રાજકોટ,
 
રાજકોટના મોટામવા વિસ્તારમાં આવેલ ૬૬ કેવી સબ-સ્ટેશનમાં ધડાકો થતા વીજ પુરવઠો ખોરવાયો

શહેરના મોટામવા વિસ્તારમાં આવેલા ૬૬ કે.વી.  સબ-સ્ટેશનમાં અચાનક ટેકનિકલ ખામી સર્જાતા ભડાકા સાથે બ્લાસ્ટ થયો હતો. આ અકસ્માતના કારણે વિસ્તારમાં અચાનક બિનઅધિકૃત પાવર કટ થઈ ગયો હતો અને અંદાજે ૩,૦૦૦ જેટલા મકાનોમાં વીજપુરવઠો સંપૂર્ણપણે ખોરવાઈ ગયો હતો.

કાળઝાળ ગરમી અને ઉકળાટ વચ્ચે વીજળી ગુલ થઈ જવાથી મોટામવા વિસ્તારના રહીશો ત્રાહિમામ્ પોકારી ઉઠ્યા હતા. નાના બાળકો, વડીલો અને દર્દીઓને ભારે હાલાકીનો સામનો કરવો પડ્યો હતો. ઘટનાની જાણ થતાં જ વીજ કંપનીના ઉચ્ચ અધિકારીઓ અને ટેકનિકલ ટીમો તાત્કાલિક ઘટનાસ્થળે દોડી ગઈ હતી અને યુદ્ધના ધોરણે રિપેરિંગ કામગીરી હાથ ધરીને વીજ પુરવઠો પૂર્વવત કરવાના પ્રયાસો શરૂ કર્યા હતા.