વડાપ્રધાન નરેન્દ્ર મોદી આગામી 11 અને 12 જાન્યુઆરીના રોજ ગાંધીનગરના લોકભવન અને મહાત્મા મંદિર ખાતે વિવિધ કાર્યક્રમોમાં હાજરી આપવાના છે. તેમના આગમનને ધ્યાનમાં રાખીને, SPG સુરક્ષા અને કાયદો વ્યવસ્થાને પગલે જિલ્લા મેજિસ્ટ્રેટ દ્વારા શહેરના મુખ્ય માર્ગો પર પ્રવેશ પ્રતિબંધ અને નો-પાર્કિંગ ઝોન પર કડક નિયમો લાગુ કરવામાં આવ્યા છે.
 

ક્યાં-ક્યાં માર્ગો બંધ રહેશે
વિશેષ સુરક્ષા પગલાં હેઠળ 11 જાન્યુઆરી બપોરે 2 વાગ્યાથી 12 જાન્યુઆરી સવારે 10 સુધી ‘ચ-0’ સર્કલથી સેક્ટર-30 સર્કલ સુધીનો ‘જ’ રોડ સંપૂર્ણ બંધ રહેશે. ઉપરાંત, 12 જાન્યુઆરી સવારે 6થી સાંજે 4 કલાક સુધી ‘ક’ રોડ હોટલ લીલાથી સેક્ટર-13 રેલવે સ્ટેશન ચોકડી સુધીનો માર્ગ બંધ રહેશે. એજ રીતે 12 જાન્યુઆરી સવારે 6થી સાંજે 4 કલાક સુધી ખ-3 સર્કલથી સાંઈ ચાર રસ્તા મહાત્મા મંદિર સુધીનો મુખ્ય રોડ પ્રતિબંધિત રહેશે.
 

પાર્કિંગ પર પ્રતિબંધ
શહેરના મહત્વના સર્કલો અને સર્વિસ રોડ પર પાર્કિંગ પર કડક પ્રતિબંધ લાગુ કરવામાં આવ્યો છે. અપોલો સર્કલથી અક્ષરધામના મુખ્ય માર્ગ અને સર્વિસ રોડના 50 મીટર વિસ્તાર સુધી વાહન પાર્ક કરી શકાશે નહીં. તે ઉપરાંત સેન્ટ્રલ વિસ્ટા રોડ મહાત્મા મંદિરથી ટાઉનહોલ અને ઉદ્યોગભવન થઈ અપોલો સર્કલ સુધીના માર્ગો પર પણ પાર્કિંગ પર સંપૂર્ણ મનાઈ છે.
 

વિકલ્પિક માર્ગો અને રેલવે મુસાફરો માટે મુક્તિ
11 જાન્યુઆરી બપોરે 2 વાગ્યાથી 12 જાન્યુઆરી સાંજે 4 વાગ્યા સુધી અપોલો સર્કલ, કોબા સર્કલ અને ચ-0થી સેક્ટર-30 સુધી ભારે વાહનો પ્રવેશી શકશે નહીં. વાહનચાલકો માટે વૈકલ્પિક માર્ગ તરીકે ચ-રોડ, રોડ નંબર-7, વાવોલ ગામ અને ઉવારસદ માર્ગ ઉપલબ્ધ રહેશે. રેલવે મુસાફરોને જરૂરી પુરાવા બતાવી આ પ્રતિબંધમાંથી મુક્તિ આપવામાં આવશે.
 

કાયદેસરની કાર્યવાહી અને ઉત્કૃષ્ટ સુરક્ષા
જિલ્લા મેજિસ્ટ્રેટે સ્પષ્ટ કર્યું છે કે, આ સુરક્ષા નિયમોનું ઉલ્લંઘન કરનાર સામે ભારતીય ન્યાય સંહિતા 2023ની કલમ-223 હેઠળ કાયદેસરની કાર્યવાહી કરવામાં આવશે. ખાસ કરીને એમર્જન્સી સેવાઓ, એમ્બ્યુલન્સ અને ઈમરજન્સી વાહનો આ પ્રતિબંધમાંથી બાકાત રાખવામાં આવ્યા છે.

આ પગલાં વડાપ્રધાનના આગમન દરમિયાન સમારંભો, શેરી ભીડ અને વાહનવ્યવહારને સરળ, સુરક્ષિત અને નિયંત્રિત રીતે ચાલવા માટે લેવામાં આવ્યા છે. સત્તાવાર જાહેરાત મુજબ, શહેરમાં તમામ નિયંત્રણો, રોકાણ-પ્રતિબંધ અને પાર્કિંગના નિયમોનું પાલન કરાવવાનું કાર્ય પોલીસ અને અધિકારીઓ ટીમ દ્વારા કડક રીતે કરવામાં આવશે.