રાજકોટ,
 
આજે વધુ રૂ. ૨૦નો ભાવવધારો ઝીંકાયો, કપાસિયા તેલ પણ રૂ. ૨૫ મોંઘું

તહેવારો અને લગ્નસરાની મોસમ પૂર્વે રાજકોટ સહિત સમગ્ર સૌરાષ્ટ્રના તેલ બજારમાં સીંગતેલના ભાવમાં માત્ર ત્રણ દિવસના ટૂંકા ગાળામાં ડબ્બે રૂ. ૫૦નો મોટો ઉછાળો નોંધાયો છે. આજે જ સીંગતેલમાં વધુ રૂ. ૨૦નો ભાવવધારો ઝીંકાતા ગૃહિણીઓનું માસિક બજેટ ખોરવાઈ ગયું છે.

સીંગતેલની સાથોસાથ કપાસિયા તેલમાં પણ છેલ્લા ત્રણ દિવસ દરમિયાન ડબ્બે રૂ. ૨૫નો વધારો ઝીંકવામાં આવ્યો છે. તેલ મિલરો અને મોટા વેપારીઓ દ્વારા 'મગફળી અને કાચા માલની ભારે અછત' હોવાનું બહાનું આગળ ધરીને ખાદ્યતેલોના ભાવો કૃત્રિમ રીતે વધારવામાં આવી રહ્યા હોવાના આક્ષેપ ઉઠ્યા છે.
સૌરાષ્ટ્રના તેલ બજારના સુત્રોના જણાવ્યા અનુસાર, મિલરો દ્વારા મગફળીની આવક ઓછી દર્શાવીને તેલના ભાવ બેકાબૂ બનાવવામાં આવી રહ્યા છે. એક તરફ સામાન્ય અને મધ્યમ વર્ગના લોકો મોંઘવારીનો સામનો કરી રહ્યા છે, ત્યારે અચાનક આવેલી આ તેજીને કારણે રિટેલ બજારમાં ગ્રાહકો અને વેપારીઓ બંને મુશ્કેલીમાં મુકાયા છે.