રાજકોટ મહાનગરપાલિકાનું વર્ષ 2026-27 માટેનું રૂ. 3604.90 કરોડનું અંદાજપત્ર મંજૂર કરવા માટે આવતીકાલે ખાસ જનરલ બોર્ડ બેઠક યોજાનારી છે. ભાજપ શાસિત વર્તમાન બોડીની પાંચ વર્ષની મુદત 11 માર્ચે પૂર્ણ થવાની હોવાથી આ ટર્મનું આ અંતિમ બજેટ બોર્ડ રહેશે. પરિણામે આ બેઠક રાજકીય રીતે અત્યંત મહત્વપૂર્ણ બની છે. એક તરફ શાસક પક્ષ પોતાની પાંચ વર્ષની સિદ્ધિઓનું ભાથું રજૂ કરવા તૈયાર છે, તો બીજી તરફ વિપક્ષ PPP સહિતના મુદ્દાઓ પર સરકારને ઘેરવાની તૈયારીમાં છે.
 

કરબોજ વિના ચૂંટણીલક્ષી બજેટ

મ્યુનિસિપલ કમિશનરે શરૂઆતમાં રૂ. 3595.70 કરોડનું ડ્રાફ્ટ બજેટ રજૂ કર્યું હતું. સ્ટેન્ડિંગ કમિટીએ તેમાં રૂ. 9.20 કરોડનો વધારો સૂચવી કુલ બજેટ કદ રૂ. 3604.90 કરોડ નક્કી કર્યું છે. ખાસ બાબત એ છે કે કમિશનરે સૂચવેલા રૂ. 95 કરોડના કરવેરા વધારાને ફગાવી દેવામાં આવ્યો છે. પરિણામે પ્રજા પર કોઈ નવો વેરો લાદવામાં આવ્યો નથી.

લાંબા સમય બાદ મિલકત વેરા અને પાણી વેરામાં રાહત આપતી જોગવાઈઓ બજેટમાં સમાવાઈ છે. રહેણાંક અને બિન-રહેણાંક મિલકતો માટે બાકી વ્યાજમાં રૂ. 5,000 સુધીની માફી જાહેર કરવામાં આવી છે. પાણી વેરા માટે પણ વ્યાજમાં સમાન રાહત આપવામાં આવી છે. આ યોજના તાત્કાલિક અમલમાં મુકાઈ છે, જેથી નાગરિકોને ત્વરિત લાભ મળે અને શાસકોને ચૂંટણી પૂર્વે રાજકીય ફાયદો મળી શકે.
 

મહિલાઓ અને મધ્યમ વર્ગ માટે યોજનાઓ

બજેટમાં મહિલાઓને ધ્યાનમાં રાખી ‘પિંક બસ’ અને રાહત દરે વાર્ષિક પાસ યોજના જાહેર કરવામાં આવી છે. રૂ. 1,000ના પાસ દ્વારા મહિલાઓ સિટી બસ અને BRTSમાં આખું વર્ષ મફત મુસાફરી કરી શકશે.

તે ઉપરાંત રેસકોર્સના બ્યુટીફિકેશન અને રિનોવેશન, નાના મવા બ્રિજ નીચે ગેમ ઝોન અને કાફેટેરિયા, ઇલેક્ટ્રિક બસ માટે નવા ચાર્જિંગ સ્ટેશનો, વોર્ડ નં. 12માં નવો સ્વિમિંગ પુલ અને વડીલોના નામે વૃક્ષારોપણ જેવી કુલ 23 નવી યોજનાઓનો સમાવેશ કરવામાં આવ્યો છે. શહેરના ટ્રાફિક પ્રશ્નોના ઉકેલ માટે નવા બ્રિજના પાયલોટ અભ્યાસની પણ જોગવાઈ છે.
 

PPP પ્રોજેક્ટ્સ પર વિપક્ષનો વિરોધ

વિરોધ પક્ષ કોંગ્રેસે બજેટના PPP (પબ્લિક પ્રાઈવેટ પાર્ટનરશિપ) મોડલ હેઠળની યોજનાઓ સામે સવાલો ઊભા કરવાની તૈયારી કરી છે. બજેટમાં સમાવિષ્ટ 14 નવી યોજનાઓમાંથી 7 PPP આધારીત હોવાનું કોંગ્રેસનું કહેવું છે. સેન્ટ્રલ ઝોન બિલ્ડિંગનું રિનોવેશન અને ‘નમો વન’ જેવા પ્રોજેક્ટ્સ ખાનગી એજન્સીઓને સોંપવાના મુદ્દે વિપક્ષ આક્રમક બનશે.

કોંગ્રેસનો આક્ષેપ છે કે મહાપાલિકા પોતાની જવાબદારીઓમાંથી દૂર રહી શહેરની સંપત્તિ ખાનગી હાથોમાં સોંપી રહી છે. જોકે વ્યાજમાફી અને મહિલાઓ માટેની બસ સેવા જેવી લોકહિત યોજનાઓને આવકારવાની તૈયારી પણ વિપક્ષે દર્શાવી છે, પરંતુ અમલીકરણ અને પારદર્શિતાના મુદ્દે સરકારને ભીંસમાં લેવાની રણનીતિ છે.
 

બિલ્ડરોને રાહત અને નિયમિતિકરણ

TRP ગેમઝોન અગ્નિકાંડ બાદ હાઈરાઈઝ બિલ્ડિંગના ફ્લાવર બેડ અને આર્કિટેક્ચરલ પ્રોજેક્શનના નિયમિતિકરણનો મુદ્દો ચર્ચામાં રહ્યો હતો. આ બજેટમાં બિલ્ડરોને રાહતરૂપે રેગ્યુલરાઈઝેશન ફી હપ્તામાં ભરવાની વ્યવસ્થા દાખલ કરવામાં આવી છે. રૂ. 50 લાખથી વધુ ફી ભરવાની હોય તેવા કેસમાં બિલ્ડરો એક વર્ષમાં ચાર ત્રિમાસિક હપ્તામાં ચુકવણી કરી શકશે.

બિલ્ડર લોબી દ્વારા લાંબા સમયથી કરવામાં આવેલી રજૂઆતોને ધ્યાનમાં રાખીને આ નિર્ણય લેવામાં આવ્યો હોવાનું માનવામાં આવે છે.
 

રાજકીય ગરમાવો નિશ્ચિત

આ બેઠકમાં કુલ 11 દરખાસ્તો એજન્ડા પર છે, જેમાં ચાલુ વર્ષનું રિવાઈઝ્ડ બજેટ, નવા વર્ષનું બજેટ તથા નગર પ્રાથમિક શિક્ષણ સમિતિનું અંદાજપત્ર સામેલ છે. નિયમ મુજબ બજેટ બોર્ડમાં પ્રશ્નોત્તરી ન હોવા છતાં રાજકીય ટકરાવ થવાની પૂરી શક્યતા છે.

હાલની બોડીમાં શાસક પક્ષના 68 અને વિપક્ષના 4 કોર્પોરેટરો છે. આ ટર્મનું અંતિમ બોર્ડ હોવાથી વિકાસ કાર્યોના જશ અને ખામી અંગે શાબ્દિક યુદ્ધ થવાની પૂરી શક્યતા વ્યક્ત થઈ રહી છે.

આ રીતે આવતીકાલનું બજેટ બોર્ડ માત્ર આર્થિક દસ્તાવેજની મંજૂરી પૂરતું સીમિત નહીં રહે, પરંતુ રાજકીય રીતે પણ મહત્વપૂર્ણ બની શકે છે. શાસકો માટે સિદ્ધિઓ રજૂ કરવાનો અને વિપક્ષ માટે સરકારને ઘેરવાનો આ અંતિમ મંચ બની રહેશે.