કમૂરતા પૂર્ણ થતાં જ સોના અને ચાંદીના ભાવમાં ફરી એકવાર જોરદાર ભડકો જોવા મળી રહ્યો છે. લગ્નસીઝનના પડઘમ વાગતા જ કોમોડિટી માર્કેટમાં ગોલ્ડ–સિલ્વરના ભાવોએ ઐતિહાસિક રેકોર્ડ તોડી નાખ્યા છે. બુધવારે MCX (મલ્ટી કોમોડિટી એક્સચેન્જ) પર સોના અને ચાંદી બંનેએ ઓલટાઇમ હાઈ સ્તર સ્પર્શ્યું હતું.
 

MCX પર ચાંદીનો ભાવ રેકોર્ડ પર

બુધવારે ચાંદીના ભાવમાં એક જ દિવસે 14,700 રૂપિયાનો ઉછાળો આવ્યો હતો. સાંજે 8 વાગ્યા આસપાસ MCX પર ચાંદી પ્રતિ કિલો 2,89,900 રૂપિયામાં ટ્રેડ થઈ રહી હતી. દિવસ દરમિયાન ચાંદીએ ઓલટાઇમ હાઈ 2,91,406 રૂપિયા પ્રતિ કિલોનો આંકડો પણ પાર કર્યો હતો.
 

સોનાએ પણ બનાવ્યો ઓલટાઇમ હાઈ

સોનાના ભાવમાં પણ નોંધપાત્ર તેજી જોવા મળી છે. 5 ફેબ્રુઆરી વાયદા માટે MCX પર 24 કેરેટ સોનાનો ભાવ પ્રતિ 10 ગ્રામ 1,143 રૂપિયા વધી 1,43,384 રૂપિયા સુધી પહોંચી ગયો હતો. આ સાથે સોનાએ પણ નવો ઓલટાઇમ હાઈ રેકોર્ડ નોંધાવ્યો છે.
 

14 દિવસમાં ચાંદી 56 હજાર મોંઘી

આ વર્ષના શરૂઆતના દિવસોમાં જ સોના–ચાંદીમાં ગજબ ઉછાળો નોંધાયો છે. 31 ડિસેમ્બરે વાયદા બજારમાં ચાંદીનો ભાવ 2.35 લાખ રૂપિયા પ્રતિ કિલો હતો, જે હવે વધીને લગભગ 2.91 લાખ રૂપિયા થયો છે. એટલે કે માત્ર 14 દિવસમાં ચાંદીના ભાવમાં 56 હજાર રૂપિયાનો વધારો થયો છે.
 

સોનામાં 14 દિવસમાં 9 હજારની તેજી

સોનાના ભાવની વાત કરીએ તો 31 ડિસેમ્બરે પ્રતિ 10 ગ્રામ ભાવ આશરે 1.34 લાખ રૂપિયા હતો, જે 14 જાન્યુઆરીએ વધીને 1.43 લાખ રૂપિયા સુધી પહોંચી ગયો છે. એટલે કે માત્ર બે સપ્તાહમાં સોનામાં લગભગ 9 હજાર રૂપિયાની તેજી નોંધાઈ છે.
 

ઇન્ટરનેશનલ માર્કેટમાં પણ તેજી

વિશ્વબજારમાં પણ સોના–ચાંદીની ભારે માંગ જોવા મળી રહી છે. આંતરરાષ્ટ્રીય માર્કેટમાં સોનું 4,600 ડોલર પ્રતિ ઔંસ આસપાસ ટ્રેડ થઈ રહ્યું છે, જ્યારે ચાંદી 90 ડોલર પ્રતિ ઔંસનો આંકડો પાર કરી ચૂકી છે. નિષ્ણાતો માને છે કે આવનાર સમયમાં સોનું 5,000 ડોલર અને ચાંદી 100 ડોલર પ્રતિ ઔંસ સુધી પહોંચે તેવી સંભાવના છે.
 

ચાંદીમાં ભાવ વધારા પાછળના મુખ્ય કારણો

1. પુરવઠામાં ઘટાડો: વૈશ્વિક સ્તરે ચાંદીનો પુરવઠો સતત ઘટી રહ્યો છે. COMEX રજિસ્ટર્ડ રિઝર્વ 2020ની તુલનામાં લગભગ 70% ઘટ્યા છે.
2. ઔદ્યોગિક માંગ: સોલર પેનલ, ઇલેક્ટ્રિક વાહનો અને હાઈ-ટેક ઉદ્યોગોમાં ચાંદીની માંગ ભારે વધી છે.
3. ચીનના નવા નિયમો: જાન્યુઆરી 2026થી ચીને ચાંદીના નિકાસ પર કડક નિયંત્રણો લાદતા વૈશ્વિક પુરવઠા પર દબાણ વધ્યું છે.
    

શું હવે ભાવ ઘટશે?

નિષ્ણાતોનું માનવું છે કે સોના અને ચાંદીના ભાવ હાલમાં ટોચના સ્તરની નજીક છે. નફા-બુકિંગના કારણે ટૂંકા ગાળામાં ભાવમાં થોડી ઘટાડાની શક્યતા છે, પરંતુ મજબૂત માંગને કારણે લાંબા ગાળે રોકાણ હજુ પણ લાભદાયી રહી શકે છે. ઘણા વિશ્લેષકો માને છે કે 2026માં પણ ગોલ્ડ–સિલ્વર મજબૂત સપોર્ટ સાથે ઊંચા સ્તરે ટકશે.
 

નાના હપ્તામાં રોકાણની સલાહ

ભાવ ખૂબ ઊંચા હોવાથી સામાન્ય રોકાણકારો માટે એકસાથે મોટી ખરીદી મુશ્કેલ બની છે. તેથી નિષ્ણાતો ડિજિટલ રોકાણની સલાહ આપે છે. ગોલ્ડ ETF, સિલ્વર ETF અથવા ગોલ્ડ–સિલ્વર ફંડમાં માસિક કે સાપ્તાહિક હપ્તામાં રોકાણ કરીને લાંબા ગાળે સારો નફો મેળવી શકાય છે અને બજારના જોખમથી પણ બચી શકાય છે.