ અભિનીત ફિલ્મ ‘ડાર્લિંગ્સ’માં મહિલા કોન્સ્ટેબલની ભૂમિકા ભજવીને ખાસ ઓળખ મેળવી હતી. તેમના અચાનક અવસાનથી મનોરંજન જગતના લોકો પણ સ્તબ્ધ થઈ ગયા છે.
 

મિત્રએ સોશિયલ મીડિયા પર આપી જાણકારી

દિવ્યા વિનકરના નિધનના સમાચાર તેમની નજીકની મિત્ર અને રેડિયો જોકી (RJ) રોહિણી રામનાથને સોશિયલ મીડિયા પર શેર કર્યા હતા. 20 ઓક્ટોબરે ઇન્સ્ટાગ્રામ પર કરેલી ભાવુક પોસ્ટમાં તેમણે દિવ્યાના અચાનક અવસાન અંગે જાણકારી આપી હતી. રોહિણીએ દિવ્યાને પ્રેમથી ‘DV’ કહીને યાદ કરી હતી અને જણાવ્યું હતું કે દિવ્યા તેમના વ્યક્તિગત જીવનની સાથે વ્યાવસાયિક સફરમાં પણ મહત્ત્વનો સહારો હતી.

તેમણે દિવ્યાના દયાળુ સ્વભાવ, કામ પ્રત્યેના સમર્પણ અને સમજણભર્યા વ્યક્તિત્વને યાદ કરીને દુઃખ વ્યક્ત કર્યું હતું. સાથે જ દિવ્યાના પરિવારને આ મુશ્કેલ સમયમાં જરૂરી પ્રાઈવસી આપવા માટે પણ અપીલ કરી હતી.
 

‘ડાર્લિંગ્સ’ અને ‘જલસા’માં કર્યું હતું કામ

દિવ્યા વિનકરને વર્ષ 2022માં રિલીઝ થયેલી નેટફ્લિક્સ ફિલ્મ ‘ડાર્લિંગ્સ’માં મહિલા કોન્સ્ટેબલની ભૂમિકા માટે ઓળખ મળી હતી. આ ફિલ્મમાં આલિયા ભટ્ટ, શેફાલી શાહ, વિજય વર્મા અને રોશન મેથ્યુ જેવા કલાકારોએ અભિનય કર્યો હતો. આ ઉપરાંત દિવ્યા વિદ્યા બાલન અને શેફાલી શાહ અભિનીત ફિલ્મ ‘જલસા’ સાથે પણ જોડાયેલી હતી.
 

ડિજિટલ માર્કેટિંગથી અભિનય સુધીની સફર

દિવ્યા માત્ર અભિનેત્રી જ નહોતી, પરંતુ ડિજિટલ કન્ટેન્ટ ક્રિએટર, ફ્રીલાન્સ લેખિકા અને કવયિત્રી તરીકે પણ સક્રિય હતી. અભિનય ક્ષેત્રમાં પ્રવેશતાં પહેલાં તેમણે આશરે એક દાયકા સુધી ડિજિટલ માર્કેટિંગમાં કામ કર્યું હતું. વર્ષ 2018માં તેમણે પર્ફોર્મિંગ આર્ટ્સ ક્ષેત્રે પોતાની સફર શરૂ કરી હતી.

હાલમાં દિવ્યા વિનકરના નિધનનું ચોક્કસ કારણ સત્તાવાર રીતે જાહેર થયું નથી. તેમના અચાનક અવસાનથી તેમના ચાહકો અને નજીકના લોકોમાં દુઃખની લાગણી વ્યાપી છે.