નવી દિલ્હી,

ઉત્તરાખંડના પહાડી વિસ્તારોમાં હિમવર્ષા અને હિમાચલ પ્રદેશમાં ભારે વરસાદની આગાહી

રાજસ્થાનમાં કાળઝાળ ગરમી વચ્ચે કેટલાક વિસ્તારોમાં તીવ્ર ઝડપે ધૂળિયા વાવાઝોડા (આંધી) ફુંકાવાની શક્યતાને પગલે તંત્ર દ્વારા એલર્ટ આપવામાં આવ્યું છે. બીજી તરફ ઉત્તર પ્રદેશમાં સતત ઉપરવાસથી પાણીની આવક થતાં પવિત્ર ગંગા નદી રૌદ્ર સ્વરૂપ ધારણ કરીને ઉફાન પર આવી ગઈ છે. નદીના જળસ્તરમાં નોંધપાત્ર વધારો થતાં કાંઠાના નીચાણવાળા વિસ્તારોમાં પૂરના પાણી ફરી વળ્યા છે અને અનેક લોકોના ઘરો જળમગ્ન થઈ ગયા છે.

આ ઉપરાંત ઉત્તરાખંડના ઊંચાઈ વાળા પહાડી વિસ્તારો અને કેદારનાથ-બદ્રીનાથ જેવા ધામોમાં હિમવર્ષા (સ્નોફોલ) શરૂ થઈ ગઈ છે, જેના કારણે સમગ્ર વિસ્તારમાં ગુલાબી ઠંડીનો પ્રભાવ વધ્યો છે. જ્યારે પડોશી રાજ્ય હિમાચલ પ્રદેશમાં હવામાન વિભાગે આગામી ૩ દિવસ સુધી ભારે વરસાદ અને ગાજવીજની સંભાવના વ્યક્ત કરી છે, જેને પગલે પ્રવાસીઓ અને સ્થાનિક નાગરિકોને સાવચેત રહેવા અપીલ કરાઈ છે.