ગુજરાત રાજ્યમાં સાહસપ્રેમી યુવક-યુવતીઓને આકર્ષતી ગિરનાર આરોહણ-અવરોહણ સ્પર્ધા માટેની તૈયારીઓ જોરશોેરથી શરૂ થઈ ગઈ છે. 2026ના જાન્યુઆરી મહિનાના પ્રથમ સપ્તાહમાં યોજાનારી આ ભવ્ય સ્પર્ધા માટે આ વર્ષે કુલ 1377 સ્પર્ધકોએ રજીસ્ટ્રેશન કરાવ્યું છે. જુદા જુદા જિલ્લાઓમાંથી આવેલા સ્પર્ધકોના ફોર્મની ચકાસણી હાલ તંત્ર દ્વારા ચાલુ છે અને જલદી અંતિમ યાદી જાહેર થવાની છે. દર વર્ષે રાજ્ય તથા રાષ્ટ્રીય સ્તરે યોજાતી ગિરનાર ચડાણ-ઉતરાણ સ્પર્ધા યુવાનોમાં ઉત્સાહ, શારીરિક ક્ષમતા, ધીરજ અને સાહસનું પ્રતિબિંબ બની રહે છે. આ માટે જુનાગઢનું ગિરનાર પર્વત વર્ષોથી દેશભરના યુવાનોનું કેન્દ્રબિંદુ રહ્યું છે.

આવતી 40મી ગિરનાર સ્પર્ધા માટે આ વર્ષે નોંધાયેલા કુલ 1377 સ્પર્ધકોમાં સિનીયર અને જુનીયર બંને કેટેગરીના ભાગ લેનારાઓનો સમાવેશ થાય છે. જિલ્લા યુવા વિકાસ અધિકારી મુજબ સિનીયર કેટેગરીમાં 611 ભાઈઓ અને 166 બહેનો જ્યારે જુનીયર કેટેગરીમાં 346 ભાઈઓ અને 254 બહેનો એમ કુલ 1377 સ્પર્ધકોના ફોર્મ પ્રાપ્ત થયા છે. હાલ તમામ જિલ્લાના યુવા વિકાસ વિભાગ દ્વારા રજીસ્ટ્રેશન ફોર્મની ચકાસણી પ્રક્રિયા ચાલી રહી છે. ચકાસણી પૂર્ણ થતાં જ અંતિમ યાદી જાહેર કરવામાં આવશે, જેથી સ્પર્ધકોને તેમના નંબર, સમય અને અન્ય સૂચનાઓ પ્રાપ્ત થઈ શકે.

ગિરનારની સ્પર્ધા ખાસ કરીને તેના પડકારજનક માર્ગ માટે જાણીતી છે. ભાઈઓ માટે તળેટીથી મા અંબાજી સુધીના કુલ 5500 પગથિયાં ચડી ઉતરવાનું રહે છે, જે અત્યંત કઠોર અને શારિરિક ક્ષમતાની પરીક્ષા લેતું કાર્ય છે. બીજી તરફ બહેનો માટે માળીના પરબ સુધીના 2200 પગથિયાંનો પડકાર હોય છે. ભાઈઓએ આ માર્ગ બે કલાકની અંદર પૂર્ણ કરવો અનિવાર્ય છે, જ્યારે બહેનો માટે સ્પર્ધા પૂર્ણ કરવાની 1 કલાક 15 મિનિટની સમયમર્યાદા નક્કી કરવામાં આવી છે. આ સમયમર્યાદાઓ સ્પર્ધકોની તાકાત, ઝડપ અને મનોબળની કસોટી કરે છે.

ગિરનાર આરોહણ-અવરોહણ સ્પર્ધા માત્ર રમતગમત પૂરતી સીમિત નથી, પરંતુ તે શિસ્ત, સંકલ્પ અને પ્રયત્નનું પ્રતિક બની ગઈ છે. દર વર્ષે રાજ્યના તમામ જિલ્લાઓમાંથી મોટી સંખ્યામાં યુવાનો આ સ્પર્ધામાં ભાગ લેવા ઊમટી પડે છે. ભાગ લેનારાઓ માટે આ સ્પર્ધા માત્ર ગિરનારને જીતવાનો પ્રશ્ન નથી, પરંતુ પોતાના મનોબળને પરખવાની અને પોતાને વધુ મજબૂત બનાવવા માટેનો મોકો છે. જુનાગઢ શહેર અને આસપાસના વિસ્તાર માટે આવી સ્પર્ધાઓ એક ઉત્સવ સમાન વાતાવરણ ઉભું કરે છે, જેમાં સ્થાનિક લોકો સહિત પ્રવાસીઓ પણ ઉમટી પડે છે.

આગામી 2026ની સ્પર્ધા 40મી આવૃત્તિ હોવાથી તેનો મહત્વ વધુ વધ્યું છે. આયોજન વિભાગે સુરક્ષા, તાત્કાલિક સારવાર, પાણીની સુવિધા, સ્વયંસેવકોની નિમણૂંક અને વ્યવસ્થાપન અંગેની તૈયારીઓ શરૂ કરી દીધી છે. દર વર્ષની જેમ આ વર્ષે પણ સ્પર્ધા દરમિયાન સ્પર્ધકોને યોગ્ય માર્ગદર્શન, આરોગ્ય સહાય અને નિયમિત દેખરેખ ઉપલબ્ધ થશે. સ્પર્ધા નજીક આવતાં તમામ સ્પર્ધકો પ્રેક્ટિસમાં વ્યસ્ત થઈ ગયા છે અને ગિરનારના પગથિયાં પર તૈયારી માટે ભીડ વધવા લાગી છે.

ગિરનારની આ સ્પર્ધા યુવાનોને શારીરિક સ્ફૂર્તિ સાથે જીવનમાં સંકલ્પશક્તિ જાળવવાની પ્રેરણા આપે છે. રાજ્યભરના યુવાનો ઉત્સાહભેર આગામી જાન્યુઆરીની રાહ જોઈ રહ્યા છે, જ્યારે તેઓ ગિરનારના ઊંચા પગથિયાં પર પોતાના સપના સાકાર કરવા દોડ કરશે. આ વર્ષે વધેલા રજીસ્ટ્રેશન આ સ્પર્ધાની વધતી લોકપ્રિયતા અને યુવાનોમાં વધતા સાહસપ્રેમની સાબિતી આપે છે.