કોલકાતા,

રબીુલ આલમ ચૌધરીએ પીછેહઠ કરતા મમતા બેનર્જીની પાર્ટી મુશ્કેલીમાં મુકાઈ

પશ્ચિમ બંગાળમાં આગામી સમયમાં યોજાનારી વિધાનસભાની પેટાચૂંટણી પહેલા મુખ્યમંત્રી મમતા બેર્નજીની આગેવાનીવાળી તૃણમૂલ કોંગ્રેસ (TMC)ની મુશ્કેલીઓમાં સતત વધારો થઈ રહ્યો છે. નંદીગ્રામ બેઠક બાદ હવે રેજીનગર બેઠકના ઉમેદવારે પણ ચૂંટણીમાંથી પોતાનું નામ પાછું ખેંચી લેતા રાજકીય વર્તુળોમાં હડકંપ મચી ગયો છે.

રેજીનગર બેઠક પરથી ટીએમસીના ઉમેદવાર તરીકે રબીુલ આલમ ચૌધરી મેદાને ઉતર્યા હતા, પરંતુ તેમણે અચાનક જ પોતાની ઉમેદવારી એમ કહી પાછી ખેંચી લેવાની જાહેરાત કરી છે કે, નવા મળેલા ચિન્હ સાથે ટૂંકા સમયમાં મતદારો સુધી પહોંચવામાં મુશ્કેલી આવી રહી છે. ખાસ વાત એ છે કે, આના બરાબર એક દિવસ અગાઉ જ નંદીગ્રામ વિધાનસભા બેઠક પરથી ટીએમસીના ઉમેદવાર સંચિતા પ્રધાન દેએ પણ ચૂંટણી લડવાનો ઇનકાર કરીને પોતાનું નામ પાછું ખેંચી લીધું હતું.

સતત બે મોટા ઝટકા મળવાથી મમતા બેર્નજીની છાવણીમાં ચિંતાનું મોજું ફરી વળ્યું છે. એક પછી એક ઉમેદવારો દ્વારા નામ પાછું ખેંચી લેવાની આ અણધારી ઘટનાથી પક્ષની રણનીતિ સામે પણ સવાલો ઉભા થઈ રહ્યા છે અને વિપક્ષોને સરકાર પર પ્રહાર કરવાની વધુ એક તક મળી ગઈ છે.