ગિરનારની પાવન ગોદમાં દર વર્ષે યોજાતો વિશ્વવિખ્યાત મહાશિવરાત્રી મેળો આ વર્ષે નવા આયામો સાથે ઉજવાશે. વર્ષ 2026માં યોજાનાર આ મેળાને ‘મિની કુંભ’નું સ્વરૂપ આપવામાં આવી રહ્યું છે. સાધુ-સંતો, વહીવટી તંત્ર અને વિવિધ સેવાકીય સંસ્થાઓ વચ્ચે યોજાયેલી સંયુક્ત બેઠક બાદ મેળાના આયોજનને અંતિમ મંજૂરી આપવામાં આવી છે. આ વર્ષે મહાશિવરાત્રી મેળો માત્ર ધાર્મિક આસ્થાનો પર્વ નહીં, પરંતુ ભવ્ય આયોજન, આધુનિક સુવિધાઓ અને ઐતિહાસિક ફેરફારો માટે પણ યાદગાર બનશે.
 

11 થી 15 ફેબ્રુઆરી સુધી ભક્તિનો મહોત્સવ

આ વર્ષે મહાશિવરાત્રી મેળાનું આયોજન 11 ફેબ્રુઆરીથી 15 ફેબ્રુઆરી 2026 દરમિયાન કરવામાં આવશે. દેશભરમાંથી લાખો શ્રદ્ધાળુઓ, નાગા સાધુઓ, અઘોરીઓ અને સંત મહાત્માઓ ભવનાથ મહાદેવના દર્શનાર્થે જૂનાગઢ પહોંચશે. ગિરનાર પર્વતની તળેટીમાં ભક્તિ, સાધના અને આધ્યાત્મિકતાનો અદભૂત સંગમ જોવા મળશે.
 

પ્રથમવાર સંતોની ભવ્ય નગરયાત્રા

આ વર્ષની સૌથી મોટી અને ઐતિહાસિક ખાસિયત એટલે કે પ્રથમવાર સાધુ-સંતોની ભવ્ય નગરયાત્રાનું આયોજન. 11 ફેબ્રુઆરીના રોજ સાધુ-સંતોના આગમન પ્રસંગે જૂનાગઢ શહેરમાં વિશાળ નગરયાત્રા કાઢવામાં આવશે. આ યાત્રામાં નાગા સાધુઓ, અઘોરી સંતો અને વિવિધ અખાડાઓના મહંતો સામેલ થશે. શહેરના મુખ્ય માર્ગો પરથી પસાર થતી આ યાત્રા શ્રદ્ધાળુઓ માટે અલૌકિક અનુભવ બનશે.
 

રવેડી રૂટમાં વધારો, દર્શન થશે સરળ

ભક્તોની વધતી સંખ્યાને ધ્યાનમાં રાખીને રવેડી રૂટમાં મહત્વપૂર્ણ ફેરફાર કરવામાં આવ્યો છે. અગાઉ 1.5 કિલોમીટરનો રહેલો રૂટ હવે વધારીને 2 કિલોમીટર કરવામાં આવ્યો છે, જેથી વધુમાં વધુ શ્રદ્ધાળુઓને નાગા સાધુઓના દર્શન સરળતાથી થઈ શકે.
 

ભોલેનાથ થીમ પર શહેરનું ભવ્ય સુશોભન

ગુજરાત ટુરિઝમ વિભાગ દ્વારા સમગ્ર મેળા વિસ્તાર અને યાત્રા રૂટને ભગવાન ભોલેનાથની થીમ પર શણગારવામાં આવશે. શિવલિંગ, ત્રિશુલ, ડમરુ અને હિમાલય થીમ આધારિત સજાવટ આકર્ષણનું કેન્દ્ર બનશે. સાથે સાથે શ્રદ્ધાળુઓ માટે અનેક સેલ્ફી પોઈન્ટ્સ પણ તૈયાર કરાશે.
 

લાઈવ સ્ટ્રીમિંગની વ્યવસ્થા

જે ભક્તો જાતે જૂનાગઢ આવી શકશે નહીં, તેમના માટે ખાસ વ્યવસ્થા કરવામાં આવી છે. શાહી સ્નાન અને મહત્વપૂર્ણ ધાર્મિક વિધિઓનું લાઈવ સ્ટ્રીમિંગ સોશિયલ મીડિયા અને અન્ય માધ્યમો દ્વારા કરવામાં આવશે.
 

સુરક્ષા વ્યવસ્થા રહેશે ચુસ્ત

લાખોની સંખ્યામાં ઉમટનારા શ્રદ્ધાળુઓને ધ્યાનમાં રાખીને સુરક્ષા વ્યવસ્થામાં મોટો વધારો કરવામાં આવ્યો છે.

• પોલીસ ફોર્સ 1600 થી વધારીને 2900થી વધુ જવાનો તૈનાત રહેશે
• પ્રથમવાર 1000થી વધુ સ્થાનિક સ્વયંસેવકો સેવા આપશે
• સમગ્ર મેળા વિસ્તારમાં CCTV કેમેરા દ્વારા સતત મોનિટરિંગ
• 300થી વધુ સેવાકીય સંસ્થાઓ દ્વારા ભોજન અને પ્રસાદની વ્યવસ્થા
• ડોરમેટરી અને ઉતારાની વિશેષ સુવિધાઓ ઉપલબ્ધ રહેશે
   

ટ્રાફિક અને પરિવહન માટે ખાસ આયોજન

મેળા દરમિયાન ટ્રાફિક વ્યવસ્થાને સરળ બનાવવા રાજકોટ અને સોમનાથ હાઈવે પર વિશાળ પાર્કિંગ ઝોન બનાવવામાં આવશે. ત્યાંથી ભવનાથ સુધી શટલ બસ સેવા ઉપલબ્ધ રહેશે. રેલવે અને એસ.ટી. નિગમ દ્વારા પણ વધારાની સ્પેશિયલ ટ્રેનો અને બસો દોડાવવાની તૈયારી ચાલી રહી છે.
 

મહાશિવરાત્રી મેળાનું થીમ સોન્ગ લોન્ચ

મેળાના પ્રચાર અને ભક્તિભાવ વધારવા માટે મહાશિવરાત્રી મેળાનું ખાસ થીમ સોન્ગ પણ લોન્ચ કરવામાં આવ્યું છે, જે ભક્તોમાં ઉત્સાહ અને શ્રદ્ધાનો સંચાર કરશે.
 

ભક્તોને ભાવભર્યું આમંત્રણ

ભવનાથ મહાદેવના આ પાવન આંગણે યોજાનારા આ મહોત્સવ માટે દેશ-વિદેશના શ્રદ્ધાળુઓને ભાવભર્યું આમંત્રણ પાઠવવામાં આવ્યું છે. વહીવટી તંત્રએ સ્થાનિક નાગરિકોને પણ અપીલ કરી છે કે તેઓ શિવભક્તોના સ્વાગત માટે સહયોગ આપે અને મેળાની ભવ્યતા જાળવવામાં મદદરૂપ બને.
 

આ વર્ષે જૂનાગઢનો મહાશિવરાત્રી મેળો ખરેખર ‘મિની કુંભ’ બનીને ઇતિહાસ રચવા જઈ રહ્યો છે. 🕉️