ગુજરાત રાજ્યમાં વહીવટી તંત્રને વધુ કાર્યક્ષમ, પારદર્શક, ઝડપભર્યું અને યુવા-કેન્દ્રિત બનાવવા સરકાર સતત પ્રયાસરત છે. આ પરિવર્તનની શરૂઆત ત્યારે થઈ જ્યારે વડાપ્રધાન નરેન્દ્ર મોદીએ દેશના યુવાઓને ડેમોગ્રાફિક ડિવિડન્ડ તરીકે ગણાવતા તેમને યોગ્ય તક અને રોજગાર આપીને રાષ્ટ્રના નિર્માણમાં જોડવાના વિચારને પ્રોત્સાહિત કર્યો હતો. આ જ દ્રષ્ટિકોણને આગળ ધપાવવા રાજ્યના મુખ્યમંત્રી ભૂપેન્દ્ર પટેલે વહીવટી સુધારણા માટે ગુજરાત એડમિનિસ્ટ્રેટિવ રિફોર્મ્સ કમિશન (GARC)ની રચના કરી. મુખ્યમંત્રીના મુખ્ય સલાહકાર ડો. હસમુખ અઢિયાની અધ્યક્ષતામાં રચાયેલ આ પંચ હવે રાજ્યની વહીવટી વ્યવસ્થાને આધુનિક બનાવવા મહત્વપૂર્ણ પગલાં લઈ રહ્યો છે.

બુધવારે પંચના અધ્યક્ષ ડો. હસમુખ અઢિયાએ આ પંચનો છઠ્ઠો ભલામણ અહેવાલ ગાંધીનગરમાં મુખ્યમંત્રીને સુપરત કર્યો. આ અહેવાલ ખાસ કરીને ભરતી પ્રક્રિયાને ઝડપી, ટેક્નોલોજી આધારિત, પારદર્શક અને યુવા કેન્દ્રિત બનાવવા પર આધારિત છે. આજની પરિસ્થિતિમાં ભરતી પ્રક્રિયા લાંબી, જટિલ અને કાગળ આધારીત હોઈને ઘણીવાર ઉમેદવારોને અસુવિધા અને વિલંબ અનુભવવો પડે છે. આ પડકારોને પહોંચી વળવા પંચે 9 મહત્વપૂર્ણ ભલામણો રજૂ કરી છે, જે અમલી બને તો રાજ્યની સરકારે ભરતી સંબંધિત કાર્યપ્રણાલીનું સંપૂર્ણ રૂપાંતરણ થઈ શકે છે.

ભરતીને ઝડપી બનાવતી 9 મુખ્ય ભલામણો

1. નિશ્ચિત ટાઇમલાઇન

ભરતી પ્રક્રિયા કેટલા સમયમાં પૂર્ણ કરવી તે માટે સ્પષ્ટ સમયમર્યાદા નક્કી કરવી, જેથી ભરતી વર્ષો સુધી લંબાઈ ન જાય.

2. સંયુક્ત ભરતી અને CET

વિવિધ વિભાગોની પરીક્ષા અલગ-અલગ ન લઈને કોમન એન્ટ્રન્સ ટેસ્ટ દ્વારા ભરતી પ્રક્રિયાને સરળ બનાવવી.

3. દર વર્ષે બે રિક્વિઝિશન વિન્ડો

વર્ષમાં નક્કી કરેલી બે વખત વિભાગો પોતાના ખાલી પડેલા પદોની માહિતી મોકલી શકે તેવી વ્યવસ્થા, જેથી આયોજનસર ભરતી થાય.

4. સંપૂર્ણ ડિજિટલ ડોક્યુમેન્ટ વેરિફિકેશન

IASS સિસ્ટમ દ્વારા દસ્તાવેજોની ચકાસણીને સંપૂર્ણ ડિજિટલ બનાવવી, જેથી માનવીય ભૂલો અને ગેરવ્યવહાર ટળે.

5. કેન્ડિડેટ ફ્રેન્ડલી ડેશબોર્ડ

ઉમેદવારોને અરજીથી લઈને રિઝલ્ટ સુધીની તમામ માહિતી એક જ ડેશબોર્ડ પર સરળતાથી મળી રહે.

6. સંપૂર્ણ ડિજિટલ વર્કફ્લો

રિક્વિઝિશનથી લઈને નિમણૂક પત્ર સુધીની દરેક પ્રક્રિયા ડિજિટલ બનાવવી, જેથી ફાઇલો ઝડપી આગળ વધી શકે.

7. ભરતી એજન્સીઓનું પુનર્ગઠન

GPSC સહિતની ભરતી એજન્સીઓની ક્ષમતામાં વધારો કરવા તેમની કાર્યક્ષમતામાં સુધારા.

8. કમ્પ્યુટર આધારિત પરીક્ષાઓનો વ્યાપક ઉપયોગ

CBT નો ઉપયોગ કરીને પરીક્ષાઓ ઝડપથી લેવાય અને પરિણામ પણ ત્વરિત મળે.

9. 10 વર્ષનું ભરતી કેલેન્ડર

દરેક વિભાગ માટે આગામી દાયકાના ભરતી આયોજનની વ્યવસ્થા, જેમાં ખાસ કરીને ઇમરજન્સી સર્વિસિસ અને મહત્વપૂર્ણ કેડરની ભરતીને પ્રાથમિકતા.

એક વર્ષથી ઓછા સમયમાં ભરતી પૂર્ણ શક્ય

GARCના અભિપ્રાય મુજબ, જો આ ભલામણો અમલમાં મૂકાશે તો ભરતી પ્રક્રિયા એક વર્ષથી પણ ઓછી સમયમર્યાદામાં પૂર્ણ કરી શકાય. આજે ભરતી પ્રક્રિયા લાંબા ગાળે લંબાઈ જતી હોય છે, જેના કારણે હજારો ઉમેદવારોને રાહ જોવી પડે છે. પરંતુ ડિજિટલાઈઝેશન અને સમયમર્યાદા નક્કી થવાથી આ સમસ્યામાં મોટા પાયે સુધારો થઈ શકે છે.

અહેવાલ સુપરત સમયે હાજર અધિકારીઓ

અહેવાલ સુપરત કરવાની પ્રક્રિયા દરમિયાન મુખ્ય સચિવ એમ. કે. દાસ, મુખ્યમંત્રીના સલાહકાર એસ.એસ. રાઠૌર, મુખ્ય અગ્ર સચિવ શ્રીમતી અવંતિકા સિંઘ, વહીવટી સુધારણા વિભાગના અગ્ર સચિવ હારિત શુક્લા, મુખ્યમંત્રીના સચિવ ડો. વિકરાંત પાંડે અને GARCના અન્ય અધિકારીઓ ઉપસ્થિત રહ્યા હતા. આ દર્શાવે છે કે રાજ્ય સરકાર આ ભલામણોને ગંભીરતાથી લઈને તેનો અમલ કરવાની દિશામાં આગળ વધવા તૈયાર છે.

ગુજરાતની ભરતી પ્રક્રિયામાં પ્રગતિશીલ અને ટેક્નોલોજી આધારિત પરિવર્તન લાવવાના હેતુથી તૈયાર કરાયેલ GARCનો છઠ્ઠો અહેવાલ યુવાનો માટે આશાવાદી છે. નવી ભલામણો ભરતીમાં ઝડપ, પારદર્શિતા અને વિશ્વસનીયતા વધારશે તેમજ રાજ્યની વહીવટી શક્તિને મજબૂત બનાવશે. રાજ્ય સરકાર આ ભલામણોને અમલમાં મૂકે તો ગુજરાત ટૂંક સમયમાં દેશમાં ભરતી પ્રક્રિયા સુધારણા માટે એક મોડેલ રાજ્ય બની શકે છે.