અમદાવાદ,

ચેકિંગ દરમિયાન જો ભાડૂતો મળી આવશે તો આવાસ પરત ખેંચાશે

અમદાવાદ શહેરમાં વડાપ્રધાન આવાસ યોજના હેઠળ આપવામાં આવેલા આવાસોમાં રહેતા લાભાર્થીઓ માટે મહાનગરપાલિકા દ્વારા એક મહત્વપૂર્ણ અને કડક નિર્ણય લેવામાં આવ્યો છે. લાંબા સમયથી પાલિકાને ફરિયાદો મળી રહી હતી કે ઘણા લાભાર્થીઓ પોતે આવાસમાં રહેવાને બદલે અન્ય લોકોને ભાડે આપી રહ્યા છે. આ ગેરરીતિને ડામવા માટે AMC હવે સક્રિય બન્યું છે અને આગામી દિવસોમાં આવા આવાસ સંકુલમાં સઘન ચેકિંગ ઝુંબેશ હાથ ધરવામાં આવશે.

સરકાર દ્વારા આર્થિક રીતે નબળા વર્ગના (EWS) લોકો માટે આ આવાસ યોજના અમલમાં મૂકવામાં આવી છે. જોકે, કેટલાક લાભાર્થીઓ આ આવાસ મેળવ્યા બાદ તેને ભાડે આપીને આર્થિક લાભ મેળવી રહ્યા છે, જે યોજનાના મૂળ ઉદ્દેશ્યની વિરુદ્ધ છે. પાલિકાની હાઉસિંગ કમિટીએ આ બાબતને ગંભીરતાથી લીધી છે. સૂત્રોના જણાવ્યા અનુસાર, હવે જે લાભાર્થીઓ પોતે ત્યાં રહેતા નથી અને આવાસ ભાડે આપ્યા છે, તેમનું ફાળવણી રદ કરવા સુધીની કડક કાર્યવાહી કરવામાં આવશે.

પાલિકાના અધિકારીઓ હવે દરેક આવાસ સોસાયટીમાં જઈને લાભાર્થીઓની રૂબરૂ ચકાસણી કરશે. આ ચેકિંગ દરમિયાન જો કોઈ આવાસમાં મૂળ લાભાર્થીને બદલે ભાડૂતો રહેતા માલુમ પડશે, તો પાલિકા તત્કાલ અસરથી તે આવાસનો કબજો પરત લેવાની પ્રક્રિયા હાથ ધરશે. પાલિકાએ સ્પષ્ટ શબ્દોમાં ચેતવણી આપી છે કે સરકારી યોજનાનો દુરુપયોગ કરનારાઓને હવે કોઈ પણ સંજોગોમાં છોડવામાં આવશે નહીં. જે જરૂરિયાતમંદોને ખરેખર આવાસની જરૂર છે, તેમના સુધી આ લાભ પહોંચાડવા માટે તંત્ર સંપૂર્ણ કટિબદ્ધ છે.