નવી દિલ્હી,

ધરપકડ, ત્રાસ કે જીવના જોખમથી ડર્યા વગર સ્વદેશ જવાનો અવામી લીગ પ્રમુખનો મક્કમ નિર્ધાર

બાંગ્લાદેશના પૂર્વ વડાંપ્રધાન અને અવામી લીગના પ્રમુખ શેખ હસીનાએ ડિસેમ્બર મહિનામાં જ પોતાના દેશ બાંગ્લાદેશ પરત ફરવાની યોજના અને મક્કમ સંકલ્પને ફરી એકવાર દોહરાવ્યો છે. તેમણે સ્પષ્ટ શબ્દોમાં જણાવ્યું છે કે સ્વદેશ પરત ફરવું એ તેમની નૈતિક જવાબદારી છે અને તેઓ આ નિર્ણયથી સહેજ પણ પીછેહઠ કરશે નહીં.

બાંગ્લાદેશમાં તારિક રહેમાનની આગેવાની હેઠળની સરકાર દ્વારા તેમની ધરપકડ કરવામાં આવે, શારીરિક કે માનસિક ત્રાસ આપવામાં આવે અથવા તો તેમના જીવનું ભારે જોખમ ઊભું થાય, તેમ છતાં પણ તેઓ બાંગ્લાદેશ પરત ફરવાના પોતાના નિર્ણય પર અટલ રહેશે. પૂર્વ વડાંપ્રધાન શેખ હસીનાએ ભારપૂર્વક કહ્યું હતું કે, "મને કોઈ વાતનો ડર નથી અને બાંગ્લાદેશ પરત ફરવું એ મારી પ્રાથમિક જવાબદારી છે."

શેખ હસીનાના આ વલણથી બાંગ્લાદેશના વર્તમાન રાજકીય પરિદ્રશ્યમાં અને તારિક રહેમાન શાસનમાં ખળભળાટ મચી ગયો છે. અવામી લીગના સમર્થકોમાં આ જાહેરાતથી નવો ઉત્સાહ જોવા મળી રહ્યો છે, જ્યારે બીજી તરફ ડિસેમ્બરમાં તેમની સંભવિત વાપસીને લઈને દેશમાં સુરક્ષા અને રાજકીય સ્થિરતા મુદ્દે ચર્ચાઓ તેજ બની છે.