​રાજકોટ,

ચૌધરી હાઈસ્કૂલ ગ્રાઉન્ડ ખાતે થશે આયોજન; ઓનલાઈન રજિસ્ટ્રેશન અનિવાર્ય

રાજકોટ મહાનગરપાલિકા દ્વારા રાજકોટના નાગરિકો માટે આગામી તહેવારો અને જન્માષ્ટમી પર્વને અનુલક્ષીને શહેરમાં સૌપ્રથમવાર ભવ્ય 'મટકીફોડ' સ્પર્ધાનું આયોજન સત્તાવાર રીતે જાહેર કરવામાં આવ્યું છે.

​શહેરના મધ્યમાં આવેલા જાણીતા ચૌધરી હાઈસ્કૂલ ગ્રાઉન્ડ ખાતે આ ભવ્ય સ્પર્ધા યોજાનાર છે, જેમાં ભાગ લેવા માટે ઉત્સુક યુવા ગોવિંદાઓ અને મંડળોએ ઓનલાઈન રજિસ્ટ્રેશન કરાવવાનું રહેશે. મનપાના આ નવતર અભિગમને કારણે શહેરીજનો અને યુવક મંડળોમાં ભારે ઉત્સાહ જોવા મળી રહ્યો છે.

આ સ્પર્ધાને અત્યંત આકર્ષક અને સ્પર્ધાત્મક બનાવવા માટે મનપા દ્વારા ભારેખમ ઈનામોની જાહેરાત કરવામાં આવી છે. સ્પર્ધામાં વિજેતા બનનાર શ્રેષ્ઠ ટીમોને રૂ. ૧ લાખથી લઈને ૧.૫૦ લાખ સુધીના રોકડ પુરસ્કારો અર્પણ કરવામાં આવશે. આટલી મોટી રકમનું ઇનામ પ્રથમવાર રજૂ થવાથી યુવા વર્ગમાં ભારે થનગનાટ જોવા મળી રહ્યો છે.

​સાંસ્કૃતિક ધરોહરને જાળવી રાખવા અને યુવાનોમાં સાહસિક ખેલદિલીને પ્રોત્સાહન પૂરું પાડવાના હેતુથી આ કાર્યક્રમનું આયોજન કરાયું છે. મનપા દ્વારા સુરક્ષા અને વ્યવસ્થાના પણ ચુસ્ત બંદોબસ્ત સાથેના આયોજનો હાથ ધરવામાં આવ્યા છે, જેથી સ્પર્ધકો અને દર્શકો ઉત્સવનો સુરક્ષિત આનંદ માણી શકે.