નાગપુર,

મહારાષ્ટ્ર વિધાન પરિષદની ચૂંટણીમાં રાષ્ટ્રીય સ્વયંસેવક સંઘ (RSS) અને ભાજપના અતિ-મજબૂત ગઢ ગણાતા નાગપુર સ્નાતક મતવિસ્તારની બેઠક પર કોંગ્રેસના ઉમેદવાર અભિજિત વણજારીએ શાનદાર વિજય મેળવ્યો છે. તેમણે ભાજપના અધિકૃત ઉમેદવાર સુધાકર કોહલેને 3,271 મતોના માર્જિનથી પરાજય આપ્યો છે.

નાગપુરમાં મુખ્યમંત્રી દેવેન્દ્ર ફડણવીસ અને કેન્દ્રીય મંત્રી નિતિન ગડકરી જેવા દિગ્ગજ નેતાઓની પકડ હોવા છતાં ભાજપ આ બેઠક બચાવવામાં નિષ્ફળ રહી છે. લાંબી ચાલેલી મતગણતરી અંતર્ગત કોંગ્રેસના અભિજિત વણજારીને કુલ 67,231 મત પ્રાપ્ત થયા હતા, જ્યારે ભાજપના સુધાકર કોહલેને 63,960 મત મળ્યા હતા. વણજારીની આ જીતથી મહારાષ્ટ્ર કોંગ્રેસ છાવણીમાં ભારે ઉત્સાહનો માહોલ જોવા મળી રહ્યો છે.