રાજકોટ શહેરમાં મેગા ડિમોલિશનની કામગીરીને લઈ તંત્ર દ્વારા મોટી તૈયારીઓ હાથ ધરવામાં આવી છે. રાજકોટ મહાનગરપાલિકા અને પોલીસ તંત્રે સંયુક્ત રીતે જંગલેશ્વર સહિતના વિસ્તારોમાં 1400થી વધુ ગેરકાયદેસર મિલકતો દૂર કરવા કવાયત શરૂ કરી છે. 23 ફેબ્રુઆરીની સવારથી 1492 જેટલા દબાણો પર બુલડોઝર ફેરવાશે તેવી સત્તાવાર જાહેરાત બાદ વિસ્તારમાં ચિંતા અને ચકચારનો માહોલ જોવા મળી રહ્યો છે.
 

2700થી વધુ કર્મચારીઓ મેદાનમાં

ડિમોલિશન પૂર્વે આજે શહેરના ભક્તિનગર સર્કલ પાસે શેઠ હાઈસ્કૂલ ખાતે કોર્પોરેશનના 1200થી વધુ અને પોલીસ વિભાગના 1500 જેટલા અધિકારીઓ-કર્મચારીઓ એકત્ર થયા હતા. ત્રણેય ઝોનના ડેપ્યુટી મ્યુનિસિપલ કમિશનરો, દબાણ હટાવ શાખા અને વિજિલન્સ ટીમ સહિતના વિભાગો પણ સક્રિય છે. 21 ફેબ્રુઆરીએ સાત અલગ-અલગ રૂટ પર ફૂટ પેટ્રોલિંગ કરીને લોકોને મકાન ખાલી કરવા સમજાવવામાં આવશે. આ અભિયાન સાંજ સુધી ચાલશે.
 

જંગલેશ્વરની 78 ગલીઓમાં સમજાવટ

તંત્ર દ્વારા જંગલેશ્વર વિસ્તારની 78 જેટલી સોસાયટી અને ગલીઓમાં જઈ દબાણકારોને બે દિવસમાં મકાન ખાલી કરવાની સૂચના આપવામાં આવી છે. આજી નદીના પટ્ટા અને નગર રચના યોજના નં. 6 હેઠળના 15 મીટરના ટી.પી. રોડ પરના ગેરકાયદેસર બાંધકામો દૂર કરવા કાર્યવાહી હાથ ધરાઈ રહી છે. તંત્રે સ્પષ્ટ સંદેશ આપ્યો છે કે નિર્ધારિત સમયમર્યાદામાં સ્થળ ખાલી ન કરવામાં આવે તો જાનમાલના નુકસાન માટે તંત્ર જવાબદાર રહેશે નહીં.
 

 

લોકો સ્વેચ્છાએ મકાન તોડી રહ્યા

ડિમોલિશનની જાહેરાત બાદ જંગલેશ્વરમાં અનેક પરિવારો પોતે જ મકાન ખાલી કરીને તોડવાનું શરૂ કરી ચૂક્યા છે. કોર્પોરેશન દ્વારા અમુક લોકોને વૈકલ્પિક પ્લોટ ફાળવાયા હોવાનું જણાવાયું છે, તેમજ સામાન ખસેડવા માટે ટ્રેક્ટરની સુવિધા પણ આપવામાં આવી રહી છે. તેમ છતાં, મોટા ભાગના રહેવાસીઓ અનિશ્ચિતતામાં છે.
 

દિવ્યાંગ ભાઈ-બહેનનો દર્દ

જંગલેશ્વર શેરી નંબર 3માં રહેતા હારુનભાઈ સુમરાએ જણાવ્યું કે તેઓ છેલ્લા 43 વર્ષથી અહીં રહે છે અને પોતે તથા તેમની બહેન બંને દિવ્યાંગ છે. મજૂરી કરીને પરિવાર ચલાવ્યા બાદ હવે મકાન તૂટી રહ્યું છે અને રહેવા માટે કોઈ વિકલ્પ ઉપલબ્ધ નથી. તેમની વૃદ્ધ માતા સાથે આખું કુટુંબ ઘર છોડવા મજબૂર બન્યું છે. હલીમબેને જણાવ્યું કે 50 વર્ષથી અહીં રહેતા હોવા છતાં હવે ભાડે મકાન મળતું નથી અને રસ્તા પર રહેવાની નોબત આવી છે. આ દ્રશ્યો વિસ્તારમાં માનવીય સંવેદનાઓને ઝંઝોડી નાખે છે.
 

વીજચોરીનો મુદ્દો અને PGVCLની કામગીરી

PGVCLના અધિકારીઓએ માહિતી આપી કે જંગલેશ્વર વિસ્તારમાં દર વર્ષે અંદાજે 50 લાખ રૂપિયાની વીજચોરી ઝડપાય છે. અહીં 3500 જેટલા કનેક્શનમાંથી 1500 કનેક્શન એવા વિસ્તારોમાં છે જ્યાં ડિમોલિશન થવાનું છે. તેથી આ કનેક્શન કાપવાની કામગીરી પણ હાથ ધરાશે. ડિમોલિશન દરમિયાન 7 ડેપ્યુટી એન્જિનિયર, 33 જુનિયર એન્જિનિયર અને 140 લાઇનમેન સહિત કુલ 180 કર્મચારીઓ જોડાશે.
 

સુરક્ષા અને કાયદો-વ્યવસ્થા પર ફોકસ

મોટી સંખ્યામાં પોલીસ કાફલો તૈનાત રાખવામાં આવ્યો છે જેથી કાયદો-વ્યવસ્થા જળવાઈ રહે. શેરીએ-શેરીએ ફરીને પોલીસ અધિકારીઓ લોકો સાથે સંવાદ સાધી રહ્યા છે. તંત્રનો દાવો છે કે આ કામગીરી કાયદેસર નોટિસ અને આયોજન સાથે થઈ રહી છે.
 

માનવીય અને શહેરી આયોજનનો સંતુલન

આ સમગ્ર અભિયાન શહેરના વિકાસ અને નદીકાંઠા મુક્તિ માટે જરૂરી ગણાવવામાં આવી રહ્યું છે. પરંતુ બીજી તરફ, વર્ષોથી વસવાટ કરતા ગરીબ અને દિવ્યાંગ પરિવારો માટે આ પરિસ્થિતિ ગંભીર પડકાર સમાન છે. એક તરફ શહેરી આયોજન અને કાયદાની અમલવારી છે, તો બીજી તરફ માનવીય સંવેદનાઓ અને પુનર્વસનની માંગ છે.

રાજકોટમાં આવનારા દિવસોમાં ડિમોલિશન કામગીરી કેવી રીતે અમલમાં આવે છે અને અસરગ્રસ્ત પરિવારોને કેટલો સહારો મળે છે, તે મહત્વપૂર્ણ રહેશે. શહેર વિકાસની દિશામાં આગળ વધી રહ્યું છે, પરંતુ વિકાસ સાથે માનવીય પાસું સંતુલિત રહે—એવી અપેક્ષા સ્થાનિકોમાં વ્યક્ત થઈ રહી છે.