અમદાવાદ,

કર્ણાવતી ચાર રસ્તા પાસે અકસ્માત સર્જી કારચાલક ફરાર

અમદાવાદ શહેરના વ્યસ્ત અને ધમધમતા એસજી હાઈવે પર આવેલા કર્ણાવતી ચાર રસ્તા પહેલાં શેલ્બી કટ નજીક એક પૂરપાટ ઝડપે દોડી રહેલી બીએમડબલ્યુ કારના ચાલકે રસ્તા પર ગફલતભરી રીતે વાહન હંકારીને એક પછી એક એમ કુલ ત્રણ વાહનોને જોરદાર ટક્કર મારી હતી.

એએમટીએસ બસ સ્ટેન્ડની સામેથી પસાર થઈ રહેલા એક એક્ટિવા સ્કૂટરને આ બેફામ કારે પાછળથી ટક્કર મારતા તેના પર સવાર બે સગા ભાઈઓ ફંગોળાઈને ઈજાગ્રસ્ત થયા હતા. રોકવાને બદલે કારચાલકે આગળ જઈને એક ઓટોરિક્ષા અને અન્ય એક કારને પણ અડફેટે લીધી હતી, જેના કારણે ઓટોરિક્ષામાં બેઠેલા મુસાફરને પણ પગના ભાગે ઈજા પહોંચી હતી. અકસ્માત સર્જ્યા બાદ કારચાલક પોતાનું વાહન મૂકીને નાસી છૂટ્યો હતો. ઘટનાની જાણ થતાં ૧૦૮ એમ્બ્યુલન્સની ટીમે તાત્કાલિક ઈજાગ્રસ્તોને સોલા સિવિલ હોસ્પિટલ ખાતે ખસેડ્યા હતા, જ્યાં પ્રાથમિક સારવાર આપી તેમને રજા આપવામાં આવી હતી.