વડોદરા શહેરને ટૂંક સમયમાં એક નવું અને આધુનિક ગાંધીનગર ગૃહ મળવા જઈ રહ્યું છે. વડોદરા મહાનગરપાલિકા દ્વારા હાલના ગાંધીનગર ગૃહના સ્થળે જ અદ્યતન સુવિધાઓ સાથે નવા ઓડિટોરિયમના નિર્માણ માટે આયોજન હાથ ધરાયું છે. શહેરના સાંસ્કૃતિક અને સામાજિક કાર્યક્રમોને વધુ ભવ્યતા અને સુવિધા મળે તે માટે મહાનગરપાલિકાએ આ મહત્વાકાંક્ષી પ્રોજેક્ટ માટે રૂ. 38 કરોડની ફાળવણી બજેટમાં કરી છે. અંદાજ મુજબ આગામી 24 મહિનામાં આ નવું ગાંધીનગર ગૃહ તૈયાર થઈ જશે.

હાલમાં ગાંધીનગર ગૃહ 912 બેઠક ક્ષમતા ધરાવે છે, પરંતુ નવા પ્રોજેક્ટ હેઠળ બેઠક વ્યવસ્થા વધારીને 1035 સુધી પહોંચાડવામાં આવશે. આ સાથે પ્રેક્ષકો માટે વધુ આરામદાયક અને વિશાળ બેઠક વ્યવસ્થા ઉભી કરવામાં આવશે. ઓડિટોરિયમને આધુનિક ધોરણો મુજબ ડિઝાઇન કરવામાં આવ્યું છે અને તેમાં મોટી બાલ્કનીનો સમાવેશ કરવામાં આવશે, જેથી વધુ લોકો એકસાથે કાર્યક્રમોનો આનંદ લઈ શકે.
 

મહાનગરપાલિકાએ આ પ્રોજેક્ટ માટે વિગતવાર ડીપીઆર (ડિટેઇલ્ડ પ્રોજેક્ટ રિપોર્ટ) તૈયાર કરી દીધો છે. ખર્ચની મંજૂરી માટે ફાઈલ કમિશનર પાસે મોકલવામાં આવી છે. મંજૂરી મળ્યા બાદ ટેન્ડરિંગ પ્રક્રિયા હાથ ધરાશે અને વર્ક ઓર્ડર આપ્યા પછી બાંધકામ શરૂ કરવામાં આવશે. ઇન્ચાર્જ સિટી એન્જિનિયર પ્રમોદ વસાવાના જણાવ્યા મુજબ, આ પ્રોજેક્ટને શહેરની ઓળખ સાથે સુસંગત હેરિટેજ લુક આપવામાં આવશે, જેથી વડોદરાની ઐતિહાસિક છાપ જળવાઈ રહે અને સાથે આધુનિકતા પણ ઝળકે.

આ નવું ગાંધીનગર ગૃહ 2153 સ્ક્વેર ફૂટ વિસ્તારમાં વિકસાવવામાં આવશે. હાલની ઇમારત નજીકના શૌચાલય અને આસપાસની ઉપલબ્ધ જગ્યાને પણ નવા ડિઝાઇનમાં સામેલ કરવામાં આવશે, જેથી વધુ વિશાળ અને સુવ્યવસ્થિત ઓડિટોરિયમ ઊભું કરી શકાય. બાંધકામ દરમિયાન જગ્યાના શ્રેષ્ઠ ઉપયોગ પર ખાસ ધ્યાન અપાશે.

હાલમાં ગાંધીનગર ગૃહ પાસે પાર્કિંગની ગંભીર સમસ્યા છે. મોટા કાર્યક્રમો દરમિયાન વાહનોની અવરજવર અને પાર્કિંગને કારણે ટ્રાફિકની તકલીફ ઉભી થાય છે. આ સમસ્યાને દૂર કરવા નવા ઓડિટોરિયમમાં બેઝમેન્ટ અને સેમી-બેઝમેન્ટ પાર્કિંગની સુવિધા ઊભી કરવામાં આવશે. બેઝમેન્ટમાં 55 ફોર વ્હીલર અને 100 ટુ વ્હીલર પાર્ક કરી શકાય તેવી વ્યવસ્થા હશે. ગીચ વિસ્તારમાં પાર્કિંગની સમસ્યાનો આ પ્રોજેક્ટ દ્વારા લાંબા ગાળાનો ઉકેલ લાવવા પ્રયાસ કરાયો છે.
 

સુરક્ષા બાબતે પણ વિશેષ ધ્યાન આપવામાં આવશે. નવા ઓડિટોરિયમમાં અદ્યતન ફાયર અને સ્મોક ડિટેક્શન સિસ્ટમ લગાવવામાં આવશે. બેઝમેન્ટ માટે વેન્ટિલેશન સિસ્ટમ તથા ફાયર ડિટેક્શન સુવિધા ઉપલબ્ધ રહેશે. આધુનિક ટેકનોલોજીનો ઉપયોગ કરીને સમગ્ર ઇમારતને સુરક્ષિત અને કાર્યક્ષમ બનાવવામાં આવશે. સાથે જ લાઇટિંગ, સાઉન્ડ સિસ્ટમ અને સ્ટેજ સુવિધાઓને પણ અપગ્રેડ કરવામાં આવશે, જેથી રાષ્ટ્રીય અને આંતરરાષ્ટ્રીય સ્તરના કાર્યક્રમોનું આયોજન શક્ય બને.

આ પ્રોજેક્ટ પૂર્ણ થયા બાદ વડોદરા શહેરને એક આધુનિક સાંસ્કૃતિક કેન્દ્ર મળશે. શૈક્ષણિક કાર્યક્રમો, નાટકો, સંગીત સંધ્યા, સેમિનાર અને વિવિધ સામાજિક પ્રસંગો માટે આ ઓડિટોરિયમ એક મહત્વપૂર્ણ સ્થાન બનશે. મહાનગરપાલિકાનું માનવું છે કે, આ નવી સુવિધા શહેરના વિકાસમાં માઈલસ્ટોન સાબિત થશે અને નાગરિકોને આધુનિક માળખાકીય સુવિધાનો લાભ મળશે.

જે તેની સંસ્કૃતિ અને વારસાને કારણે ઓળખાય છે, તેને હવે હેરિટેજ લુક ધરાવતું આધુનિક ગાંધીનગર ગૃહ મળશે. શહેરના વિકાસના દ્રષ્ટિકોણથી આ પ્રોજેક્ટ અત્યંત મહત્વપૂર્ણ ગણાઈ રહ્યો છે. આગામી બે વર્ષમાં આ પ્રોજેક્ટ સાકાર થશે અને વડોદરાવાસીઓને એક ભવ્ય, સુસજ્જ અને સર્વસુવિધાસભર ઓડિટોરિયમનું નવલું નજરાણું મળશે.