અમદાવાદ,

મોરબી, રાજકોટ, બોટાદ, જામનગર, દ્વારકા, પોરબંદર, જુનાગઢ, ગીર સોમનાથ, ભરૂચ, સુરત અને તાપીમાં યલો એલર્ટ 

ગુજરાતમાં ફરી વરસાદી માહોલ સક્રિય થવાની આગાહી છે. લો પ્રેશર, સાયક્લોનિક સર્ક્યુલેશન અને મોન્સૂન ટ્રફની અસરને કારણે આગામી દિવસોમાં રાજ્યના અનેક વિસ્તારોમાં વરસાદ પડી શકે છે..હવામાન વિભાગે 12થી 17 સપ્ટેમ્બર સુધી ગુજરાતમાં હળવાથી સામાન્ય વરસાદની આગાહી કરી છે. જોકે 12થી 15 સપ્ટેમ્બર દરમિયાન કેટલાક વિસ્તારોમાં ભારે વરસાદની શક્યતા છે. IMDના 11 સપ્ટેમ્બરના બુલેટિન મુજબ ગુજરાત રિજનમાં 12 સપ્ટેમ્બરે ભારે અને 13-14 સપ્ટેમ્બરે અતિભારે વરસાદની ચેતવણી છે.

12 સપ્ટેમ્બરે વલસાડ, નવસારી, ડાંગ, સુરત, તાપી, ભરૂચ, નર્મદા, વડોદરા, છોટાઉદેપુર અને આણંદ જિલ્લામાં છૂટાછવાયા સ્થળોએ ભારે વરસાદની આગાહી છે. દક્ષિણ ગુજરાતના જિલ્લાઓમાં વરસાદની અસર વધુ જોવા મળી શકે છે. IMDએ આ દિવસે ગુજરાત રિજન માટે ભારે વરસાદની ચેતવણી જાહેર કરી છે.

13 સપ્ટેમ્બરે વરસાદનું જોર વધવાની શક્યતા છે. સુરત, તાપી, નવસારી, ડાંગ અને વલસાડમાં ઓરેન્જ એલર્ટ સાથે છૂટાછવાયા સ્થળોએ અતિભારે વરસાદની આગાહી કરવામાં આવી છે. આ ઉપરાંત પોરબંદર, જુનાગઢ, ગીર સોમનાથ, અમરેલી, રાજકોટ, બોટાદ, ભાવનગર, અમદાવાદ, આણંદ, પંચમહાલ અને દાહોદ સહિતના વિસ્તારોમાં યલો એલર્ટ સાથે ભારે વરસાદની શક્યતા છે. IMD મુજબ 13 સપ્ટેમ્બરે ગુજરાત રિજનમાં અતિભારે વરસાદની ચેતવણી છે.

14 સપ્ટેમ્બરે અમરેલી, ભાવનગર, નવસારી, ડાંગ અને વલસાડમાં ઓરેન્જ એલર્ટ સાથે છૂટાછવાયા સ્થળોએ અતિભારે વરસાદની આગાહી છે. જ્યારે મોરબી, રાજકોટ, બોટાદ, જામનગર, દ્વારકા, પોરબંદર, જુનાગઢ, ગીર સોમનાથ, ભરૂચ, સુરત અને તાપીમાં યલો એલર્ટ સાથે ભારે વરસાદની શક્યતા છે. IMDએ 14 સપ્ટેમ્બરે ગુજરાત રિજન અને સૌરાષ્ટ્ર-કચ્છ બંને માટે અતિભારે વરસાદની ચેતવણી આપી છે.

15 સપ્ટેમ્બરે જામનગર, દ્વારકા, પોરબંદર, જુનાગઢ અને ગીર સોમનાથ તેમજ વલસાડ જિલ્લામાં છૂટાછવાયા સ્થળોએ યલો એલર્ટ સાથે ભારે વરસાદની આગાહી છે. ખાસ કરીને સૌરાષ્ટ્રના દરિયાકાંઠાના વિસ્તારોમાં વરસાદી માહોલ જોવા મળી શકે છે. જોકે 15 સપ્ટેમ્બર માટે ગુજરાત રિજનમાં IMDની સબ-ડિવિઝનલ ચેતવણી નથી, જ્યારે સૌરાષ્ટ્ર-કચ્છ માટે ભારે વરસાદની ચેતવણી છે.

16 સપ્ટેમ્બરે રાજ્યમાં ભારે વરસાદની કોઈ ચેતવણી આપવામાં આવી નથી. જોકે ગુજરાતના મોટાભાગના વિસ્તારોમાં હળવાથી સામાન્ય વરસાદ ચાલુ રહેવાની શક્યતા છે. એટલે 16 સપ્ટેમ્બરે વરસાદનું જોર અગાઉના દિવસોની સરખામણીમાં ઘટી શકે છે. IMDના સબ-ડિવિઝનલ વોર્નિંગમાં ગુજરાત રિજન અને સૌરાષ્ટ્ર-કચ્છ બંને માટે આ દિવસે કોઈ ભારે વરસાદની ચેતવણી નથી.

17 સપ્ટેમ્બરે પણ રાજ્યમાં ભારે વરસાદની કોઈ ચેતવણી નથી. જોકે ગુજરાતમાં હળવાથી સામાન્ય વરસાદની શક્યતા રહેશે. એટલે આગામી દિવસોમાં વરસાદનું મુખ્ય જોર 12થી 15 સપ્ટેમ્બર વચ્ચે રહેવાની શક્યતા છે અને ત્યારબાદ વરસાદની તીવ્રતામાં ઘટાડો જોવા મળી શકે છે.

હાલની આગાહી પ્રમાણે 12થી 14 સપ્ટેમ્બર દરમિયાન ગુજરાતમાં વરસાદનું જોર વધશે, જેમાં 13 અને 14 સપ્ટેમ્બરે કેટલાક વિસ્તારોમાં અતિભારે વરસાદની શક્યતા છે. ત્યારબાદ 15 સપ્ટેમ્બરે વરસાદનું જોર ઘટશે અને 16-17 સપ્ટેમ્બરે ભારે વરસાદની ચેતવણી નહીં રહે.