નવી દિલ્હી,

રશિયન બેલિસ્ટિક મિસાઈલ હુમલાની અગાઉથી ચેતવણી મળશે; ઝેલેન્સ્કીની સહાય શરૂ થયાની પુષ્ટિ 

અમેરિકા દ્વારા તાજેતરમાં અટકાવી દેવામાં આવેલી ગુપ્તચર માહિતીઓ પૂરી પાડવાની પ્રક્રિયા ફરીથી શરૂ કરી દેવામાં આવી છે. યુક્રેનના રાષ્ટ્રપતિ વોલોદોમિર ઝેલેન્સ્કીએ પોતે અમેરિકા તરફથી મળતી આ મહત્વપૂર્ણ સૈન્ય ગુપ્તચર સહાય પુનઃ શરૂ થઈ ગઈ હોવાની સત્તાવાર પુષ્ટિ કરી છે, જેને યુક્રેન માટે રણનીતિક દ્રષ્ટિએ ખૂબ જ મોટી સફળતા માનવામાં આવી રહી છે.

અમેરિકાની આ ઇન્ટેલિજન્સ મદદ ફરીથી ચાલુ થવાને કારણે હવે યુક્રેનિય સેનાને રશિયા તરફથી છોડવામાં આવતી ઘાતક બેલિસ્ટિક મિસાઇલો તથા અન્ય હવાઈ હુમલાઓની આગોતરી ચેતવણી સમયસર મેળવવામાં મોટી સફળતા મળશે. આ માહિતીના આધારે યુક્રેન પોતાની એર ડિફેન્સ સિસ્ટમને સમયસર સક્રિય કરી શકશે અને પોતાના શહેરો તેમજ નાગરિકોને રશિયન મિસાઈલના તબાહીજનક હુમલાઓથી બચાવી શકશે.

યુદ્ધના આ નિર્ણાયક તબક્કે અમેરિકાના આ પગલાથી રશિયાના આક્રમણ સામે ઝીંક ઝીલી રહેલા યુક્રેની સૈન્યને મોટું પીઠબળ મળ્યું છે.