નવી દિલ્હી,સુપ્રીમ કોર્ટના આદેશ બાદ કાલથી માત્ર ૪૫ પૈસામાં ઉપલબ્ધ થશે મુસાફરી વીમોઅત્યાર સુધી માત્ર IRCTC પોર્ટલ કે એપ દ્વારા ઓનલાઇન ટિકિટ બુક કરાવતા મુસાફરોને જ અકસ્માત સામે મુસાફરી વીમાનો લાભ મળતો હતો. પરંતુ 'યુનિયન ઓફ ઇન્ડિયા' સામેના 'રાધા યાદવ' કેસમાં સુપ્રીમ કોર્ટ દ્વારા આપવામાં આવેલા આદેશ બાદ, રેલવે બોર્ડે ઓનલાઇન અને ઓફલાઇન મુસાફરો વચ્ચેનો તફાવત દૂર કરવાનો નિર્ણય કર્યો છે.આ નવી વ્યવસ્થા ૨૭ ઓક્ટોબર ૨૦૨૬થી સમગ્ર દેશમાં પેસેન્જર રિઝર્વેશન સિસ્ટમ કાઉન્ટરો પરથી કન્ફર્મ કે RAC ટિકિટ લેનારા મુસાફરો પણ ટિકિટ બુકિંગ સમયે માત્ર ૪૫ પૈસાનું પ્રીમિયમ ચૂકવીને રૂ. ૧૦ લાખ સુધીનું આર્થિક સુરક્ષા કવચ મેળવી શકશે. આ યોજના હેઠળ દુર્ઘટનામાં મુસાફરનું મૃત્યુ કે સંપૂર્ણ કાયમી અપંગતા થવા પર રૂ. ૧૦ લાખ, આંશિક દિવ્યાંગતા માટે રૂ. ૭.૫ લાખ, ગંભીર ઈજાગ્રસ્તો માટે હોસ્પિટલ ખર્ચ પેટે રૂ. ૨ લાખ સુધી તેમજ મૃતદેહ પહોંચાડવા માટે રૂ. ૧૦,૦૦૦ સુધીની સહાય વીમા પૉલિસીની શરતોને આધિન મળવાપાત્ર રહેશે.

ભારતીય ક્રિકેટ ટીમને ન્યૂઝીલેન્ડ સામેની T20 આંતરરાષ્ટ્રીય શ્રેણી દરમિયાન મોટો ઝટકો લાગ્યો છે. વિકેટકીપર-બેટ્સમેન ઈશાન કિશન ઈજાના કારણે પાંચ મેચોની શ્રેણીની ત્રીજી T20 મેચમાંથી પણ બહાર થઈ ગયો છે. ભારત અને ન્યૂઝીલેન્ડ વચ્ચે આ મુકાબલો 27 ઓક્ટોબર, 2026ના રોજ વેલિંગ્ટન ખાતે રમાવાનો છે. ઈશાનની ગેરહાજરીને કારણે ટીમ મેનેજમેન્ટે તેની ફિટનેસ અને રિકવરી પર ધ્યાન કેન્દ્રિત કર્યું છે.પ્રથમ T20 મેચ દરમિયાન ઈજાગ્રસ્ત થયો હતો ઈશાન

પ્રથમ T20 આંતરરાષ્ટ્રીય મેચ દરમિયાન ઈશાન કિશનને જમણી બાજુના એડક્ટર સ્નાયુમાં હળવા સ્તરની ઈજા થઈ હતી. આ ઈજાને કારણે તે સંપૂર્ણ મેચ ફિટનેસ મેળવી શક્યો નથી. ભારતીય ક્રિકેટ કંટ્રોલ બોર્ડ (BCCI) દ્વારા 26 ઓક્ટોબરે આપવામાં આવેલી માહિતી અનુસાર, ઈશાનની રિકવરી સારી રીતે આગળ વધી રહી છે, પરંતુ તે હજુ ત્રીજી મેચ રમવા માટે સંપૂર્ણપણે ફિટ નથી.

BCCIની મેડિકલ ટીમ ઈશાનની સ્થિતિ પર સતત નજર રાખી રહી છે. ટીમ મેનેજમેન્ટ તેને પૂરતો આરામ આપીને સંપૂર્ણ ફિટનેસ સાથે મેદાનમાં પરત લાવવા માંગે છે.કુમાર કુશાગ્ર બેકઅપ વિકેટકીપર તરીકે ટીમ સાથે

ઈશાન કિશનની ગેરહાજરીમાં યુવા વિકેટકીપર-બેટ્સમેન કુમાર કુશાગ્ર ટીમ સાથે રહેશે. તેઓ ક્રાઇસ્ટચર્ચથી ભારતીય ટીમ સાથે વેલિંગ્ટન પહોંચ્યા છે અને ત્રીજી T20 મેચ માટે પણ ટીમનો ભાગ રહેશે. જોકે, ઈશાનના સ્થાને પ્લેઇંગ ઇલેવનમાં કોણ તક મેળવશે તે અંગે અંતિમ નિર્ણય ટીમ મેનેજમેન્ટ લેશે.ભારત માટે મહત્વપૂર્ણ મુકાબલો

ન્યૂઝીલેન્ડ સામેની શ્રેણીમાં ભારતીય ટીમ માટે ખેલાડીઓની ફિટનેસ અને યોગ્ય ટીમ સંયોજન મહત્વપૂર્ણ રહેશે. ઈશાન કિશન જેવા વિકેટકીપર-બેટ્સમેનની ગેરહાજરીમાં અન્ય ખેલાડીઓ પર જવાબદારી વધી શકે છે. હવે સૌની નજર ત્રીજી T20 મેચમાં ભારતીય ટીમની પ્લેઇંગ ઇલેવન અને ઈશાનની આગામી મેચોમાં વાપસી પર રહેશે.

દિલ્હી,ગુજરાતમાં પાણીની અછત દૂર કરવા કાલે ઉચ્ચસ્તરીય બેઠકમાં લેવાશે કાયમી નિર્ણયોગુજરાત રાજ્યમાં આ વર્ષે વરસાદની ઘટ અને અપૂરતા જળસંચયને કારણે ઊભી થયેલી પાણીની વિકટ સમસ્યાના કાયમી ઉકેલ માટે આગામી મંગળવારે દિલ્હી ખાતે એક ઉચ્ચસ્તરીય બેઠકનું આયોજન કરવામાં આવ્યું છે, જેમાં ગુજરાતના મુખ્યમંત્રી ભૂપેન્દ્ર પટેલની સાથે મધ્યપ્રદેશ, રાજસ્થાન અને મહારાષ્ટ્ર એમ કુલ ચાર રાજ્યોના મુખ્યમંત્રીઓ ચર્ચા-વિચારણા કરશે.

કેન્દ્રીય જળશક્તિ મંત્રી સી.આર. પાટીલે સ્પષ્ટતા કરી છે કે દેશના અન્ય પ્રદેશોની સરખામણીમાં ગુજરાતમાં જળસ્થિતિ પ્રમાણમાં સારી છે, તેમ છતાં પાડોશી રાજ્યોમાંથી પૂરતું પાણી મળી રહે તે માટે આ બેઠકમાં આંતરરાજ્ય પાણીની વહેંચણી અને વ્યવસ્થાપન અંગે મહત્ત્વના નિર્ણયો લેવામાં આવશે. મંગળવારે યોજાનારી આ બેઠક પર સમગ્ર રાજ્યની નજર ટકેલી છે.

મુંબઈ,મુંબઈનો એર ક્વોલિટી ઇન્ડેક્સ 322ને પાર, જ્યારે અમદાવાદમાં પણ હવાની ગુણવત્તા ચિંતાજનક સ્તરે

સામાન્ય રીતે પ્રદૂષણની બાબતમાં હંમેશા ચર્ચામાં રહેતી રાજધાની દિલ્હીની સરખામણીમાં આ વર્ષે ઑક્ટોબર મહિનામાં મુંબઈ અને અમદાવાદ જેવા મોટા શહેરોની હવા વધુ જોખમી સાબિત થઈ રહી છે. કેન્દ્રીય પ્રદૂષણ નિયંત્રણ બોર્ડના તાજેતરના ડેટા અનુસાર, માયાનગરી મુંબઈનો એર ક્વોલિટી ઇન્ડેક્સ ઉછળીને સીધો 322 પર પહોંચી ગયો છે, જે 'ખૂબ જ ખરાબ' શ્રેણીમાં આવે છે અને દિલ્હી કરતાં પણ ઘણો વધારે છે.

બીજી બાજુ અમદાવાદમાં પણ હવાની ગુણવત્તા કથળી રહી છે, જ્યાં AQI સ્તર 110થી 186 વચ્ચે નોંધાઈ રહ્યું છે. આ બંને મહાનગરોમાં વાહનોના ધુમાડા, સતત વધતું જતું બાંધકામ અને ઔદ્યોગિક પ્રવૃત્તિઓને કારણે શ્વાસ લેવો મુશ્કેલ બન્યો છે. વધતા જતા પ્રદૂષણને નાથવા માટે મિનિસિપલ કોર્પોરેશન દ્વારા કડક પગલાં રૂપે ૨૮ મુદ્દાની વિશેષ માર્ગદર્શિકા પણ જારી કરવામાં આવી છે.

સુલ્તાનપુર,કેન્દ્રીય ગૃહમંત્રી અમિત શાહ સામેની વિવાદાસ્પદ ટિપ્પણી મામલે વિશેષ MP-MLA કોર્ટનો ફેંસલો

રાહુલ ગાંધીને વર્ષ 2018ના એક ચર્ચિત માનહાનિ કેસમાં ઉત્તર પ્રદેશની સુલ્તાનપુર વિશેષ MP-MLA કોર્ટ દ્વારા દોષમુક્ત જાહેર કરવામાં આવ્યા છે. ભાજપના તત્કાલીન રાષ્ટ્રીય અધ્યક્ષ અને વર્તમાન કેન્દ્રીય ગૃહમંત્રી અમિત શાહ વિરુદ્ધ કરવામાં આવેલી વાંધાજનક અને આપત્તિજનક ટિપ્પણી બાબતે રાહુલ ગાંધી વિરુદ્ધ આ કેસ દાખલ કરાયો હતો. અદાલતના આ મહત્ત્વપૂર્ણ નિર્ણયથી રાહુલ ગાંધીને મોટી કાનૂની રાહત મળી છે, જે અંગેની પુષ્ટિ તેમના વકીલ કાશી પ્રસાદ શુક્લા દ્વારા કરવામાં આવી છેઆ વિવાદ વર્ષ 2018માં કર્ણાટકના બેંગલુરુ ખાતે યોજાયેલી એક પ્રેસ કોન્ફરન્સ દરમિયાનની ટિપ્પણીઓ સાથે જોડાયેલો છે. આ મામલે ભાજપના તત્કાલીન જિલ્લા ઉપપ્રમુખ અને ડિસ્ટ્રિક્ટ કો-ઓપરેટિવ બેંકના પૂર્વ અધ્યક્ષ વિજય મિશ્રા દ્વારા સુલ્તાનપુરની અદાલતમાં ફરિયાદ નોંધાવવામાં આવી હતી. આ કેસની સુનાવણી અંતર્ગત ચુકાદો સાંભળવા માટે રાહુલ ગાંધી પોતે વિશેષરૂપે દિલ્હીથી સુલ્તાનપુર સ્થિત કોર્ટમાં હાજર રહ્યા હતા.

ગાંધીનગર,મુખ્યમંત્રી ભૂપેન્દ્ર પટેલની મોટી જાહેરાતમુખ્યમંત્રી ભૂપેન્દ્ર પટેલ સરકાર દ્વારા રાજ્યના ચાર જિલ્લાઓ—પોરબંદર, કચ્છ, દેવભૂમિ દ્વારકા અને જામનગરને દુષ્કાળગ્રસ્ત (અછતગ્રસ્ત) જાહેર કરવામાં આવ્યા છે.રાજ્યમાં સરેરાશ ઓછો વરસાદ નોંધાવાને કારણે સૌરાષ્ટ્ર અને કચ્છના આ વિસ્તારોમાં નદીઓ, તળાવો અને ડેમમાં પાણીનું સ્તર ઘટવા લાગ્યું છે તથા પાણીની તંગી વર્તાઈ રહી છે. આ વિકટ પરિસ્થિતિ વચ્ચે ખેડૂતોને રાહત આપવા માટે મુખ્યમંત્રી ભૂપેન્દ્ર પટેલે જાહેરાત કરી છે કે પાકને થયેલા નુકસાન સામે પ્રભાવિત ખેડૂતોને પ્રતિ હેક્ટર રૂ. 8,500ની આર્થિક સહાય મહત્તમ બે હેક્ટરની મર્યાદામાં ચૂકવવામાં આવશે. સરકારના આ નિર્ણયથી અછતનો સામનો કરી રહેલા અન્નદાતાઓને મોટી રાહત મળશે.

નવી દિલ્હી,આંધ્ર પ્રદેશ અને ઓડિશા માટે હવામાન વિભાગનું ‘રેડ એલર્ટ’ જાહેર

બંગાળની ખાડીમાં સર્જાયેલું ચક્રવાતી વાવાઝોડું ‘અર્નબ’ અત્યંત ખતરનાક અને રૌદ્ર સ્વરૂપ ધારણ કરી રહ્યું છે, જેને ભારતીય અવકાશ સંશોધન સંસ્થા  અને હવામાન વિભાગની સેટેલાઇટ તસવીરોમાં સ્પષ્ટપણે જોઈ શકાય છે. આ વાવાઝોડાની ગંભીરતાને જોતાં હવામાન વિભાગે આગામી 28 ઓક્ટોબરે આંધ્ર પ્રદેશ અને દક્ષિણ ઓડિશાના કિનારે ટકરાવાની સંભાવના વ્યક્ત કરી છે.હવામાન વિભાગના જણાવ્યા અનુસાર, પૂર્વ-મધ્ય અને પશ્ચિમ-મધ્ય બંગાળની ખાડી પર સક્રિય થયેલું ડીપ ડિપ્રેશન હવે તીવ્ર બનીને ચક્રવાતી તોફાન ‘અર્નબ’માં પરિવર્તિત થઈ ગયું છે. આ જોખમને ધ્યાનમાં રાખીને આંધ્ર પ્રદેશ અને ઓડિશાના દરિયાકાંઠાના વિસ્તારો માટે ‘રેડ એલર્ટ’ જાહેર કરવામાં આવ્યું છે. આ વાવાઝોડું ત્રાટકે ત્યારે ભારે પવન ફૂંકાવાની અને મુશળધાર વરસાદ પડવાની પૂરી શક્યતા છે.

રાજકોટ,આંતરરાષ્ટ્રીય સ્તરે પ્રવર્તતી યુદ્ધની પરિસ્થિતિ અને વિદેશમાંથી થતી આયાતમાં ઘટાડો થવાના કારણે સૂકામેવાના (ડ્રાયફ્રૂટ) ભાવમાં ૨૫ ટકાથી લઈને ૫૫ ટકા સુધીનો ધરખમ વધારો નોંધાયો છે.

સામાન્ય દિવસોમાં બજારમાં અંદાજે ૨૦૦ કન્ટેનરની આવક થતી હતી, જે ઘટીને હાલ માત્ર ૨૦ કન્ટેનર પર આવી ગઈ છે. સપ્લાય ચેઈન ખોરવાતા રાજકોટમાં બદામનો ભાવ કિલોદીઠ રૂ. ૮૦૦થી વધીને રૂ. ૧,૨૦, કાજુ રૂ. ૭૦૦થી વધીને રૂ. ૧,૦૦૦ અને પિસ્તા રૂ. ૧,૨૦૦થી વધીને રૂ. ૧,૮૦૦ પ્રતિ કિલો પહોંચી ગયા છે. આ અણધાર્યા ભાવવધારાના કારણે તહેવારોમાં ગિફ્ટિંગ અને ઘર વપરાશ માટે ડ્રાયફ્રૂટ ખરીદતી સામાન્ય જનતા અને ગૃહિણીઓનું આખું આર્થિક બજેટ ખોરવાઈ ગયું છે.

મુંબઈ,ટાઇગર શ્રોફ હુમલા કેસમાં ચોંકાવનારો ખુલાસો, નિશાને આમિર ખાન હતો

બોલિવૂડ અભિનેતા ટાઇગર શ્રોફ પર મુંબઈના જુહુ વિસ્તારમાં થયેલા જીવલેણ ફાયરિંગ કેસમાં પોલીસ તપાસ દરમિયાન એક મોટો અને ચોંકાવનારો ખુલાસો થયો છે. શૂટર્સના અસલી નિશાના પર ટાઇગર શ્રોફ નહીં પરંતુ સુપરસ્ટાર આમિર ખાન હતા. હુમલાખોરોએ બોલિવૂડના અનેક મોટા સ્ટાર્સના ઘરોની રેકી કરી હતી. આ શૂટર્સ આમિર ખાનને ટાર્ગેટ કરવા માગતા હતા, પરંતુ અભિનેતાની એક ખાસ આદત—કે તેઓ ભાગ્યે જ ઘરની બહાર નીકળે છે અને જ્યારે પણ બહાર જાય ત્યારે માત્ર ફિલ્મ શૂટિંગ પૂરતું જ સીમિત રહે છે—તેના કારણે હુમલાખોરોનો આ પ્લાન નિષ્ફળ ગયો હતો. આમિર ખાનની આ જ એકાંતપ્રિય અને સાવચેતીભરી આદતે તેમનો જીવ બચાવી લીધો હતો.

આ યોજના નિષ્ફળ જવાથી શૂટર્સે પોતાનો પ્લાન બદલ્યો હતો અને સોશિયલ મીડિયા તથા ઇન્સ્ટાગ્રામ પેજ દ્વારા ટાઇગર શ્રોફની દિનચર્યાની માહિતી મેળવીને તેમને નવો ટાર્ગેટ બનાવ્યા હતા.

રાપર,રાપરના પ્રાગપરમાં યોજાયેલા સંમેલનમાં જેતપર સત્યાગ્રહ છાવણીની લડતને ખેડૂતોનો એ પૂર્ણ ટેકો

મોરબી જિલ્લાના જેતપર ખાતે સત્યાગ્રહ છાવણી બનાવીને છેલ્લા પાંચ મહિનાથી અડગ રહીને આંદોલન ચલાવી રહેલા ખેડૂતોના સમર્થનમાં કચ્છ જિલ્લાના રાપર તાલુકાના પ્રાગપર ગામે એક વિશેષ 'અસરગ્રસ્ત ખેડૂત જાગૃતિ સંમેલન' યોજાયું હતું. આ સંમેલનમાં વિશાળ સંખ્યામાં એકત્રિત થયેલા ખેડૂતોએ એક અવાજે સ્પષ્ટ કર્યું હતું કે જ્યાં સુધી પ્રત્યેક ખેડૂતને તેનું યોગ્ય વળતર નહીં મળે ત્યાં સુધી આંદોલન સમેટાશે નહીં.સંમેલનમાં ઉપસ્થિત ખેડૂત આગેવાનોએ ગંભીર આક્ષેપો કરતા જણાવ્યું હતું કે, ખેડૂતોની એકતા તોડવા અને આ શાંતિપૂર્ણ આંદોલનને કચડી નાખવા માટે કેટલાક તત્વો દ્વારા આંદોલનકારીઓને કોરા ચેક આપી નાણાકીય લાલચો આપવામાં આવી રહી છે. એટલું જ નહીં, આંદોલનનું નેતૃત્વ કરતા નિર્દોષ ખેડૂતો પર ખોટા પોલીસ કેસો દાખલ કરીને તેમને ડરાવવા અને ધાકધમકી આપવાના પ્રયાસો પણ થઈ રહ્યા છે. પરંતુ ખેડૂતોએ આવા કોઈ પણ દબાણ સામે ઝૂકવાનો ઇનકાર કરીને જેતપર છાવણી ખાતે ચાલતી આ લડતને વધુ મજબૂત બનાવી આરપારની લડાઈ લડવાનો નિશ્ચય વ્યક્ત કર્યો છે.

શાહજહાંપુર,સોનીપત અને સીતાપુર કનેક્શન ખુલતા ક્રાઈમ બ્રાન્ચની ગહન પૂછપરછબોલિવૂડ એક્ટર ટાઈગર શ્રોફની કાર પર થયેલા હુમલા (ગોળીબાર)ના હાઇપ્રોફાઇલ કેસની તપાસ વધુ તેજ બની છે. આ કેસની તપાસમાં મુંબઈ ક્રાઈમ બ્રાન્ચની ૪ થી ૫ સભ્યોની વિશેષ ટીમ ઉત્તર પ્રદેશના શાહજહાંપુર જિલ્લાના પોવાયન પોલીસ સ્ટેશન વિસ્તારમાં પહોંચી છે. ક્રાઈમ બ્રાન્ચે ગુપ્તતા જાળવીને ત્યાંના સ્થાનિક યુવકની પૂછપરછ હાથ ધરી છે, જે થોડા સમય પહેલાં જ હરિયાણાના સોનીપતથી પરત ફર્યો હતો.આ પહેલાં દિલ્હી પોલીસે શાહજહાંપુરથી અંદાજે ૧૦૦ કિલોમીટર દૂર સીતાપુર જિલ્લામાંથી એક યુવતીની ધરપકડ કરી હતી, જેના પર હુમલાખોરોને કાનૂની કે લોજિસ્ટિક મદદ કરવાનો આક્ષેપ છે. તપાસમાં હરિયાણાના સોનીપત અને ઉત્તર પ્રદેશના વિવિધ વિસ્તારોનું કનેક્શન સામે આવતાં મુંબઈ પોલીસ હવે ઊંડાણપૂર્વક તપાસ ચલાવી રહી છે. જોકે, તપાસની સંવેદનશીલતા અને ગુપ્તતા જાળવી રાખવા સ્થાનિક શાહજહાંપુર પોલીસે આ પૂછપરછ અંગે સત્તાવાર કશું જાહેર કરવાનો ઇનકાર કર્યો છે.

રાજકોટ,૮ સેમ્પલ લેવાયા, મેનેજરે આ કાર્યવાહીને ગણાવી બદનામ કરવાનું ષડયંત્ર

રાજકોટ મ્યુનિસિપલ કોર્પોરેશનના આરોગ્ય વિભાગ દ્વારા શહેરભરમાં હાથ ધરવામાં આવેલા સઘન ચેકિંગ અભિયાન દરમિયાન કુલ ૪૭ ખાદ્ય પ્રતિષ્ઠાનો અને આઉટલેટ્સ પર દરોડા પાડવામાં આવ્યા હતા. આ કાર્યવાહી દરમિયાન મોટી માત્રામાં વાસી અને અખાદ્ય જથ્થો જપ્ત કરવામાં આવ્યો હતો.આ તપાસ દરમિયાન શાળાઓ અને આંગણવાડીઓમાં બાળકોને ભોજન પૂરું પાડતી જાણીતી કેટરિંગ એજન્સી 'પારસ એગ્રો' પર પણ ફૂડ વિભાગની ટીમ ત્રાટકી હતી. મનપાની ટીમ દ્વારા પારસ એગ્રોમાંથી ગુણવત્તા ચકાસવા માટે જુદા જુદા ૮ જેટલા ખાદ્ય નમૂના લેવામાં આવ્યા છે, જેને લેબોરેટરી પરીક્ષણ માટે મોકલી આપવાની તજવીજ હાથ ધરવામાં આવી છે.પારસ એગ્રોના મેનેજરે નિવેદન આપતા જણાવ્યું છે કે તેમની સંસ્થા સામે થઈ રહેલી આ કાર્યવાહી પાયાવિહોણી છે અને તેમને તથા તેમની સંસ્થાને જાણી જોઈને બદનામ કરવા માટેનું એક મોટું ષડયંત્ર રચવામાં આવી રહ્યું છે. આ મામલે તંત્ર દ્વારા આગામી દિવસોમાં લેબોરેટરીના રિપોર્ટના આધારે વધુ કડક પગલાં લેવામાં આવશે તેવી શક્યતા છે.

સુરત,ઉદયપુર-સુરત વંદે ભારત ટ્રેનના કાચ તોડ્યા હતા,  સીસીટીવી ફૂટેજના આધારે પોલીસની કાર્યવાહીઉદયપુરથી સુરત આવતી વંદે ભારત એક્સપ્રેસ ટ્રેન પર અગાઉ અસામાજિક તત્વો દ્વારા પથ્થરમારો કરવામાં આવ્યો હતો. આ હુમલા દરમિયાન ટ્રેનના કોચ નંબર સી-૬ની બારીના કાચ તૂટી ગયા હતા.ઘટનાસ્થળ અને આસપાસના વિસ્તારના સીસીટીવી ફૂટેજની ઝીણવટભરી ચકાસણી કરવામાં આવી હતી. જેના આધારે પોલીસે પથ્થરમારો કરનાર મુખ્ય શખ્સોની ઓળખ કરી લીધી હતી અને કડક કાર્યવાહી કરીને આ પ્રકરણમાં સંડોવાયેલા ત્રણ આરોપીઓની ધરપકડ કરી લીધી છે. માત્ર મસ્તી ખાતર તેઓએ પથ્થરમારો કર્યો હોવાનું આરોપીઓ જણાવી રહ્યા છે. રેલવે સુરક્ષા દળ દ્વારા આ મામેલ વધુ તપાસ હાથ ધરવામાં આવી છે જેથી ભવિષ્યમાં આવી ઘટનાઓનું પુનરાવર્તન ન થાય.

નવી દિલ્હી,આત્મકથાના અનાવરણ પહેલા સોશિયલ મીડિયા પર વીડિયો શેર કરીને યાદો તાજી કરી કોંગ્રેસના દિગ્ગજ નેતા સોનિયા ગાંધીએ તેમની આગામી આત્મકથા ‘બિલોંગિંગ: અ જર્ની ઓફ લવ’ના સંદર્ભમાં એક વીડિયો સોશિયલ મીડિયા પર શેર કર્યો છે, જેના કારણે રાજકીય અને સાહિત્યિક વર્તુળોમાં ભારે ચર્ચા જાગી છે. આ વીડિયોમાં તેમણે તેમના અંગત જીવન અને ભૂતકાળની યાદોને તાજી કરી છે.સોનિયા ગાંધીની આ આત્મકથામાં વર્ષ ૧૯૬૫ની યાદોનો ઉલ્લેખ કરવામાં આવ્યો છે, જ્યારે તેઓ ઇંગ્લેન્ડના કેમ્બ્રિજ ખાતે અભ્યાસ કરી રહ્યા હતા. આ દરમિયાન કેમ્બ્રિજની એક ગ્રીક રેસ્ટોરાંમાં તેમની મુલાકાત રાજીવ ગાંધી સાથે થઈ હતી, જ્યાંથી તેમની પ્રેમકથાની શરૂઆત થઈ હતી. પ્રખ્યાત પ્રકાશન સંસ્થા ‘હાર્પરકોલિન્સ ઇન્ડિયા’  દ્વારા આ પુસ્તક આગામી ૧૦ નવેમ્બરે સત્તાવાર રીતે રિલીઝ કરવામાં આવશે, જેમાં ઇટાલીથી લઈને ભારત સુધીની તેમની સફર અને જીવનના મહત્વના સંસ્મરણો જોવા મળશે.

નવી દિલ્હી,ભારતીય દૂતાવાસે તમામ નાગરિકો હેમખેમ હોવાની કરી સત્તાવાર પુષ્ટિયમનના ઝુકાર ટાપુ નજીક દરિયાઈ માર્ગે જઈ રહેલા એક ઓમાની ધ્વજવાળા વહાણ પર અચાનક ભીષણ હુમલો કરવામાં આવતા વહાણમાં ભીષણ આગ ફાટી નીકળી હતી. આ વહાણમાં કુલ ૧૪ જેટલા ભારતીય ખલાસીઓ સવાર હતા, જેઓ ગુજરાતના જામનગર જિલ્લાના સલાયા અને સિક્કા પંથકના વતની છે. આ ગંભીર કટોકટીની સ્થિતિમાં યમનના સ્થાનિક તંત્ર દ્વારા તાત્કાલિક ધોરણે બચાવ કામગીરી હાથ ધરવામાં આવી હતી, જેના પરિણામે તમામ ૧૪ નાગરિકોને સુરક્ષિત રીતે રેસ્ક્યુ કરી લેવામાં આવ્યા છે. બચાવ્યા બાદ તમામ ખલાસીઓને હુદૈદાહ વિસ્તારની એક સુરક્ષિત હોટલમાં ખસેડવામાં આવ્યા છે અને તેમને પ્રાથમિક સુવિધાઓ પૂરી પાડવામાં આવી છે. આ મામલે ભારતીય દૂતાવાસે સત્તાવાર પુષ્ટિ કરી છે કે તમામ ખલાસીઓ સુરક્ષિત છે.

રાજકોટ, પોલીસે 29 ઓક્ટોબરથી 25 નવેમ્બર સુધીનું જાહેરનામું બહાર પાડ્યુંરાજકોટ ડીસીપી જગદીશ બાંગરવા દ્વારા બહાર પાડવામાં આવેલા જાહેરનામા અનુસાર આગામી ૨૯ ઓક્ટોબરથી ૨૫ નવેમ્બર સુધી માત્ર અધિકૃત લાયસન્સ ધરાવતા વેપારીઓ જ નક્કી કરેલી નિયત જગ્યાઓ પર ફટાકડાનું વેચાણ કરી શકશે. વગર લાયસન્સે સ્ટોલ લગાવીને ફટાકડા વેચનાર સામે ત્વરિત કાયદાકીય કાર્યવાહી કરવામાં આવશે. આ ઉપરાંત, શહેરમાં અવાજ અને પર્યાવરણના પ્રદૂષણને અટકાવવા માટે ભારે અવાજ ધરાવતા ફટાકડા તેમજ સિરીઝ (લૂમ) ફટાકડાના વેચાણ અને ઉપયોગ પર કડક પ્રતિબંધ ફરમાવવામાં આવ્યો છે. પોલીસ પ્રશાસન દ્વારા તમામ વિસ્તારોમાં સતત પેટ્રોલિંગ અને ચેકિંગ હાથ ધરવામાં આવશે જેથી નિયમોનું ઉલ્લંઘન કરનારાઓ સામે કડક ફોજદારી પગલાં ભરી શકાય.

મોરબી,સિદસર ઉમિયાધામના ઉપપ્રમુખની મધ્યસ્થી બાદ ગાંધીનગરમાં યોજાઈ ઉચ્ચસ્તરીય બેઠકમોરબી પંથકના જેતપર વિસ્તારમાં ખેડૂતો દ્વારા તેમની વિવિધ પડતર માંગણીઓને લઈને સરકાર સામે કુલ ૨૪ જેટલા મહત્વના મુદ્દાઓ રજૂ કરવામાં આવ્યા હતા, જેમાંથી અગાઉ સરકાર અને ખેડૂત આગેવાનો વચ્ચે ૨૧ મુદ્દાઓ પર સફળ સહમતી સધાઈ ચૂકી છે. જોકે, બાકી રહેલા ૩ મહત્વના મુદ્દાઓ પર હજુ પણ ચર્ચા ચાલી રહી હતી.

આ મામલાના કાયમી ઉકેલ માટે સિદસર ઉમિયાધામના ઉપપ્રમુખ જગદીશ કોટડિયાએ વિશેષ મધ્યસ્થી ભૂમિકા ભજવી ગાંધીનગર ખાતે મુખ્યમંત્રી તેમજ કૃષિમંત્રીની ઉપસ્થિતિમાં એક ઉચ્ચસ્તરીય બેઠક યોજાઈ હતી, જેમાં હાઈ-વોલ્ટેજ પાવર લાઈન અને કોરિડોરના વળતર તથા જમીનના ભાવ નક્કી કરવાની પદ્ધતિ જેવા મહત્વના વિષયો પર સકારાત્મક ચર્ચાઓ કરવામાં આવી હતી. જમીન વળતરની ગણતરીમાં સુધારો કરીને ખેડૂતોને વધુ ન્યાયી વળતર મળે તે દિશામાં સરકાર ટૂંક સમયમાં જ આખરી નિર્ણય જાહેર કરશે તેવી પૂરી સંભાવના છે.

અમદાવાદ,વેરહાઉસના પતરાં તોડીને આઇફોન અને લેપટોપ ચોરાયા, સીસીટીવીમાં તસ્કરો કેદ સનાથલ સર્કલ નજીક નવાપુરા ગામની સીમમાં સ્થિત ‘ઇન્ગ્રામ માઇક્રો’ કંપનીના વેરહાઉસના પાછળના ભાગે આવેલા ખુલ્લા ખેતર તરફથી મોડી રાત્રે ઘૂસેલા ચોરોએ છતનાં પતરાં તોડીને અંદર પ્રવેશ કર્યો હતો અને ફિલ્મી ઢબે કરોડો રૂપિયાની મત્તા ચોરી કરી ગયા હતા.ચોરો વેરહાઉસમાંથી ૪૦ નંગ iPhone-17, ૩૦ નંગ iPhone-16, ૩૬ Apple Watch, ૨૦ iPad કીબોર્ડ તેમજ Dell અને HP કંપનીના ૨૬ લેપટોપ સહિત કુલ ₹૧ કરોડના કિંમતી ઇલેક્ટ્રોનિક ગેજેટ્સ ચોરીને ફરાર થઈ ગયા છે. વેરહાઉસમાં લાગેલા સીસીટીવી કેમેરામાં ચોરીની સમગ્ર ઘટના કેદ થઈ ગઈ છે. ચાંગોદર પોલીસે ગુનો નોંધી સીસીટીવી ફૂટેજના આધારે તસ્કરો તેમજ કોઈ જાણભેદુની સંડોવણી અંગે સઘન તપાસ હાથ ધરી છે.

રાજકોટ,દેવગામના સદભાવના બળદ આશ્રમમાં બળદ મૂકવા ખેડૂતોની કતારો રાજકોટના કાલાવડ રોડ પર આવેલા દેવગામ નજીકના સદભાવના બળદ આશ્રમમાં ખેડૂતો પોતાની આંખોમાં આંસુ અને ભારે હૈયે પોતાના વ્હાલસોયા ૬૦૦૦ જેટલા બળદોને છોડી જવા મજબૂર બન્યા છે. જામનગર, દ્વારકા, પોરબંદર અને કચ્છ જેવા જિલ્લાઓમાં ખેતી સંપૂર્ણપણે નિષ્ફળ જવાના કારણે અને રવિ સીઝનમાં પાક લેવાની કોઈ આશા ન રહેતા અન્નદાતાઓની હાલત અત્યંત કફોડી બની છે.ઘાસચારા અને પીવાના પાણીની ગંભીર તંગીના પગલે માત્ર ૨૦ દિવસના ટૂંકા સમયગાળામાં જ આશરે ૬૦૦૦ બળદો આશ્રમમાં આવી પહોંચ્યા છે. સામાન્ય દિવસોમાં ૧૫૦૦ થી ૨૦૦૦ બળદો સાચવતા આ આશ્રમમાં અચાનક બળદોનો પ્રવાહ વધતા દરરોજ અંદાજિત રૂ. ૧૨ લાખનો ખર્ચ થઈ રહ્યો છે, જ્યારે આગામી ઉનાળા સુધીમાં આ સંખ્યા વધીને ૧ લાખ સુધી પહોંચવાની આશંકા વ્યક્ત કરવામાં આવી રહી છે. આજીવિકા સમાન અને લાખો રૂપિયાની કિંમતના મૂગા પશુઓને વિરહની વેદના સાથે છોડીને જતા સમયે ખેડૂતો ધ્રુસકે ધ્રુસકે રડી પડ્યા હતા, જે સમગ્ર પ્રદેશની ગંભીર આર્થિક અને કુદરતી વિપત્તિની સાક્ષી પૂરે છે.

મોરબી,કંડલા અને પોરબંદરથી આવતા બળતણના ભાવો ઉછળતા ઉત્પાદન ખર્ચ વધ્યોઈરાન અને અમેરિકા વચ્ચે યુદ્ધ જેવી તણાવપૂર્ણ સ્થિતિ સર્જાઈ ત્યારથી જ મોરબીનો સિરામિક ઉદ્યોગ ગેસ સંકટ અને નિકાસ સંબંધિત મુશ્કેલીઓનો સામનો કરી રહ્યો છે. આ ઉપરાંત એક્સપોર્ટ બંધ થવા અને કન્ટેનરના ભાડામાં થયેલા વધારાથી ઉદ્યોગકારો પહેલેથી જ પરેશાન હતા, તેમાં હવે પ્રોપેન ગેસના ભાવોમાં ઝીંકાયેલા તોતિંગ વધારાએ સ્થિતિ વધુ વણસાવી છે.કંડલા અને પોરબંદરથી મોરબી તરફ સપ્લાય થતા પ્રોપેન ગેસના ભાવમાં એકસામટી પ્રતિ ટન રૂ. ૭૩૦૦નો ભયંકર વધારો કરવામાં આવ્યો છે. અગાઉ નેચરલ ગેસની સરખામણીએ પ્રોપેન ગેસ થોડો સસ્તો પડતો હોવાથી ઉદ્યોગકારો તેને વૈકલ્પિક બળતણ તરીકે વાપરીને પોતાનું ઉત્પાદન ચાલુ રાખતા હતા. પરંતુ હવે પ્રોપેન ગેસના ભાવ પણ નેચરલ ગેસની સમકક્ષ પહોંચી ગયા હોવાથી સસ્તા બળતણનો વિકલ્પ પણ ઉદ્યોગકારો પાસેથી છીનવાઈ ગયો છે. ઉત્પાદન ખર્ચમાં થયેલા આ અણધાર્યા વધારાથી મોરબીના સિરામિક ઉદ્યોગકારોની ચિંતાઓમાં ભારે વધારો થયો છે.