અમદાવાદ સહિત સમગ્ર ગુજરાતના મિલકત ખરીદદારો માટે રાહતજનક સમાચાર સામે આવ્યા છે. ગુજરાત રિયલ એસ્ટેટ રેગ્યુલેટરી ઓથોરિટી (Gujarat RERA) એ મિલકત ખરીદદારો, પ્રમોટર્સ અને અન્ય હિતધારકો માટે ફરિયાદ નિવારણ પ્રક્રિયાને વધુ ઝડપી, પારદર્શક અને સુવ્યવસ્થિત બનાવવા માટે એક વ્યાપક સ્ટાન્ડર્ડ ઓપરેટિંગ પ્રોસિજર (SOP) અમલમાં મૂકી છે. આ નવી SOP ખાસ કરીને ડિજિટલ-ફર્સ્ટ અભિગમ પર આધારિત છે, જેમાં હાલની ઓનલાઈન ફરિયાદ સિસ્ટમને વધુ મજબૂત અને અસરકારક બનાવવામાં આવી છે.

RERA દ્વારા જણાવવામાં આવ્યું છે કે, આ SOPનો મુખ્ય હેતુ મિલકત ખરીદદારોને ઝડપી ન્યાય આપવાનો છે અને સાથે સાથે પ્રમોટર્સને પણ નિર્ધારિત સમયમર્યાદામાં પોતાનો જવાબ રજૂ કરવાની યોગ્ય તક પૂરી પાડવાનો છે. છેલ્લા ઘણા સમયથી ફરિયાદોના વિલંબિત નિકાલ અંગે જે અસંતોષ હતો, તેને દૂર કરવા માટે આ નિર્ણય લેવામાં આવ્યો છે.
 

ઓનલાઇન ફરિયાદ નોંધણીને મળશે પ્રાથમિકતા

નવી SOP મુજબ, મિલકત ખરીદદારો હવે ઘરે બેઠા જ ગુજરાત RERAના સત્તાવાર પોર્ટલ પર ઓનલાઈન ફરિયાદ નોંધાવી શકશે. જો કે ઓફલાઇન ફરિયાદની સુવિધા ચાલુ રહેશે, પરંતુ ઝડપી અને અસરકારક નિકાલ માટે ઓનલાઈન ફરિયાદોને વધુ પ્રોત્સાહન આપવામાં આવશે. મહત્વપૂર્ણ બાબત એ છે કે, ઓનલાઈન ફરિયાદ નોંધાવ્યા બાદ ફરિયાદીએ સાત દિવસની અંદર તેની ફિઝિકલ કોપી RERA કચેરીમાં જમા કરાવવી ફરજિયાત રહેશે.
 

જરૂરી દસ્તાવેજોની ફરજિયાત રજૂઆત

ફરિયાદ પ્રક્રિયામાં થતા વિલંબને અટકાવવા માટે SOPમાં દસ્તાવેજોની ફરજિયાત રજૂઆત પર ખાસ ભાર મૂકવામાં આવ્યો છે. ફરિયાદ દાખલ કરતી વખતે જ પેમેન્ટના પુરાવા, કરારની નકલ, સંબંધિત પત્રવ્યવહાર અને ઘટનાક્રમની વિગત જેવા તમામ જરૂરી દસ્તાવેજો અપલોડ કરવાના રહેશે. આ તમામ ફરિયાદોની પ્રાથમિક ચકાસણી સીધી RERA સેક્રેટરી સ્તરે કરવામાં આવશે, જેથી પ્રક્રિયામાં કોઈ ટેકનિકલ કે કાનૂની અવરોધ ન આવે.
 

RERA ડેશબોર્ડ બનશે માહિતીનું કેન્દ્ર

નવી વ્યવસ્થામાં RERA ડેશબોર્ડને કેસ સંબંધિત તમામ માહિતીનું કેન્દ્ર બનાવવામાં આવ્યું છે. ફરિયાદી, પ્રમોટર અને કાનૂની પ્રતિનિધિઓ ડેશબોર્ડ મારફતે સુનાવણીની તારીખ, નોટિસ, જવાબ અને અંતિમ આદેશ જેવી તમામ માહિતી રિયલ-ટાઇમમાં મેળવી શકશે. પ્રથમ નોટિસ બાદ તમામ હિતધારકોને સતત અપડેટ્સ માટે ડેશબોર્ડ જોતા રહેવાની જવાબદારી રહેશે.
 

ફરિયાદોનું સ્પષ્ટ વર્ગીકરણ

SOPમાં ફરિયાદોના સ્વરૂપ અનુસાર સ્પષ્ટ વર્ગીકરણ કરવામાં આવ્યું છે, જેથી યોગ્ય અધિકારી દ્વારા ઝડપી કાર્યવાહી શક્ય બને. ફરિયાદોને બે મુખ્ય કેટેગરીમાં વહેંચવામાં આવી છે:

• ફોર્મ A: કબજો મળવામાં વિલંબ, વેચાણ કરારનો અમલ ન થવો, પ્રોજેક્ટ અધૂરો રહેવું અથવા રિફંડ સંબંધિત સામાન્ય ફરિયાદો માટે.
• ફોર્મ B: માત્ર વળતર (Compensation) સંબંધિત દાવાઓ માટે.

આ સ્પષ્ટ વર્ગીકરણથી ફરિયાદો યોગ્ય ફોરમ સુધી ઝડપથી પહોંચશે અને ગેરસમજના કારણે થતો સમયનો વેડફાટ ટળશે.
 

પ્રમોટર્સ અને વકીલોને પણ મળશે સુવિધા

નવી SOP માત્ર મિલકત ખરીદદારો માટે જ નહીં પરંતુ બિલ્ડરો અને પ્રમોટર્સ માટે પણ ઉપયોગી સાબિત થશે. પ્રમોટર્સને તેમના ડેશબોર્ડ પર તરત જ નોટિસ મળશે, જેથી તેઓ સમયમર્યાદામાં જવાબ રજૂ કરી શકે. કાનૂની પ્રતિનિધિઓ માટે એડજર્નમેન્ટ, લેખિત જવાબ અને અન્ય અરજીઓ માટે સ્ટ્રક્ચર્ડ ટેમ્પ્લેટ્સ પણ ઉપલબ્ધ કરાવવામાં આવ્યા છે.
 

રિયલ એસ્ટેટ ક્ષેત્રમાં વિશ્વાસ વધારશે SOP

ગુજરાત RERA દ્વારા લેવામાં આવેલું આ મહત્વપૂર્ણ પગલું રાજ્યના રિયલ એસ્ટેટ ક્ષેત્રમાં પારદર્શિતા, જવાબદારી અને વિશ્વાસ વધારશે તેવી અપેક્ષા વ્યક્ત કરવામાં આવી રહી છે. ફરિયાદોના ઝડપી નિકાલથી લાંબા સમયથી અટકેલા કેસોમાં ઘટાડો થશે અને મિલકત ખરીદદારોને સમયસર ન્યાય મળશે.

RERAએ તમામ હિતધારકોને આ નવી SOPની વિગતવાર માહિતી ગુજરાત RERAની સત્તાવાર વેબસાઇટ પરથી જોઈ લેવા અપીલ કરી છે. નિષ્ણાતોનું માનવું છે કે, આ ડિજિટલ અને સમયબદ્ધ પ્રક્રિયા રિયલ એસ્ટેટ ક્ષેત્ર માટે એક મહત્વપૂર્ણ સુધારાકારક પગલું સાબિત થશે.