ભારતે પોતાની સૈન્ય ક્ષમતાને વધુ મજબૂત અને આધુનિક બનાવવાના દિશામાં એક મોટો અને ઐતિહાસિક નિર્ણય લીધો છે. કેન્દ્ર સરકારએ ભૂમિસેના, નૌસેના અને વાયુસેનાને વધુ શક્તિશાળી બનાવવા માટે આશરે 79,000 કરોડ રૂપિયાના સંરક્ષણ સાધનો અને હથિયારો ખરીદવાના પ્રસ્તાવને મંજૂરી આપી છે. આ નિર્ણય સંરક્ષણ મંત્રી રાજનાથ સિંહની અધ્યક્ષતામાં યોજાયેલી બેઠકમાં લેવાયો છે. આ નિર્ણય બાદ એશિયાના પડોશી દેશો ચીન અને પાકિસ્તાનની ચિંતા વધવી સ્વાભાવિક છે.
 

રક્ષા અધિગ્રહણ પરિષદનો મોટો નિર્ણય

ભારતની ત્રણેય સેનાઓ માટે નવા શસ્ત્રો અને સાધનોની ખરીદી અંગે નિર્ણય લેતી સર્વોચ્ચ સંસ્થા રક્ષા અધિગ્રહણ પરિષદ (Defence Acquisition Council) દ્વારા અનેક મહત્ત્વના પ્રસ્તાવોને મંજૂરી આપવામાં આવી છે. આ ખરીદીઓ ભારતની સીમાઓની સુરક્ષા, આતંકવાદ સામે લડત અને ભવિષ્યના સંભવિત યુદ્ધોની તૈયારીને ધ્યાનમાં રાખીને કરવામાં આવી છે.
 

થલસેનાની તાકાતમાં મોટો વધારો

આ સંરક્ષણ સોદાનો મોટો હિસ્સો ભારતીય થલસેનાને વધુ ઘાતક અને ટેકનોલોજીથી સજ્જ બનાવવાનો છે. પ્રસ્તાવ મુજબ થલસેનાને લોઈટર મ્યુનિશન સિસ્ટમ મળશે, જેને “કેમિકાઝી ડ્રોન” તરીકે પણ ઓળખવામાં આવે છે. આ સિસ્ટમ દુશ્મનના મહત્વના ઠેકાણાઓ પર નિશાન સાધીને ચોક્કસ હુમલો કરી શકે છે.

આ ઉપરાંત, લો-લેવલ લાઈટ વેઈટ રડાર ખરીદવામાં આવશે, જે સરહદ પર ઉડતા નાના કે મોટા ડ્રોનને તરત ઓળખી શકે છે. આ રડાર ડ્રોનને ટ્રેક કરીને તેનો નાશ કરવામાં મદદરૂપ થશે, જે ખાસ કરીને ચીન અને પાકિસ્તાન તરફથી વધતા ડ્રોન ખતરા સામે અત્યંત ઉપયોગી સાબિત થશે.

ભારતના સ્વદેશી પિનાકા રોકેટ લોન્ચર સિસ્ટમ માટે લાંબી રેન્જના ગાઈડેડ રોકેટ્સ પણ વિકસાવવામાં આવશે. આથી પિનાકાની રેન્જ અને ચોકસાઈ બંનેમાં વધારો થશે અને દૂર આવેલા દુશ્મનના ઠેકાણાઓને સરળતાથી ટાર્ગેટ કરી શકાશે. સાથે જ Integrated Drone Detection and Interdiction System Mk-II પણ થલસેનાને મળશે, જે ડ્રોન યુદ્ધ સામે મજબૂત ઢાલ બની રહેશે.
 

નૌસેનાની દરિયાઈ શક્તિ વધુ મજબૂત

આ સોદાથી ભારતીય નૌસેનાની ક્ષમતામાં પણ નોંધપાત્ર વધારો થશે. નૌસેના માટે બોલાર્ડ પુલ ટગ્સ ખરીદવાનો નિર્ણય લેવાયો છે. આ શક્તિશાળી નાનાં જહાજો મોટા યુદ્ધજહાજોને બંદર અથવા સંકટ સમયે સુરક્ષિત રીતે ખસેડવામાં મદદ કરે છે.

યુદ્ધકાળીન સંદેશાવ્યવહાર માટે નૌસેનાને હાઈ ફ્રીક્વન્સી સોફ્ટવેર ડિફાઈન્ડ રેડિયો સિસ્ટમ મળશે, જેના દ્વારા અવાજ અને ડેટા સુરક્ષિત રીતે લાંબા અંતરે મોકલી શકાય છે.

આ ઉપરાંત, HALE (High Altitude Long Endurance) ડ્રોન નૌસેનાને આપવામાં આવશે, જે 24 કલાકથી વધુ સમય સુધી ખૂબ ઊંચાઈએ ઉડી શકે છે. આ ડ્રોન હિંદ મહાસાગરમાં સતત દેખરેખ, ગુપ્તચર માહિતી એકત્રિત કરવી અને દરિયાઈ સુરક્ષા મજબૂત બનાવવામાં મહત્ત્વની ભૂમિકા ભજવશે.
 

વાયુસેનાને આધુનિક ટેકનોલોજી

વાયુસેનાને પણ આ ડીલ હેઠળ અત્યાધુનિક સાધનો મળશે. તેમાં ઓટોમેટિક ટેક-ઓફ અને લેન્ડિંગ રેકોર્ડિંગ સિસ્ટમનો સમાવેશ થાય છે, જે દરેક ઉડાનની હાઈ-ડેફિનેશન રેકોર્ડિંગ કરશે. આ સિસ્ટમ અકસ્માત કે ટેકનિકલ ખામીના કારણો શોધવામાં મદદરૂપ બનશે.

વાયુસેનાને Astra Mk-2 એર-ટુ-એર મિસાઈલ પણ મળશે, જે લાંબી રેન્જથી દુશ્મનના વિમાનને તોડી પાડવાની ક્ષમતા ધરાવે છે. ઉપરાંત, સામાન્ય બોમ્બને સ્માર્ટ બોમ્બમાં ફેરવતી SPICE-1000 ગાઈડન્સ કિટ પણ વાયુસેનાને આપવામાં આવશે, જેના કારણે નિશાન પર અત્યંત ચોક્કસ હુમલો શક્ય બનશે.
 

ચીન-પાકિસ્તાન માટે ચેતવણી

ભારતનો આ મોટો સંરક્ષણ સોદો સ્પષ્ટ સંકેત આપે છે કે દેશ પોતાની સુરક્ષા સાથે કોઈ સમજૂતી કરવા તૈયાર નથી. ચીન દ્વારા સરહદ પર વધતી દાદાગીરી અને પાકિસ્તાન દ્વારા આતંકવાદને મળતા સમર્થનના પરિપ્રેક્ષ્યમાં આ નિર્ણયને વ્યૂહાત્મક રીતે અત્યંત મહત્વનો માનવામાં આવી રહ્યો છે.

આ રીતે 79,000 કરોડ રૂપિયાનું આ સંરક્ષણ પેકેજ ભારતની સૈન્ય તૈયારીને નવા સ્તરે લઈ જશે અને આવનારા સમયમાં દેશની સુરક્ષા વધુ મજબૂત બનશે.