અંબાજી,

પ્રસિદ્ધ યાત્રાધામ અંબાજી અને તેની આસપાસના સમગ્ર પંથકમાં આજે બપોર પછી કુંભારિયા સહિતના આસપાસના ગ્રામ્ય વિસ્તારોમાં આકાશ કાળાડિબાંગ વાદળોથી ઘેરાઈ ગયું હતું. તેજ સુસવાટા મારતા પવન વચ્ચે અચાનક વીજળીના ભયાનક કડાકા-ભડાકા થતાં કમોસમી વરસાદ તૂટી પડ્યો હતો. આ અણધાર્યા કમોસમી વરસાદના કારણે સમગ્ર અંબાજી અને કુંભારિયા પંથકમાં ક્ષણભરમાં વરસાદી માહોલ સર્જાઈ ગયો હતો.

અચાનક આવેલા આ વરસાદી ઝાપટાં અને પવનના કારણે વાતાવરણમાં પ્રવર્તતા અસહ્ય ઉકળાટ અને ગરમીમાંથી લોકોને મોટી રાહત મળી હતી. કમોસમી વરસાદને પગલે સમગ્ર વિસ્તારમાં આહલાદક અને ગુલાબી ઠંડક પ્રસરી ગઈ હતી. માં અંબાના દર્શનાર્થે અંબાજી આવેલા મોટી સંખ્યામાં યાત્રાળુઓ તેમજ કુંભારિયા સહિતના આસપાસના ગ્રામ્ય વિસ્તારોના સ્થાનિક રહીશોએ હવામાનમાં આવેલા આ અચાનક અને અલ્હાદક ફેરફારનો પ્રત્યક્ષ અનુભવ કર્યો હતો.