રાજકોટ એસટી વિભાગને લાંબા સમયથી અનુભવી રહેલી ડ્રાઇવરોની અછતમાંથી હવે મોટી રાહત મળી છે. રાજ્ય સરકાર દ્વારા તાજેતરમાં ગાંધીનગર ખાતે મુખ્યમંત્રીની ઉપસ્થિતિમાં ગુજરાત રાજ્ય માર્ગ પરિવહન નિગમ (એસટી) માટે 2500થી વધુ નવા ડ્રાઇવરોની ભરતી કરવામાં આવી હતી. આ ભરતી પ્રક્રિયા અંતર્ગત નિમણૂકપત્રો આપવામાં આવ્યા બાદ વિવિધ ડિવિઝનોમાં ડ્રાઇવરોની ફાળવણી કરવામાં આવી છે, જેમાં રાજકોટ એસટી વિભાગને કુલ 188 નવા ડ્રાઇવરો મળ્યા છે.

આ 188 નવા ડ્રાઇવરો પૈકી અત્યાર સુધીમાં 108 ડ્રાઇવરો રાજકોટ ખાતે ફરજમાં હાજર થઈ ગયા છે. ફરજ પર હાજર થયેલા ડ્રાઇવરોને રાજકોટ એસટી વિભાગના નવ અલગ-અલગ ડેપોમાં ફાળવી દેવામાં આવ્યા છે, જેથી દૈનિક બસ સેવા વ્યવસ્થાને વધુ સુચારૂ રીતે ચલાવી શકાય. નવા ડ્રાઇવરોના જોડાણથી મુસાફરોને સમયસર અને નિયમિત બસ સેવા મળવાની આશા વધી છે.

આ અંગે રાજકોટ એસટી વિભાગના વિભાગીય નિયામક હિમાંશુ જોષીએ માહિતી આપતા જણાવ્યું હતું કે, હાલ સુધીમાં 108 ડ્રાઇવરો ફરજમાં હાજર થઈ ગયા છે અને બાકીના ડ્રાઇવરો પણ તબક્કાવાર રીતે ફરજમાં હાજર થઈ રહ્યા છે. હાલ હજુ પણ 40થી વધુ ડ્રાઇવરો હાજર થયા નથી, પરંતુ ટૂંક સમયમાં તેઓ પણ ફરજ સંભાળી લેશે તેવી ખાતરી આપવામાં આવી છે.

ઉલ્લેખનીય છે કે, છેલ્લા ઘણા સમયથી રાજકોટ એસટી વિભાગમાં ડ્રાઇવરોની ગંભીર અછત હતી. ડ્રાઇવરોની કમીના કારણે અનેક રૂટ પર બસોની સંખ્યા ઓછી હતી, તો કેટલાક રૂટ પર બસ સેવા અસ્થાયી રીતે બંધ કરવી પડી હતી. પરિણામે મુસાફરોને ભારે મુશ્કેલીઓનો સામનો કરવો પડતો હતો, ખાસ કરીને ગ્રામ્ય વિસ્તારોમાં રોજિંદા આવન-જાવન માટે એસટી બસ પર નિર્ભર નાગરિકોને અસુવિધા થતી હતી.

નવા ડ્રાઇવરોની ફાળવણી થતાં હવે વિભાગને આ અછતમાંથી રાહત મળી છે. ડ્રાઇવરોની સંખ્યા વધતા રાજકોટ એસટી વિભાગ દ્વારા કેટલાક નવા રૂટ પણ શરૂ કરવામાં આવ્યા છે, જ્યારે કેટલાક અગાઉ બંધ થયેલા રૂટ ફરી શરૂ કરવાની પ્રક્રિયા પણ હાથ ધરવામાં આવી છે. આ પગલાંથી મુસાફરોને વધુ વિકલ્પો મળશે અને બસ સેવા વધુ વ્યાપક બનશે.

વિભાગીય સૂત્રોના જણાવ્યા મુજબ, નવા ડ્રાઇવરોને ફરજ પર જોડતાં પહેલાં જરૂરી તાલીમ અને માર્ગદર્શિકા આપવામાં આવી છે, જેથી મુસાફરોની સુરક્ષા અને સમયપાલન જાળવી શકાય. સાથે જ, એસટી નિગમ દ્વારા ડ્રાઇવરોની કાર્યક્ષમતામાં વધારો થાય તે માટે નિયમિત તાલીમ કાર્યક્રમો પણ આયોજન કરવામાં આવી રહ્યા છે.

રાજકોટ એસટી વિભાગને મળેલી આ નવી માનવશક્તિથી બસ સેવાની વિશ્વસનીયતા વધશે તેમજ મુસાફરોનો વિશ્વાસ પણ મજબૂત બનશે. આવનારા સમયમાં તમામ 188 ડ્રાઇવરો ફરજમાં હાજર થઈ જશે ત્યારબાદ રાજકોટ વિભાગની કામગીરી વધુ ગતિશીલ બનશે અને જાહેર પરિવહન વ્યવસ્થાને નવી દિશા મળશે.