નવી દિલ્હી,

નવી દિલ્હીના 'ભારત મંડપમ' ખાતે આજથી 18મી BRICS સમિટનો ભવ્ય અને સત્તાવાર પ્રારંભ થયો છે. વૈશ્વિક સ્તરે ભારતની વધતી તાકાત અને કૂટનીતિક પ્રભુત્વનું પ્રદર્શન કરતી આ સમિટમાં દુનિયાભરના દિગ્ગજ નેતાઓ એકત્રિત થયા છે. પ્રથમ દિવસથી જ રાજધાનીમાં ઉચ્ચસ્તરીય બેઠકો અને વિવિધ કાર્યક્રમોનો દોર શરૂ થઈ ગયો છે, જે સમગ્ર વિશ્વનું ધ્યાન ખેંચી રહ્યો છે.

દિલ્હીમાં યોજાઈ રહેલી આ મહત્ત્વપૂર્ણ સમિટમાં જોડાવા માટે ચીનના રાષ્ટ્રપતિ શી જિનપિંગ આજે બપોરે દિલ્હી પહોંચ્યા છે. દિલ્હી પહોંચ્યા બાદ ચીનના વિદેશ મંત્રાલય દ્વારા ટ્વિટ કરીને ખુશી વ્યક્ત કરવામાં આવી છે. આ મુલાકાત બંને દેશો વચ્ચેના રાજદ્વારી સંબંધો અને વૈશ્વિક સહયોગની દૃષ્ટિએ અત્યંત મહત્ત્વપૂર્ણ માનવામાં આવી રહી છે. બ્રિક્સ સમિટ દરમિયાન વડાપ્રધાન નરેન્દ્ર મોદી ચીનના રાષ્ટ્રપતિ શી જિનપિંગ તેમજ રશિયાના રાષ્ટ્રપતિ વ્લાદિમીર પુતિન અને ઈરાનના રાષ્ટ્રપતિ મસૂદ પેઝેશ્કિયન સહિતના અન્ય રાષ્ટ્રાધ્યક્ષો સાથે મહત્ત્વપૂર્ણ દ્વિપક્ષીય બેઠકો યોજવાના છે. આ બેઠકોમાં વેપાર, આર્થિક સહયોગ અને વૈશ્વિક મુદ્દાઓ પર વ્યાપક ચર્ચા થવાની સંભાવના છે.

સમિટના પ્રથમ દિવસે વડાપ્રધાન નરેન્દ્ર મોદી વિવિધ દેશોના રાષ્ટ્રાધ્યક્ષો સાથે મહત્ત્વપૂર્ણ દ્વિપક્ષીય બેઠકો યોજી રહ્યા છે. જેમાં ખાસ કરીને આજે સાંજે 5:45 વાગ્યે ચીનના રાષ્ટ્રપતિ શી જિનપિંગ સાથે યોજાનારી દ્વિપક્ષીય બેઠક પર આખી દુનિયાની નજર ટકેલી છે. બંને દેશો વચ્ચેના દ્વિપક્ષીય સંબંધોને લઈને મોટા રાજકીય સંકેતો મળવાની શક્યતા છે. અગાઉ પીએમ મોદીએ રશિયાના રાષ્ટ્રપતિ વ્લાદિમીર પુતિન અને ઈરાનના રાષ્ટ્રપતિ મસૂદ પેઝેશ્કિયન સહિતના ટોચના નેતાઓ સાથે પણ મુલાકાત કરી હતી.

'ભારત ઇનોવેટ્સ' પ્રદર્શન અને વિશેષ સાંસ્કૃતિક આયોજનો

આજની સમિટ દરમિયાન માત્ર બેઠકો જ નહીં, પરંતુ ભારતની વૈજ્ઞાનિક અને તકનીકી પ્રગતિ દર્શાવતું 'ભારત ઈનોવેટ્સ' પ્રદર્શન પણ મુખ્ય આકર્ષણનું કેન્દ્ર બનશે. આ ઉપરાંત તમામ સભ્ય દેશોના નેતાઓનું સામૂહિક ફોટો સેશન, સંયુક્ત વૃક્ષારોપણ સમારોહ અને વિશ્વના દિગ્ગજોના માનસન્માનમાં ભવ્ય રાત્રિભોજન સહિતના વિશેષ કાર્યક્રમોનું આયોજન કરવામાં આવ્યું છે. સમિટને લઈને દિલ્હીમાં કડક સુરક્ષા વ્યવસ્થા ગોઠવવામાં આવી છે.