રાજકોટ,

તંત્રની બેદરકારીથી વાહનચાલકો ભારે પરેશાન

રાજકોટના મહત્વના વિસ્તાર એવા રેલનગર અંડરબ્રિજથી લઈને શીતલ પાર્ક તરફ જતો મુખ્ય માર્ગ હાલ અત્યંત દયનીય સ્થિતિમાં મુકાઈ ગયો છે. આ માર્ગ પર ડામર કે પક્કા રસ્તાના અભાવે આખો રસ્તો ધૂળિયો બની ગયો છે, જેના કારણે પસાર થતા વાહનચાલકો અને રાહદારીઓને ભારે પરેશાનીનો સામનો કરવો પડી રહ્યો છે.
જ્યારે પણ આ રસ્તા પરથી વાહનો પસાર થાય છે ત્યારે ધૂળના ગોટેગોટા ઉડે છે, જેના લીધે દ્રશ્યતા ઓછી થવાથી અકસ્માતનો ભય પણ સતત તોળાયેલો રહે છે. આસપાસના રહીશો અને નોકરી-ધંધાર્થે આવતા નાગરિકોના સ્વાસ્થ્ય પર પણ આ ધૂળની વિપરીત અસર પડી રહી છે. સ્થાનિક લોકો અને વાહનચાલકો દ્વારા તંત્ર સમક્ષ અનેકવાર રજૂઆતો કરવા છતાં આ સમસ્યાનો કાયમી ઉકેલ આવ્યો નથી. નાગરિકોએ વહેલી તકે આ માર્ગ પર પેવર અથવા ડામર કામગીરી પૂર્ણ કરવાની માંગ ઉઠાવી છે.