સૌરાષ્ટ્ર-ગુજરાતમાં હવામાનનું અનોખું ચિતરું સતત જોવા મળી રહ્યું છે. એક તરફ બપોરે આકરા તાપ સાથે ઉનાળાની શરૂઆતનો અહેસાસ થાય છે તો બીજી તરફ વહેલી સવારે ઠંડકનો ચમકારો અનુભવાય છે. હવામાન વિભાગના અનુમાન મુજબ ચાલુ સપ્તાહ દરમિયાન પણ આવી ‘ડબલ ઋતુ’ની પરિસ્થિતિ યથાવત્ રહેવાની શક્યતા છે. દિવસ દરમિયાન વધતા તાપમાન અને સવાર-રાત્રે ઠંડક વચ્ચે લોકો બે જુદી ઋતુઓનો અનુભવ કરી રહ્યા છે.

ગઇકાલે સૌરાષ્ટ્ર-કચ્છમાં રાજકોટ સૌથી વધુ ગરમ શહેર રહ્યું હતું, જ્યાં મહત્તમ તાપમાન 35.3 ડિગ્રી સેલ્સિયસ નોંધાયું હતું. રાજ્યમાં સૌથી વધુ ગરમી 35.8 ડિગ્રી સાથે ડિસામાં નોંધાઈ હતી. ઉપરાંત અમદાવાદમાં 34 ડિગ્રી, અમરેલીમાં 34.7, વડોદરામાં 34.8, ભુજમાં 34.9, ડાંગમાં 33.9, ગાંધીનગરમાં 33.5, કંડલામાં 35.2, પોરબંદરમાં 33.9 અને સુરતમાં 34 ડિગ્રી મહત્તમ તાપમાન નોંધાતા ઉનાળાની અસર સ્પષ્ટ જોવા મળી હતી. રાજ્યના એક ડઝનથી વધુ શહેરોમાં પારો 33 થી 35 ડિગ્રી વચ્ચે પહોંચતા બપોરના સમયમાં ગરમીનો તાપ સહન કરવો મુશ્કેલ બન્યો હતો.

આજે સવારે પણ ભેજવાળું વાતાવરણ નોંધાયું હતું અને 10 થી 12 કિલોમીટર પ્રતિ કલાકની ઝડપે પવન ફૂંકાયો હતો. ભેજના પ્રમાણમાં વધારો થવાને કારણે કેટલાક વિસ્તારોમાં ધુમ્મસ જેવી પરિસ્થિતિ સર્જાઈ હતી. ખાસ કરીને વહેલી સવારે માર્ગો પર દૃશ્યતા ઓછી થતાં વાહનચાલકોને મુશ્કેલીનો સામનો કરવો પડ્યો હતો.

જ્યારે બપોરે ગરમીનો ત્રાસ અનુભવાયો હતો, ત્યારે વહેલી સવારે કેટલાક વિસ્તારોમાં ઠંડકનો ચમકારો જોવા મળ્યો હતો. નલિયામાં લઘુત્તમ તાપમાન 11 ડિગ્રી નોંધાયું હતું, જ્યારે અમરેલીમાં 14.2 ડિગ્રી સુધી પારો નીચે સરક્યો હતો. રાજકોટમાં આજે સવારે લઘુત્તમ તાપમાન 17.3 ડિગ્રી નોંધાયું હતું, જ્યારે મોટાભાગના શહેરોમાં 16 થી 17 ડિગ્રી વચ્ચે પારો રહ્યો હતો. એટલે કે સવારે હળવી ઠંડક અને બપોરે ગરમી – આ બંને પરિસ્થિતિઓ એક સાથે અનુભવાઈ રહી છે.

જામનગરમાં પણ છેલ્લા બે દિવસ દરમિયાન તાપમાનમાં ઉતાર-ચઢાવ નોંધાયો હતો. શનિવારે લઘુત્તમ તાપમાન 15.5 ડિગ્રી સુધી પહોંચ્યું હતું. રવિવારે લઘુત્તમ તાપમાન 18 ડિગ્રી અને મહત્તમ 32 ડિગ્રી નોંધાયું હતું. ભેજનું પ્રમાણ 75 ટકા સુધી પહોંચ્યું હતું અને પવનની ગતિ પ્રતિ કલાક આશરે 2 કિ.મી. નોંધાઈ હતી. સોમવારે લઘુત્તમ તાપમાનમાં 1 ડિગ્રીનો ઘટાડો નોંધાયો અને પારો 17 ડિગ્રી રહ્યો, જ્યારે મહત્તમ તાપમાન 31 ડિગ્રી નોંધાયું હતું.

વાતાવરણમાં ભેજનું પ્રમાણ કેટલાક વિસ્તારોમાં 80 ટકા સુધી પહોંચતા ગાઢ ધુમ્મસની સ્થિતિ સર્જાઈ હતી. આ કારણે વહેલી સવારે હાઇવે અને શહેરના માર્ગો પર દૃશ્યતા ઘટી જતાં વાહનચાલકોને ધીમું વાહન ચલાવવું પડ્યું હતું. પવનની ગતિમાં પણ થોડો વધારો નોંધાયો હતો અને કેટલાક સ્થળોએ 3 થી 4 કિ.મી. પ્રતિ કલાકની ઝડપે પવન ફૂંકાયો હતો.

હવામાન નિષ્ણાતોના મત મુજબ હાલની પરિસ્થિતિ ઋતુ પરિવર્તનની સંકેત આપે છે. શિયાળો વિદાય લઈ રહ્યો છે અને ઉનાળાની શરૂઆત થવાની પ્રક્રિયા શરૂ થઈ ગઈ છે. દિવસ દરમિયાન સૂર્યપ્રકાશની તીવ્રતા વધતી જાય છે, જ્યારે રાત્રે અને વહેલી સવારે હજી પણ ઠંડકનો અંશ યથાવત્ છે. આવી પરિસ્થિતિમાં આરોગ્ય પ્રત્યે ખાસ કાળજી લેવાની સલાહ આપવામાં આવી છે, કારણ કે તાપમાનના વધારા-ઘટારા શરીર પર અસર કરી શકે છે.

ચાલુ સપ્તાહ દરમિયાન તાપમાનમાં મોટા ફેરફારની શક્યતા નથી, પરંતુ દિવસ દરમિયાન ગરમીમાં થોડો વધારો થઈ શકે છે. ભેજ અને પવનની ગતિને કારણે વાતાવરણમાં ભેજવાળું સ્વરૂપ યથાવત્ રહી શકે છે. આમ, રાજ્યમાં હાલ ‘ડબલ ઋતુ’નો અનુભવ ચાલુ છે – સવારે હળવી ઠંડક અને બપોરે આકરો તાપ – અને લોકો ઋતુ પરિવર્તનની આ અનોખી સ્થિતિનો સામનો કરી રહ્યા છે.