દિલ્હી,

પરિવારમાં લગ્ન, મૃત્યુ અને બાળકના જન્મ જેવા કારણો આપતા નેતાઓમાં રોષ

દિલ્હીના રામલીલા મેદાનમાં યોજાયેલી INDIA બ્લોકની મહત્વપૂર્ણ રેલીમાં ગેરહાજર રહેવું મધ્યપ્રદેશ યુથ કોંગ્રેસના 60 હોદ્દેદારોને ભારે પડ્યું છે. લોકસભામાં વિપક્ષના નેતા રાહુલ ગાંધી સહિતના દિગ્ગજ નેતાઓની ઉપસ્થિતિમાં યોજાયેલા આ શક્તિપ્રદર્શનમાં ભાગ ન લેવા બદલ પક્ષે 9 જિલ્લા પ્રમુખો સહિત 60 હોદ્દેદારોને તાત્કાલિક અસરથી સસ્પેન્ડ કરી દીધા છે.

સસ્પેન્ડ કરાયેલા આ નેતાઓમાં 5 ઉપપ્રમુખ, 14 મહામંત્રી અને 32 સચિવોનો પણ સમાવેશ થાય છે. આ કાર્યવાહી બાદ સસ્પેન્ડેડ નેતાઓએ પોતાની સફાઈમાં જણાવ્યું હતું કે તેઓ પરિવારમાં લગ્ન, બીમારી, કાકાનું અવસાન તેમજ ભત્રીજાના જન્મ જેવા અનિવાર્ય પારિવારિક પ્રસંગો અને કારણોસર રેલીમાં ઉપસ્થિત રહી શક્યા નહોતા. નેતાઓએ સંગઠનની આ એકતરફી કાર્યવાહી સામે નારાજગી વ્યક્ત કરીને દલીલ કરી હતી કે સસ્પેન્ડ કરતા અગાઉ તેમને નોટિસ આપીને ખુલાસો માંગવો જોઈતો હતો.