રાજકોટ,

નર્મદાની પાઇપલાઇનમાં સર્જાયેલી તાંત્રિક ખામી અને ક્ષતિઓનું સમારકામ સિંચાઈ વિભાગ દ્વારા પૂર્ણ કરી દેવામાં આવ્યું છે. આ કામગીરી આટોપી લેવાતાં હવે રાજકોટ શહેરની મુખ્ય પીવાના પાણીની જીવનદોરી સમાન જળાશયોને નર્મદાના નીરથી ભરી દેવાની તૈયારીઓ શરૂ કરી દેવામાં આવી છે.

સિંચાઈ વિભાગના સત્તાવાર સંકેતો અનુસાર, આગામી એકાદ-બે દિવસની અંદર જ 'સૌની યોજના' હેઠળ રાજકોટના આજી-૧ અને ન્યારી-૧ ડેમમાં નર્મદાના નીર ઠાલવવાનું શરૂ કરી દેવામાં આવશે. 

તંત્ર દ્વારા પાઇપલાઇનનું સમારકામ સત્વરે પૂરું કરી દેવાતાં હવે બંને મુખ્ય ડેમો પુનઃ ભરાશે, જેના કારણે રાજકોટ શહેરના લાખો નાગરિકોને પીવાના પાણીની સમસ્યામાંથી મુક્તિ મળશે. સિંચાઈ અને મનપા તંત્ર દ્વારા પાણી છોડવા માટેનું જરૂરી પ્લાનિંગ અને ટ્રાયલ પણ પૂર્ણ કરી લેવામાં આવ્યા છે.