અમદાવાદ,

અમદાવાદ મ્યુનિસિપલ કોર્પોરેશન દ્વારા શહેરને પૂરું પાડવામાં આવતાં નર્મદાના પાણીની દૈનિક આવક અને તેના દૈનિક વપરાશ વચ્ચે મોટો તફાવત સર્જાયો છે. નર્મદાની કેનાલમાંથી શહેરમાં થતી પાણીની આવક કરતાં નાગરિકો અને ઉદ્યોગો દ્વારા થતો દૈનિક વપરાશ નોંધપાત્ર રીતે વધી ગયો છે, જેના કારણે ભવિષ્યમાં શહેરના વિવિધ વિસ્તારોમાં કાયમી પાણી કાપ ઝીંકાય તેવી શક્યતા સેવાઈ રહી છે.

અમદાવાદ શહેરનો વિસ્તાર અને વસ્તી સતત વધી રહ્યાં હોવાથી પાણીની માંગમાં દર વર્ષે તીવ્ર ઉછાળો આવી રહ્યો છે. શહેરમાં કોતરપુર અને જાસપુર સ્થિત વોટર ટ્રીટમેન્ટ પ્લાન્ટ્સ દ્વારા લાખો ગેલન પાણી શુદ્ધ કરીને પૂર્વ અને પશ્ચિમ વિસ્તારના નાગરિકો સુધી પહોંચાડવામાં આવે છે. જોકે, મુખ્ય સ્ત્રોત સમાન સરદાર સરોવર નર્મદા કેનાલમાંથી મળતા જળજથ્થા સામે શહેરનો રોજિંદો વપરાશ વધી જતાં જળસંચયની સ્થિતિ ચિંતાજનક બની છે. આ સંજોગોમાં તંત્ર દ્વારા પાણીના બગાડ પર અંકુશ મેળવવા કડક પગલાં લેવાની વિચારણા ચાલી રહી છે. તાત્કાલિક ધોરણે જો યોગ્ય આયોજન અને જળ વ્યવસ્થાપન કરવામાં નહીં આવે તો અમદાવાદીઓને આગામી દિવસોમાં પાણી કાપનો સામનો કરવો પડી શકે છે.