વર્ષ–2025ની વિદાયના સમયે જ વેસ્ટર્ન ડિસ્ટર્બન્સની અસરથી સૌરાષ્ટ્રમાં હવામાન પલ્ટી સર્જાયો છે. ઝાકળવર્ષા બાદ ભરશિયાળે પોરબંદર અને દેવભૂમિ દ્વારકા પંથકમાં કમોસમી વરસાદ વરસતા તાજેતરમાં માવઠાનો માર સહન કરનાર ખેડૂતોમાં ફરી એકવાર ચિંતાનું મોજું ફરી વળ્યું છે. વાદળછાયું વાતાવરણ, હળવો વરસાદ અને વધતી ભેજવાળી ઠંડીને કારણે ખેતી અને જનજીવન બંને પર અસર પડી રહી છે.

હવામાન વિભાગે આપેલી આગાહી મુજબ બુધવાર તા. 31 ડિસેમ્બરથી ગુરુવાર તા. 1 જાન્યુઆરી દરમિયાન રાજ્યના કચ્છ, બનાસકાંઠા, પાટણ, જામનગર, મોરબી અને દેવભૂમિ દ્વારકા સહિતના જિલ્લાઓમાં છુટાછવાયા સ્થળોએ ગાજવીજ સાથે હળવાથી મધ્યમ વરસાદ પડી શકે છે. આ આગાહીને પગલે સૌરાષ્ટ્રના દરિયાકાંઠા વિસ્તારોમાં સવારથી જ વાદળછાયું વાતાવરણ જોવા મળ્યું હતું.

દેવભૂમિ દ્વારકા જિલ્લાના અનેક વિસ્તારોમાં સવારથી વાતાવરણમાં પલ્ટો આવ્યો હતો. કેટલાક સ્થળોએ હળવા છાંટા વરસ્યા હતા, જેના કારણે સૂર્યનારાયણના દર્શન મોડા થયા હતા. સાથે સાથે ઠંડીનું જોર પણ વધતા જનજીવન પ્રભાવિત બન્યું છે. હવામાનમાં આવેલા ફેરફારને કારણે તાવ, શરદી અને અન્ય વાયરસજન્ય રોગોના કેસોમાં પણ વધારો નોંધાઈ રહ્યો છે.

પોરબંદર પંથકમાં પણ કમોસમી વરસાદની અસર જોવા મળી હતી. ઝાકળવર્ષા બાદ ફરી વરસાદી માહોલ સર્જાતા ખેડૂતોએ ઉભા પાક અને કાપણી બાદના પાકને લઈ ચિંતા વ્યક્ત કરી છે. ખાસ કરીને ઘઉં, જીરુ, ડુંગળી અને શાકભાજીના પાકને નુકસાન થવાની ભીતિ સેવાઈ રહી છે.

હવામાન વિભાગના જણાવ્યા મુજબ જામનગર શહેરમાં ભેજનું પ્રમાણ 80 ટકા સુધી પહોંચી ગયું હતું. વહેલી સવારથી ધુમ્મસવાળું વાતાવરણ રહેતા સૂર્યનારાયણ સવારે 9 વાગ્યા બાદ દેખાયા હતા. શહેરમાં લઘુતમ તાપમાન 1.6 ડિગ્રી વધીને 16 ડિગ્રી નોંધાયું હતું, જ્યારે મહત્તમ તાપમાનમાં એક ડિગ્રી ઘટાડો થઈ 28.5 ડિગ્રી રહ્યું હતું. પવનની ગતિ પ્રતિ કલાક સરેરાશ 2.3 કિલોમીટર નોંધાઈ હતી.

ખેતીવાડી વિભાગે ખેડૂતોને કમોસમી વરસાદથી પાકને બચાવવા આગોતરા પગલાં લેવા અપીલ કરી છે. ખેતરમાં કાપણી કરેલો પાક જો ખુલ્લો હોય તો તેને તાત્કાલિક સલામત સ્થળે ખસેડવા અથવા પ્લાસ્ટિક કે તાડપત્રીથી યોગ્ય રીતે ઢાંકવાની સલાહ આપવામાં આવી છે. ઢગલાની આસપાસ માટીનો પાળો બનાવી વરસાદી પાણી અંદર ન જાય તેવું આયોજન કરવા પણ સૂચન કરવામાં આવ્યું છે. આ સમયગાળા દરમિયાન ખાતર અને જંતુનાશક દવાઓનો ઉપયોગ ટાળવાની પણ સલાહ અપાઈ છે.

ખાતર અને બિયારણનો જથ્થો ભીનો ન થાય તે માટે તેને સુરક્ષિત સ્થળે રાખવા અનુરોધ કરવામાં આવ્યો છે. એ.પી.એમ.સી માર્કેટ યાર્ડમાં વેપારીઓ અને ખેડૂતોને પણ આગોતરી સાવચેતી રાખવા સૂચના આપવામાં આવી છે, જેથી કૃષિ ઉપજને નુકસાન ન થાય.

જૂનાગઢ કૃષિ યુનિવર્સિટીના આંકડાઓ અનુસાર આજે સવારના સમયે વાતાવરણમાં ભેજનું પ્રમાણ 81 ટકા નોંધાયું હતું. પવનની ગતિ પ્રતિ કલાક 2થી 3 કિલોમીટર વચ્ચે રહી હતી. લઘુતમ તાપમાનમાં પણ થોડો ફેરફાર જોવા મળ્યો હતો.

આજે વહેલી સવારના તાપમાન પર નજર કરીએ તો નલિયામાં 15.6 ડિગ્રી, રાજકોટમાં 15, પોરબંદરમાં 14.5, વેરાવળમાં 18.6, ઓખામાં 20.7, અમદાવાદમાં 15.3, અમરેલીમાં 13.8, વડોદરામાં 15.8, ભાવનગરમાં 16.6, દમણમાં 16, ડિસામાં 14.4, દિવમાં 15.5, દ્વારકામાં 20.5, ગાંધીનગરમાં 13 અને કંડલામાં 17.3 ડિગ્રી લઘુતમ તાપમાન નોંધાયું હતું.

હવામાન વિભાગે આગામી બે દિવસ કમોસમી વરસાદની શક્યતા વ્યક્ત કરી છે. ખેડૂતો માટે કિસાન કોલ સેન્ટરનો ટોલ ફ્રી નંબર 18001801551 જાહેર કરવામાં આવ્યો છે, જ્યાંથી ખેતી સંબંધિત માર્ગદર્શન મેળવી શકાય છે.

કુલ મળીને, વર્ષના અંતિમ દિવસોમાં હવામાનની અચાનક પલ્ટીથી સૌરાષ્ટ્રમાં ખેતી, આરોગ્ય અને દૈનિક જીવન પર અસર પડી રહી છે. ખેડૂતો અને નાગરિકોએ સાવચેતી રાખવી અને વિભાગની સૂચનાઓનું પાલન કરવું જરૂરી બની ગયું છે.