ગુજરાતમાં છેલ્લા બે દિવસથી બોમ્બથી ઉડાવી દેવાની ધમકીઓનો સિલસિલો જોવા મળી રહ્યો છે, જેના કારણે શાળા અને કોર્ટ પરિસરોમાં ચકચાર મચી છે. પહેલાં રાજ્યની અનેક શાળાઓને ધમકીભર્યા ઈમેઇલ મળ્યા હતા અને હવે અમદાવાદ, વડોદરા, રાજકોટ, ગાંધીનગર, મહેસાણા અને વલસાડની કોર્ટોને નિશાન બનાવવામાં આવી છે. પોલીસ અને સાયબર ક્રાઈમ શાખા તાત્કાલિક હરકતમાં આવી તપાસ શરૂ કરી છે.

વડોદરાના અમિતનગર સર્કલ પાસે આવેલી બ્રાઇટ સ્કૂલને 16 ફેબ્રુઆરીએ સાંજે 5:32 વાગ્યે એક ઈમેઇલ મળ્યો હતો, જેમાં લખાયું હતું કે શાળામાં બોમ્બ મૂકવામાં આવ્યો છે અને સવારે 8 વાગ્યે વિસ્ફોટ થશે, તેથી આવતીકાલે રજા રાખવામાં આવે. શરૂઆતમાં આ ધમકી ગંભીર માનવામાં આવી અને પોલીસ તેમજ બોમ્બ-ડોગ સ્ક્વોડ દ્વારા સર્ચ ઓપરેશન હાથ ધરાયું, પરંતુ સ્થળ પરથી કોઈ શંકાસ્પદ વસ્તુ મળી નહોતી.

પોલીસ તપાસમાં ચોંકાવનારી હકીકત સામે આવી કે આ ઈમેઇલ અન્ય કોઈએ નહીં પરંતુ શાળાના જ ધોરણ 5માં ભણતા વિદ્યાર્થીએ મોકલ્યો હતો. પૂછપરછ દરમિયાન જાણવા મળ્યું કે વિદ્યાર્થીએ બીજા દિવસે રજા જાહેર થાય તે આશયથી આ મેઈલ મોકલ્યો હતો. હાલ પોલીસે વિદ્યાર્થી અને તેના પરિવાર સાથે વધુ પૂછપરછ શરૂ કરી છે અને સાયબર માધ્યમ દ્વારા મેઈલ મોકલવાની પ્રક્રિયા અંગે પણ તપાસ કરી રહી છે.

શાળાની ઘટનાના બીજા જ દિવસે રાજ્યની વિવિધ કોર્ટોને પણ સમાન પ્રકારની ધમકીઓ મળી. વડોદરા જિલ્લા કોર્ટ, દિવાળીપુરા ખાતે બોમ્બ ધમકી મળતા જ પોલીસ, ક્રાઇમ બ્રાન્ચ, PCB, SOG અને BDDSની ટીમો સ્થળ પર પહોંચી ગઈ હતી. કોર્ટ પરિસર ખાલી કરાવવામાં આવ્યું અને વકીલો તથા અરજદારોને સુરક્ષિત બહાર કાઢવામાં આવ્યા. તપાસ દરમિયાન કોઈ શંકાસ્પદ સામગ્રી મળી નથી.

વલસાડ કોર્ટના અધિકૃત ઈમેઇલ આઈડી પર અજાણ્યા શખ્સ દ્વારા બોમ્બથી ઉડાવી દેવાની ધમકી મળતાં DySP એ.કે. વર્મા સહિતનો પોલીસ કાફલો ઘટનાસ્થળે પહોંચ્યો હતો. 19 કોર્ટ રૂમ સહિત સમગ્ર પરિસર ખાલી કરાવવામાં આવ્યું અને બોમ્બ ડિસ્પોઝલ સ્ક્વોડ દ્વારા સર્ચ ઓપરેશન હાથ ધરાયું. SOG અને LCBની ટીમો પણ તપાસમાં જોડાઈ છે.

અમદાવાદ ગ્રામ્ય કોર્ટને વહેલી સવારે 4:07 વાગ્યે ઈમેઇલ મળ્યો હતો, જેમાં લંચ દરમિયાન RDX અને IED વડે વિસ્ફોટ કરવાની ધમકી આપવામાં આવી હતી. જોકે, ત્યાં રાબેતા મુજબ કામગીરી ચાલુ રહી અને કોર્ટ પરિસરમાં કોઈ ભયનો માહોલ જોવા મળ્યો નથી. મહેસાણા જિલ્લા કોર્ટને પણ સમાન પ્રકારનો મેઈલ મળતાં સાવચેતીના પગલાં રૂપે સમગ્ર સંકુલ ખાલી કરાયું હતું.

રાજકોટ કોર્ટને બપોરે 12:20 વાગ્યે બોમ્બ ધમકી મળ્યાની માહિતી સામે આવી હતી. રાજકોટના જાણીતા એડવોકેટ કમલેશ ડોડિયાએ જણાવ્યું હતું કે આ સરકારને બદનામ કરવા અને ગુજરાતની શાંતિ ડહોળવાનો પ્રયાસ છે. તેમણે સરકાર પર વિશ્વાસ વ્યક્ત કરી કડક કાર્યવાહી કરવાની માંગ કરી હતી. સરકારી વકીલ પ્રકાશ ઠક્કરે પણ આ ઘટનાની ઉચ્ચ સ્તરે અને કડક તપાસ કરવાની જરૂરિયાત જણાવી હતી.

DCP ઝોન 2 મંજીતા વણઝારાએ જણાવ્યું કે ગઈકાલે શાળાઓને અને આજે કોર્ટોને મળેલા ઈમેઇલ એક જ સોર્સમાંથી આવ્યા છે કે નહીં તેની સાયબર એક્સપર્ટ્સ તપાસ કરી રહ્યા છે. પોલીસ દ્વારા સમગ્ર પરિસરમાં સઘન ચેકિંગ ચાલી રહ્યું છે અને હાલ કોઈને ગભરાવાની જરૂર નથી.

ઉલ્લેખનીય છે કે 16 ફેબ્રુઆરીની સવારમાં વડોદરા અને અમદાવાદની કુલ 40 શાળાઓને બોમ્બથી ઉડાવી દેવાની ધમકી આપવામાં આવી હતી. કેટલાક ઈમેઇલમાં રાજકીય નેતાઓને ટાર્ગેટ કરતી ભાષા પણ લખાઈ હતી. જોકે તમામ શાળાઓમાં તપાસ બાદ કોઈ શંકાસ્પદ વસ્તુ મળી નહોતી.

આ સમગ્ર ઘટનાક્રમે રાજ્યભરમાં ચિંતાનો માહોલ ઊભો કર્યો છે, પરંતુ પોલીસ અને તંત્ર સજ્જ છે અને આધુનિક ટેકનોલોજી દ્વારા આરોપીઓને શોધવાની દિશામાં પ્રયાસ કરી રહ્યું છે. નાગરિકોને અફવાઓથી દૂર રહી સતર્ક રહેવાની અપીલ કરવામાં આવી છે.