બોલિવૂડના લોકપ્રિય કોમેડિયન રાજપાલ યાદવ ફરી એકવાર કાનૂની મુશ્કેલીમાં ફસાયા છે. 15 વર્ષ જૂના ચેક બાઉન્સ કેસમાં દિલ્હી હાઈકોર્ટે તેમને જામીન આપવા ઈનકાર કર્યો છે. કોર્ટે સ્પષ્ટ શબ્દોમાં કહ્યું કે અરજદારે અનેક તક આપવામાં આવી હોવા છતાં લોનની રકમ સમયસર ચૂકવી નથી, તેથી આ તબક્કે સજા રોકવા કોઈ કારણ દેખાતું નથી. પરિણામે રાજપાલ યાદવને હાલ જેલમાં જ રહેવું પડશે અને કેસની આગામી સુનાવણી સોમવારે થશે.

મામલો 2010નો છે, જ્યારે રાજપાલ યાદવે પોતાની ફિલ્મ ‘અતા પતા લપતા’ બનાવવા માટે દિલ્હીના એક બિઝનેસમેન પાસેથી લગભગ 5 કરોડ રૂપિયાની લોન લીધી હતી. ફિલ્મ 2012માં રિલીઝ થઈ, પરંતુ બોક્સ ઓફિસ પર નિષ્ફળ ગઈ. આર્થિક નુકસાનને કારણે લોનની રકમ સમયસર ચૂકવવામાં આવી નહોતી. બાદમાં ચેક બાઉન્સનો કેસ દાખલ થયો અને વ્યાજ સહિત બાકી રકમ વધતી ગઈ. જણાવ્યા મુજબ આ રકમ હવે 9 કરોડ રૂપિયાની આસપાસ પહોંચી ગઈ છે.

5 ફેબ્રુઆરી, 2026ના રોજ રાજપાલ યાદવે દિલ્હીની તિહાર જેલમાં આત્મસમર્પણ કર્યું હતું. તેમની જામીન અરજી પર હાઈકોર્ટમાં સુનાવણી દરમિયાન ન્યાયાલયે કડક વલણ અપનાવ્યું. કોર્ટે પૂછ્યું કે જ્યારે અરજદારે પોતે લોન લેવાની અને ચૂકવવાની વાત સ્વીકારી છે, ત્યારે હવે સજા રદ કરવાની માંગ શા માટે કરવામાં આવી રહી છે? ન્યાયાલયે નોંધ્યું કે વર્ષો સુધી ચૂકવણી ન થતાં અને અગાઉના આદેશોની અવગણના થતાં જ આત્મસમર્પણની સ્થિતિ ઊભી થઈ છે.

રાજપાલ યાદવના વકીલે દલીલ કરી કે તેઓ મામલો સેટલ કરવા તૈયાર છે અને અત્યાર સુધીમાં 3 કરોડથી વધુ રકમ ચૂકવી દેવાઈ છે. બાકી રકમ માટે સમય માંગવામાં આવ્યો હતો. તેમ છતાં, હાઈકોર્ટે ટિપ્પણી કરી કે અરજદારને 25થી વધુ તક આપવામાં આવી હતી. મિડિએશન સેન્ટર સુધી જઈ ચૂકવણીનું વચન આપવામાં આવ્યું, પરંતુ તે પૂર્ણ થયું નહીં. “કાયદો કાયદો છે,” કહીને કોર્ટે સહાનુભૂતિ હોવા છતાં કાનૂની પ્રક્રિયા આગળ વધારવાની જરૂરિયાત જણાવી.

 

સુનાવણી દરમિયાન વકીલે વધુમાં કહ્યું કે બાકી રહેલી લગભગ 2.10 કરોડની રકમ જમા કરાવવા માટે પ્રયાસો ચાલી રહ્યા છે અને ફિલ્મ ઈન્ડસ્ટ્રીમાંથી મદદ મળી રહી છે. જોકે, હાઈકોર્ટે આ દલીલ પર સવાલ ઉઠાવતા જણાવ્યું કે વ્યક્તિગત સહાય અને સેલેબ્રિટી સપોર્ટનો કેસની કાનૂની સ્થિતિ સાથે સીધો સંબંધ નથી. જો ચુકવણી માટે સ્પષ્ટ અને વાસ્તવિક પગલાં લેવાશે તો જ આગળની પ્રક્રિયા પર વિચાર થશે.

આ મુશ્કેલ સમયે રાજપાલ યાદવને ફિલ્મ ઈન્ડસ્ટ્રીના અનેક સાથી કલાકારોનો સાથ મળ્યો છે. સમાચાર મુજબ, સલમાન ખાન, અજય દેવગન, વરુણ ધવન, સોનુ સૂદ સહિત લગભગ 14 સેલેબ્રિટીઓએ આર્થિક સહાય માટે આગળ આવ્યાનું કહેવાય છે. ફેડરેશન ઓફ વેસ્ટર્ન ઈન્ડિયા સિને એમ્પ્લોઇઝ (FWICE) દ્વારા પણ મદદ માટે અપીલ કરવામાં આવી છે. રાજપાલની પત્ની રાધાએ આ સહાય બદલ સૌનો આભાર વ્યક્ત કર્યો છે.

આ કેસ 2018માં વધુ ગંભીર બન્યો હતો, જ્યારે લોન ચૂકવણીમાં નિષ્ફળતા બાદ કોર્ટ કાર્યવાહી તેજ બની. અગાઉ પણ રાજપાલ યાદવ બે વાર જેલ સજા ભોગવી ચૂક્યા છે. તેમ છતાં બાકી રકમનો સંપૂર્ણ નિકાલ ન થતા મામલો ફરી કોર્ટ સુધી પહોંચ્યો છે. હાઈકોર્ટ હવે સ્પષ્ટ ચુકવણી યોજના અને કાનૂની બાંહેધરીની રાહ જોઈ રહી છે.

રાજપાલ યાદવ માટે આ સમય અત્યંત પડકારજનક છે. એક તરફ તેઓ લોકપ્રિય કોમેડિયન તરીકે જાણીતા છે, તો બીજી તરફ કાનૂની જવાબદારીમાંથી છૂટકારો મેળવવો તેમની માટે જરૂરી બન્યો છે. હાલ તો કોર્ટના આદેશ અનુસાર તેઓ જેલમાં જ રહેશે. આવનારી સુનાવણીમાં જો ચૂકવણી અંગે સંતોષકારક પ્રસ્તાવ રજૂ થશે તો જ તેમને રાહત મળવાની શક્યતા છે.