અમદાવાદ,

બેંગલુરુના BEML પ્લાન્ટમાં નિર્માણ શરૂ; ૫૫૭ મુસાફરોની ક્ષમતા

કર્ણાટકના બેંગલુરુ ખાતે આવેલા BEML (ભારત અર્થ મુવર્સ લિમિટેડ) પ્લાન્ટમાં દેશની પહેલી સંપૂર્ણપણે સ્વદેશી હાઈ-સ્પીડ બુલેટ ટ્રેનનું ઉત્પાદન કાર્ય પૂરજોશમાં ચાલી રહ્યું છે. આ ભારતીય બુલેટ ટ્રેનની મહત્તમ ટેસ્ટ સ્પીડ ૨૮૦ કિમી પ્રતિ કલાક જ્યારે ઓપરેશનલ (દોડવાની) ઝડપ ૨૪૯ કિમી પ્રતિ કલાક નક્કી કરવામાં આવી છે.

અત્યાધુનિક ટેકનોલોજીથી સજ્જ અંદાજે ૨૦૨ મીટર લાંબી આ ટ્રેનમાં કુલ ૮ કોચ (૪ મોટર અને ૪ ટ્રેઇલર કોચ) હશે, જેમાં કુલ ૫૫૭ મુસાફરો આરામદાયક મુસાફરી કરી શકશે. આ ટ્રેનમાં ૭ સ્ટાન્ડર્ડ-ક્લાસ કોચ અને ૧ એક્ઝિક્યુટિવ-ક્લાસ કોચની વ્યવસ્થા કરવામાં આવી છે, જ્યારે ભવિષ્યના ધસારાને ધ્યાને રાખીને બે ટ્રેનો જોડીને ૧૬ કોચ બનાવવાની ક્ષમતા પણ રખાઈ છે. ભારતીય વાતાવરણ અને મુસાફરોની જરૂરિયાતોને અનુરૂપ આકાર પામી રહેલી આ ટ્રેનમાં દિવ્યાંગો માટે વિશેષ સુવિધાઓ અને ડ્રાઇવર કેબમાં ઇન્ટેલિજન્ટ ઓન-બોર્ડ કંટ્રોલ સિસ્ટમ રાખવામાં આવી છે.